Read Batak Angkola JOHANNES 1 Bible Online

JOHANNES 1 - Batak Angkola bible

JOHANNES 1

¹Di mulana i, madung adong Hata i. Rap dohot Debata do Hata i jana Debata do Hata i.

²Mamungka sian mulana rap dohot Debata do Ia.

³Sasudena do dijadihon markite-hite Ia, jana sian sasude na adong, sangkamata pe nada adong na nijadihon, so marhite sian Ia.

⁴Mual ni ngolu do Hata i,[1] jana ngolu i ma na mangalehen sinondang tu jolma.

⁵Marsinondang do na torang i di hagolapan, jana nada tarintopi hagolapan i na torang i.

⁶Ro ma halak na niutus ni Debata, si Johannes goarna.

⁷Na manyaksihon taringot tu na torang i do na niharohonnia, anso sudena halak porsaya.

⁸Nada ia sandiri tutu na torang i, hum na manyaksihon do ia taringot tusi.

⁹Torang na tutu na manorangi sandok jolma, ro tu portibi on.

¹⁰Di portibi on do Hata i, markite-hite Ia do dijadihon portibi on, hape nada ditanda portibi on Ia.

¹¹Ro ma Ia tu luatNia sandiri, hape nada dijagit bangsoNia i Ia.

¹²Tapi sanga ise na manjagit Ia jana porsaya tuSia, dilehen Ia do hak gabe dakdanak ni Debata,

¹³i ma angka na so tubu sian mudar, sanga sian roha sibuk, sanga sian hagiot ni halaklahi, tapi na ditubuhon ni Debata.

¹⁴Jadi madung gabe sibuk do Hata i, jana maringanan di tonga-tonganta, madung taida hamuliaonNia. Songon hamuliaon ni Anak Sasada na sian Ama i, na gok asi ni roha dohot hasintongan.

¹⁵Ro do si Johannes gabe saksina, dipaboa ia ma: “On ma da Ia na hudokkon i: Na giot ro do Ia umpudi sian au, tapi na gumodang ulang au, angke dompak so adong dope au, madung adong hian Ia.”

¹⁶Angke sian hagogokNia, nada mar na mantak Ia, mamasumasu tu hita sudena.

¹⁷Dibaen dilehen do Tona i markite-hite si Musa tapi anggo asi ni roha dohot hasintongan markite-hite Jesus Kristus do.

¹⁸Nada adong halak na unjung marnida Debata, asing sian Anak Sasada ni AmaNa, na diampuan ni Ama i, jana Ia do na papatarkonsa tu hita.

¹⁹Jana on ma na disaksihon ni si Johannes hatiha na disuru ni halak Jahudi na sian Jerusalem angka malim dohot halak Levi laho manyapai ia, “Ise dehe ho?”

²⁰Nada pola ditabunihon si Johannes taringot tusi. Torus tangkas do dipaboa ia, “Nada au Kristus i.”

²¹“Anggo songon i, ise dehe ho satutuna?” ninna halahi manyapai. “Sanga si Elia dehe ho?” “Nada,” ning si Johannes mangalusi. “Betak na ho do panurirang na indohan?”[2] ning halahi manyapai. “Nada,” ning ia.

²²Dung i ninna halahi ma tusia, “Ise dehe ho?” Harana angkon adong do alus lehenonnami tu angka na marsuru hami tuson. “Aha do dokkononmu taringot tu dirimu sandiri?”

²³Dialusi si Johannes ma dohot hata songon na nidok ni Panurirang Jesaya, “Anggo au, ‘Sora ni halak na pio-pio di halongonan do au: Pahornop hamu ma dalan ni Tuhan!’ ”

²⁴Na nisuru ni halak Parise do angka na manyapai i.[3]

²⁵Disapai halahi ma tu si Johannes, “Anggo so ho do Kristus i, nada si Elia ho, nada panurirang na indohan muse ho, biasi dipandidihon ho halak?”

²⁶Dialusi si Johannes ma, “Dohot aek do hupandidihon halak. Tapi di tonga-tongamunu jongjong do Ia na so nitandamunu.

²⁷Umpudi dope Ia ro ulang au, tapi mangkarhari tali ni sipatuNia pe, nada tama dope au.”

²⁸Di Betania na di ipar ni Batang aek Jordan do sudena i tarjadi, angke disi do si Johannes mandidihon halak.

²⁹Ancogotna i diida si Johannes ma ro Jesus mandapotkon ia. Didok si Johannes ma, “Ligi ma! Indi ma ibana Anak Ni Biri-biri Ni Debata na manyesa dosa ni portibi on!

