Read Batak Angkola PANGARATAION 9 Bible Online

PANGARATAION 9 - Batak Angkola bible

PANGARATAION 9

¹“Tangihon hamu ma angka dongan sabangso! Di ari on tariparanmunu ma Batang aek Jordan laho mambuat tano ni angka bangso na gumodang jana na gumogo sian hamu. Godang-godang do angka kota ni halahi, martembok na gincat marsijongjong lalu tu langit.

²Angka halakna pe godang jana potonganna pe gogo, raksasa do halahi, jana madung dibege hamu na so adong sahalak pe na tarbaen mangalo halahi.

³Tapi anggo saonnari idaonmunu sandiri ma sanga na bia TUHAN Debatamunu mardalan di jolomunu songon api na manyurbu. TaluhononNia ma halahi di jolo ni matamunu, gabe tarpaorot jana tarpusa hamu tibu halahi, songon na dung dijanjihon TUHAN.

⁴Dung dipaorot TUHAN Debatamunu i halahi hara ni hamu, ulang dokkon hamu muse tu dirimunu sandiri, dioban Ia pe hamu tusi anso hamu nampuna tano i, hara ni na burju hamu jana dipatulus hamu hagiot ni TUHAN gabe patut ma hamu manjagitsa. Nada songon i! Dipaorot TUHAN pe angka bangso i di hamu, hara ni na jahat do halahi.

⁵Dipadiar TUHAN hamu mambuat tano ni halahi i, dibaen por ni rohaNia do patulus janjiNia dohot ompumunu si Abraham, si Ishak dohot si Jakob.

⁶Pos ma rohamunu, nada dipasahat TUHAN tano napu i tu hamu hara ni na tumbuk hamu manjagit. Nada! Bangso sijogal rungkung do hamu.

⁷Ingot hamu sanga na bia dibaen hamu gabe muruk TUHAN Debatamunu di parhorsihan i. Mamungka sian ari disi ditadingkon hamu Mesir, lopus tu ari parlalumunu dison, na dung mangalo do hamu tu Tuhan.

⁸Di Dolok Sinai dope madung sun muruk ni TUHAN dibaen hamu, jabat do giot dipusa Ia hamu.

⁹Manangkok au tu dolok i laho manjagit batu panyuratan ni parjanjian na nibaen ni TUHAN dohot hamu. Opat pulu ari opat pulu borngin lolotna au di ginjang dolok i nada mangan sanga minum.

¹⁰Dung i dilehen TUHAN ma tu au batu na dua i na nisurat ni TUHAN sandiri dohot hata na nipajojorNia sian tonga-tonga ni api i tu hamu, di na marlagut hamu di pat ni dolok i.

¹¹Olo, dung salpu na opat pulu ari opat pulu borngin i, dilehen TUHAN ma tu au batu na dua na dung marsurat dohot parjanjian i.

¹²Dung i didok TUHAN ma tu au, ‘Ompoti ma mijur sian dolok on, angke madung marrorang bangsomu na nipimpinmi ruar sian Mesir; madung mambaen na jahat halahi. Madung manyimbil halahi sian angka na Huparentahon jana dibaen halahi patung sisombaon.’

¹³Didok TUHAN muse dope tu au, ‘Huboto do anggo bangso on na santak do jogal ni rohana.

¹⁴Ulang cubo mangambati Au. Giot pusaonKu halahi lopus sahalak pe nada adong be na marningot halahi. Tapi anggo ho baenonKu ma gabe ama ni sada bangso na gumodang jana na gumogo sian halahi.’

¹⁵Dung i manuat ma au sian dolok i, huoban batu sidua-dua na marsurat parjanjian i. Di na mardalan au mijur sian dolok i, haruar ma angka dila ni api.

¹⁶Huida ma na dung mangalanggar hamu tu parenta na nilehen ni TUHAN Debatamunu tu hamu. Madung mardosa hamu maradopkon TUHAN, hara na nibaenmunu di hamu sada patung ni lombu sian sere.

¹⁷Laing di inganan i dope, di jolo ni matamunu, hutombomkon batu siduakoping i lopus sarsar marhoping-hoping.

¹⁸Dung i manungkap au sanoli nari di jolo ni TUHAN di puncut ni dolok i opat pulu ari opat pulu borngin lolotna, nada mangan nada minum. Hubaen pe songon i hara ni na dung mardosa do hamu maradopkon TUHAN jana muruk Ia dibaen hamu.

¹⁹Mabiar do au di haririmas ni TUHAN dibaen sun do murukNia, jabat do giot pusaonNia hamu; hape laing ditangihon TUHAN dope au sanoli on.

²⁰Muruk sajo do TUHAN dohot tu si Harun, jabat do giot bunuonNa ia, gabe martangiang muse ma au salaho tusia.

²¹Antong patung na nibaenmunu i — lombu sere — huambungkon noma tu api. Huropuk ma i jana hududa lopus lamot songon abuan, lalu huambungkon ma abuna i tu bagasan anak ni batang aek na mardalan sian dolok i.

²²Di Tabera, Masa dohot Kibrot Taawa disungguli hamu do muruk ni TUHAN Debatamunu.

²³Dung i di na nisuru ni TUHAN hamu mardalan sian Kades-Barnea, jana diparentahon mardalan dohot mamorangi tano na giot silehenon ni TUHAN tu hamu, mangalo do hamu tu Tuhan, nada ra hamu porsaya sanga mangoloi tuSia.

²⁴Sian dung hutanda hamu, sai matua na mangalo do hamu tu TUHAN.

²⁵Gabe manungkap ma au di jolo ni TUHAN opat pulu ari opat pulu borngin, angke huboto do anggo TUHAN madung putus rohaNia laho mamusa hamu.

²⁶Gabe hutangiangkon ma songon on, ‘O Tuhan DEBATA, ulang antong pusa halakMon, bangso na dung nipaluaMu jana na nitaruhonMu haruar sian Mesir mardongan gogo dohot kuaso na godang.

²⁷Ingot ma angka naposoMu si Abraham, si Ishak dohot si Jakob, jana ulang ma ligi tu jogal ni roha, hajahatan dohot dosa ni bangso on.

²⁸Muda laing pusaonMu do bangsoMon, gabe dokkonon ni halak Mesir ma na so tuk gogoMu maroban bangsoMon tu tano na dung nijanjihonMi tu halahi. Dokkonon ni halahi ma na giot mamunu bangsoMi do Ho umbaen dioban Ho halahi tu parhorsihan, hara ni goyak ni rohaMu tu halahi.

²⁹Tapi ingot ma, ale TUHAN, bangso na nitodoMu do halahi, jana na dung niobanMu sian Mesir mardongan gogo dohot kuaso na godang.’ ”