Read Batak Angkola JOHANNES 10 Bible Online

JOHANNES 10 - Batak Angkola bible

JOHANNES 10

¹“Tutu situtu do na Hudok on tu hamu: Sanga ise na masuk tu bara ni biri-biri i nada sian pintu, sipanangko do i jana panyamun.

²Tapi anggo na masuk sian pintu, i ma parmahan ni biri-biri i.

³Jadi diungkap panjago i ma pintu i tu parmahan i, jana ditangihon angka biri-biri i ma sora ni parmahan i di na nipiohonnia angka biri-birinia i hombar tu goar-goarna be; dung i dioban ia ma halahi tu ruar.

⁴Dung dioban ia angka biri-biri i tu ruar, di jolo ma mardalan parmahan i, jana mangihut ma angka biri-birinia i sian pudinia harana ditanda halahi do sorania.

⁵Nada ra be halahi mangihut tu halak na asing, marlojong do halahi kehe manadingkon halak na asing, harana nada ditanda halahi sorana i.”

⁶Nada diastui angka halak na umbegean i sanga aha astuan ni umpama na nidok ni Jesus i.

⁷Didok Jesus ma mangulahi, “Tutu do na Hudokkon tu hamu: ‘Au do pintu di biri-biri i.

⁸Sude halak na parjolo sian Au, panangko do i jana panyamun, jana nada ditangihon angka biri-biri i sora ni i.

⁹Au do pintu i. Sanga ise na masuk sian Au, dapotan haluaan; dapotan jampalan ma i muda masuk sanga karuar.’

¹⁰Anggo panangko, na giot manangko sajo do i muda ro, mamatehon dohot manyegohon. Tapi anggo Au muda ro, anso marhangoluan do halahi — i ma hangoluan na marlobi-lobi.”

¹¹“Au do parmahan na denggan. Rade do mate anggo parmahan na denggan manghopkop biri-birina.

¹²Anggo parkarejo na mangomo, nada parmahan i, jana nada ia nampuna angka biri-biri i. Muda diida ia sorigala, marlojong ma ia manadingkon angka biri-biri i, lopus disoroi sorigala i angka biri-biri i jana marsitondong dalanna be.

¹³Marlojong do parkarejo na niupaan i, angke hara ni na niupaan do ia antong umbaen na karejo; nada dipardulihon ia anggo biri-biri i.

¹⁴Au do parmahan na denggan. Hutanda do angka biri-biringKu jana ditanda halahi do Au,

¹⁵songon Damang na mananda Au jana Au mananda Damang. Jana Hulehen do hosangKu humopkop biri-biringKi.

¹⁶Adong dope angka biri-biri na asing laing Au nampunasa, tapi nada sabara dohot angka biri-biri on. Halahi pe angkon obanonKu do jana laing tangihonon ni halahi do sorangKu. Sudena halahi angkon gabe[14] sapunguan jana sada parmahan.”

¹⁷“Holong do roha ni Damang tu Au hara ni haradeonKu mangalehen hosangKu, anso jagitonKu i mangulahi.

¹⁸Nada tarbaen sanga ise pe mangarampas hosangKu sian Au. Na rade hian do Au mangalehen hosangKi. Guru di Au do mangalehen i jana marguru di Au do muse laho manjagitsa mangulahi. Jana i ma na nisuruhon ni Debata sibaenonKu.”

¹⁹Hara ni na nidok ni Jesus songon i gabe martongkari ma halak Jahudi i.

²⁰Bahat na mandok, “Na sibolison do i! Na rintik do i! Biasi dipatangi-tangi hamu i?” ning halahi.

²¹Tapi adong muse do na mandok, “Anggo halak na hona setan, dia ma tarhatahon Ia na songon i! Dia ma tarbaen setan halak na mapitung gabe marnida?”

²²Marpesta Parningotan Pangompoion Bagas Ni Debata ma halak di Jerusalem. Hatiha musim ngali ma disi.

²³Mardalan-dalan ma Jesus di Emper Ni Si Salomo na di Bagas Ni Debata;

²⁴dirongomi angka parkuaso ni halak Jahudi ma Jesus disi. Ninna halahi ma tuSia, “Sadia honok nari sai pagangguon ni Guru i rohanami? Tangkas ma didokkon Guru i muda na Ho do Kristus i.”

²⁵Dialusi Jesus ma, “Madung Hudok di hamu, hape laing nada porsaya hamu. Sude angka karejo na Hukarejohon markite-hite goar ni Damang do i, angka karejongKi ma na manyaksihon taringot tu Au.

²⁶Dibaen nada biri-biringKu hamu, hara ni i nada porsaya hamu.

²⁷Ditangihon biri-biringKu do sorangKu. Hutanda do halahi jana diihutkon halahi do Au.

²⁸Hulehen do di halahi hangoluan na so ra mantak. Bagi na bia pe nada mate halahi, jana nada tarrampas sanga ise pe halahi sian parmahanionKu.

²⁹Gumodangan dope Damang na mangalehen halahi di Au[15] sian sasudena. Jana nada tarrampas sanga ise pe halahi sian parmahanion ni Damang.

³⁰Sada do Au dohot Damang.”

³¹Dung i dibuat angka parkuaso ni Jahudi i ma mangulahi batu laho mandanggur Jesus.

³²Tapi didok Jesus ma tu halahi, “Madung diida hamu Au mambaen angka karejo na denggan, na nisuruhon ni Damang karejohononKu; sian sude parkarejoan i, hara ni karejo na dia ma umbaen giot dangguranmunu Au?”

³³Dialusi angka parkuaso i ma, “Umbaen na giot danggurannami Ho, nada hara ni angka karejoMu na denggan i, tapi hara ni na nipabileMu do Debata! Jolma humani do Ho antong hape dioku Ho diriMu songon Debata!”

³⁴Dung i didok Jesus ma mangalusi, “Inda he tarsurat di Buku Tona i: Madung Hudok, ‘Angka debata do hamu’?

³⁵Jana sude hita rap taoku do anggo na tarsurat di Buku Na Badia i, nada tarbaen sundat i. Antong anggo songon i, muda tu angka na manjagit hata ni Debata i, digoari Debata sandiri halahi angka debata,

³⁶biasi didok hamu na mangincahi Debata hara ni na Hudok Au Anak Ni Debata? Hape nian na diparbadiai ni Ama i do Au jana na nisuruNia tu portibi on?

³⁷Sugari na so Hukarejohon karejo ni Damang, padiar ma indangkon sai porsaya hamu tu Au.

³⁸Tapi muda Hukarejohon karejo ni Damang, haru pe nada porsaya hamu tu Au, saotik-otikna angkon haporsayaanmunu ma nian na Hubaen i, anso diboto jana diastui hamu na sada do Damang dohot Au, jana Au sada dohot Damang.”

³⁹Giot ditangkup halahi ma Ia tapi malua do Ia sian tangan ni halahi.

⁴⁰Mangulahi ma Jesus kehe tu ipar ni Batang aek Jordan, i ma inganan ni si Johannes na salpu i mandidihon halak, jana disi ma Ia jolo tinggal.

⁴¹Marroan ma bahat halak mandapotkon Ia. Didok halahi ma, “Nada nian mambaen tanda hahomangan si Johannes, tapi tutu do sude na nidok ni si Johannes taringot tu Bayo on.”

⁴²Jadi bahat ma disi halak porsaya tu Jesus.