³⁰Ia ma na hudokkon i na umpudi ro ulang au, tapi na gumodang dope Ia sian au; angke na dung adong hian do Ia dompak so sorang dope au.

³¹Nada hutanda hian sanga na ise Ia, tapi hara ni i do umbaen na ro au mandidihon dohot aek anso ditanda halak Israel Ia.”

³²Songon on ma hasaksian na nilehen ni si Johannes taringot tuSia, “Huida ma Tondi i mijur songon darapati sian langit lalu songgop tuSia.

³³Nada hutanda hian dope Ia. Tapi Debata na marsuru au mandidihon dohot aek i mandok tu au, ‘Muda diida ho Tondi Parbadia mijur tu sada halak jana maringanan di bagasan Ia, Ia ma na giot mandidihon dohot Tondi Parbadia.’

³⁴Jadi madung tangkas huida Ia jana madung husaksihon, ‘On ma Anak Ni Debata’.”

³⁵Ancogotna i laing jongjong ma disi si Johannes rap dohot siseannia dua halak.

³⁶Dung diida ia Jesus mamolus disi, ning ia ma, “Ligi ma, Anak Ni Biri-biri Ni Debata!”

³⁷Dibege sisean ni si Johannes sidua halak i do na nidok ni si Johannes songon i, gabe diihutkon halahi ma Jesus.

³⁸Manaili ma Jesus tu pudi, jadi diida Ia ma halahi na mangihutkon Ia. Ninna Jesus ma, “Manjalahi aha dehe hamu?” Ninna halahi ma mangalusi, “Rabbi, di dia dehe Ho maringanan?” (Rabbi, astuanna ‘Guru’.)

³⁹“Beta ma ligi hamu,” ninna Jesus. Jadi udur ma halahi dohot Ia mangaligi sanga di dia Ia maringanan. Laing disi ma halahi dohot Ia na sadari i. (Hira-hira pukul opat andospotang ma hatiha i.)

⁴⁰Sahalak sian na dua i, i ma na umbege na nidok ni si Johannes jana na kehe udur dohot Jesus, i ma na margoar si Andreas, anggi ni si Simon Petrus.

⁴¹Manigor diompoti si Andreas ma manjalahi si Simon angkangna i jana didok ia ma tu si Simon, “Madung marsuo hami dohot Mesias i!” (Mesias astuanna Kristus.)

⁴²Dung i ditaruhon si Andreas ma si Simon tu Jesus. Dipamanat Jesus ma si Simon, ning Ia ma, “Si Simon do ho, anak ni si Jona. Si Kepas noma goarmu.” (Kepas disaro Ibrani dos dohot Petrus disaro Junani astuanna: dolok batu.)

⁴³Ancogotna i ditontuhon Jesus ma anso kehe Ia tu Galilea. Marsuo ma Ia dohot si Pilipus, dung i ning Ia ma tu si Pilipus, “Beta, ihutkon ma Au!” (

⁴⁴Sian Betsaida do asal ni si Pilipus, i ma kota ni si Andreas dohot si Petrus.)

⁴⁵Dung i marsuo muse ma si Pilipus dohot si Natanael jana didok ia ma, “Madung marsuo hami dohot Ia na nidok ni si Musa di bagasan Buku Tona i, dohot na nidok ni angka panurirang, i ma Jesus anak ni si Josep halak Nasaret i.”

⁴⁶Tapi dialusi si Natanael ma, “Adong dehe lakna ro na denggan sian Nasaret?” “Beta ma taligi,” ning si Pilipus mangalusi.

⁴⁷Diida Jesus do si Natanael ro mandapotkon Ia gabe dihatai Jesus ma taringot tuSia. Ninna Jesus ma, “On ma halak Israel na tutu, na so adong lancap disia!”

⁴⁸“Sian dia diboto Ho taringot tu au?” ninna si Natanael manyapai Jesus. Dialusi Jesus ma, “Taran so dipio si Pilipus ho, dompak di toru ni bona ni hayu ara i dope ho, madung Huida ho.”

⁴⁹Didok si Natanael ma, “Rabbi, Anak Ni Debata do Ho! Ho do Raja ni halak Israel!”

⁵⁰Dung i didok Jesus ma, “Adong he hara ni na Hudok i, madung Huida ho dompak di toru ni bona ni hayu ara i dope ho umbaen na porsaya ho? Idaonmu dope angka pangalaho na gumodang sian i!”

⁵¹Dung i ninna Jesus ma tusia, “Tutu situtu do na Hudok on tu ho, idaonmu ma mungkap langit, jana manaek mijur ma angka surusuruan ni Debata tu Anak Ni Jolma i.”