Read Batak Angkola JOHANNES 12 Bible Online

JOHANNES 12 - Batak Angkola bible

JOHANNES 12

¹Onom ari nari dompak so Pesta Paskah i, kehe ma Jesus tu Betania. Disi do tinggal ni si Lasarus na dung jungada mate jana na nipangolu ni Jesus mangulahi.

²Ditamu halahi ma Ia disi, jana dohot ma si Marta mangoloi disi tapi anggo si Lasarus dohot ma ia mangan rap dohot Jesus.

³Dung i ro ma si Maria maroban hira-hira satonga liter narwastu, i ma miak na lobi huskus jana na arga situtu. Diusehon ia ma miak i tu pat ni Jesus jana diapus ia ma dohot obuknia. Gabe huskus ma sude bagas i hara ni uap ni miak na huskus i.

⁴Sahalak sian sisean ni Jesus na margoar si Judas Iskariot, ia ma muse na manghianat tu Jesus mandok,

⁵“Biasi ma he inda nigadis miak na huskus i, arga tolu ratus hepeng perak jana nilehen hepengna i tu halak na pogos?” (

⁶Didok si Judas pe songon i nada na mangarohahon halak na pogos ia, tapi hara ni na panangko do ia. Madung somal ia mambuati hepeng sian hepeng ni halak na dipasimpankon disia.)

⁷Tapi didok Jesus ma, “Padiar ma songon i. Tu ari pananomanKu do i dibaen ia.

⁸Anggo halak na pogos tongtong do adong di tonga-tongamunu, tapi anggo Au nada tongtong rap dohot hamu.”

⁹Bahat ma halak Jahudi na umbege, na dung di Betania Jesus. Jadi kehe ma halahi tusi. Umbaen na kehe pe halahi tusi nada hum hara ni Jesus, tapi dohot do muse hara ni na giot mangaligi si Lasarus na dung dipangolu ni Jesus mangulahi.

¹⁰Hara ni i ma dibaen na giot dohot si Lasarus bunuon ni angka sintua ni malim i;

¹¹angke hara ni ia, gabe bahat halak Jahudi na kehe manadingkon pamimpin ni halahi gabe porsaya muse tu Jesus.

¹²Ancogotna i tarbege ma tu halak na bahat na marroan manghagodangkon Paskah i, bahaso na dung di tonga dalan Jesus laho tu Jerusalem.

¹³Dung i diparrampingkon halahi ma mare-mare, kehe ma halahi mangalo-alo Jesus. Marsurahi ma halahi, “Hosana! Dipasupasu ma Ia na ro di bagasan goar ni Tuhan, Raja ni Israel!”

¹⁴Jadi adong ma halode na poso dapot Jesus jana dilombut Ia ma i. Laing songon na tarsurat i,

¹⁵“Ulang ho mabiar, ale boru kota Sion! Ligi ma Rajamu ro, mangalombut sada halode jara-jara!”

¹⁶Anggo di hatiha i nada diastui anak sisean ni Jesus i dope taringot tusi. Tapi dung dipasangap Jesus, i ma dung diparsilangkon jana mulak mangolu Ia, baru pe diingot halahi na dung tarsurat songon i di bagasan Buku Na Badia taringot tuSia jana na dung dipatulus halahi songon i tuSia.

¹⁷Anggo angka na midaan Jesus hatiha na mamiohon si Lasarus haruar sian kuburan i jana dipangolu ia mangulahi, sai dipaboa-boa halahi do torus tu angka halak na asing taringot tusi.

¹⁸I do umbaen na marroan halak na bahat i mandapotkon Jesus, harana madung dibege halahi na nibaenNia hahomangan i.

¹⁹Dung i marsipandohonan ma angka halak Parise i ninna halahi ma, “Nada adong gunana ro hita tuson! Ligi hamu ma, ma gabe sude na satano on mangihutkon Ia!”

²⁰Tapi adong do dohot halak Junani sian angka na manangkok marsomba di ari pesta i.

²¹Ditopot halahi ma si Pilipus, ninna halahi ma, “Anggo tarbaen do sugari, por do rohanami marsuo dohot Jesus.” (Sian Betsaida na di Galilea do anggo asal ni si Pilipus.)

²²Dung i kehe ma si Pilipus paboahon i tu si Andreas, gabe rap ma halahi na dua paboahonsa tu Jesus.

²³Dung i didok Jesus ma tu halahi, “Madung dapot hatihana pasangapon Anak Ni Jolma i.

²⁴Tutu do na Hudok on tu hamu: Muda so nisuan tu tano jana mate same i, laing tinggal sangkibung i sajo do i. Tapi muda mate same i, baru pe anso bahat eme diparbatuhon.

²⁵Sanga ise na mangkaholongi ngoluna na di tano on, agoan ngolu na so mantak ma halahi. Tapi sanga ise na so mampardulihon ngoluna na di tano on, na mangarade tu hangoluan na so mantak ma halahi.

²⁶Sanga ise na giot mangoloi Au angkon ihutkononnia do Au; anso sai tongtong rap dohot Au angka na mangoloi Au sanga di dia pe Au. Jana pasangapon ni Damang muse ma sanga ise na mangoloi Au.”

²⁷“Songon na marsak do rohangKu saonnari. Aha do na giot sidohononKu? DohononKu do, ‘O Amang ulang ma padiar Au mamolus partinaonan on!’ Hape nian laho manaon partinaonan on do umbaen na ro Au.

²⁸Pasangap ma goarMu da Amang!” Dung i tarbege ma sora sian langit na mandok, “Madung Hupasangap i tapi pasangaponKu dope i mangulahi.”

²⁹Dibege halak na bahat na disi do sora i. Didok halahi ma, “Ronggur do i!” Tapi adong muse do mandok, “Nada! Surusuruan do i mangkobari tuSia!”

³⁰Dung i didok Jesus ma tu halahi, “Nada hara ni Au umbaen na tarbege sora i, tapi hara ni haporluanmunu do.

³¹Saonnari ma hatihana uhuman portibi on; taluhonon ma raja ni portibi on saonnari.

³²Anggo Au muda dung dipatuginjang di ginjang ni tano, tarihonKu ma halak sudena tu Au.”

³³Na paboahon pangalaho ni hamateanNia na di parsilangkon i do na nidokNia songon i.

³⁴Didok halak na bahat i ma tuSia, “Anggo mangihutkon Buku Tona ni ugamonami, salolot-lolotna do mangolu anggo Kristus i. Biasi do didokkon Ho patuginjangon di ginjang tano Anak Ni Jolma i. Ise lakna Anak Ni Jolma i?”

³⁵Dialusi Jesus ma, “Santongkin nari sajo noma hatiuran i di tonga-tongamunu. Jadi dalani hamu ma sidalananmunu salolot laing adong na torang i anso ulang ditutupi hagolapan i hamu. Sanga ise na mardalan di na golap nada diboto ia sanga na giot tu dia ia kehe.

³⁶Haporsayai hamu ma hatiuran i salolot laing di hamu i, anso gabe halak ni hatiuran hamu.” Dung didokkon Jesus songon i, morot ma Ia sian i jana nada ra be Ia patidahon diriNa tu halahi.

³⁷Madung bahat sajo angka hahomangan dibaen Jesus di jolo ni halahi. Tapi haru songon i pe nada porsaya halahi tuSia.

³⁸Jadi di na songon i tarjadi ma na didok ni Panurirang Jesaya. Songon on ma pandoknia, “O ale Tuhan, ise ma he na porsaya tu jamitanami? Tu ise dope patidahonon kuaso ni Tuhan?”

³⁹Hara ni i ma umbaen na so tarhaporsayai halahi, angke didok si Jesaya hian do songon on,

⁴⁰“Hupapitung do mata ni halahi, jana Hupagolap pikiran ni halahi; lopus nada marnida mata ni halahi, jana nada marbuka pikiran ni halahi. Anso ulang mulak halahi tu Au, gabe Hupamalum halahi muse.”

⁴¹Songon i do didok si Jesaya, harana madung diida ia hasangapanNia jana na mangkobari ia taringot tuSia.

⁴²Tapi haru pe songon i, laing bahat do angka pamimpin ni halak Jahudi i na porsaya tu Jesus. Tapi nada puluk halahi mangoku torang di jolo ni halak; harana mabiar halahi diharuarkon sian bagas paribadatan.

⁴³Harana holongan do roha ni halahi di hasangapan na sian jolma, ulang pado hasangapan na sian Debata.

⁴⁴Dung i didokkon Jesus ma, “Sanga ise na porsaya tu Au, nada hum tu Au porsaya halahi tapi dohot do tu na marsuru Au.

⁴⁵Jana sanga ise na marnida Au, diida Ia muse do na marsuru Au.

⁴⁶Songon sinondang do Au di na ro tu portibi on, anso sude halak na porsaya tu Au ulang be tinggal di na golap.

⁴⁷Sanga ise na manangihon pangajaranKu tapi nada diihutkon Ia nada Au na manguhumisa. Angke nada na giot manguhumi portibi on umbaen na ro Au, tapi na giot paluahon do.

⁴⁸Saulahon, adong do na manguhumi sanga ise na so ra manjagit Au jana na so ra patuluskon angka na Hudok. Jamita na Hupalalu i do na gabe panguhum maradopkon halahi di Ari Parpudi.

⁴⁹Jana songon i do tutu! Harana Au pe nada jungada Au mandok hata sian roha-rohangKu sandiri; Damang na marsuru Au, Ia do na mamarentahon tu Au sanga aha na angkon dokkononKu jana sanga aha sipabotohononKu.

⁵⁰Jana Huboto do na mangalehen hangoluan na so mantak do parentaNia i. Sanga aha na Hudokkon i, na nisuruhon ni Damang do Au mandokkon i.”