Read Batak Angkola JOHANNES 13 Bible Online

JOHANNES 13 - Batak Angkola bible

JOHANNES 13

¹Sadari noma anso Ari Pesta Paskah. Madung diboto Jesus na giot tadingkononNia ma portibi on jana mulak ma Ia tu AmangNia. Dihaholongi Ia do sudena halak na diSia, na adong di tano on jana lopus tu ujungna pe laing holong do rohaNia di halahi.

²Mangan ma Jesus dohot angka siseanNia borngin i. Madung disuan Sibolis i tu bagasan roha ni si Judas anak ni si Simon Iskariot roha na giot manghianat tu Jesus.[16]

³Diboto Jesus do na dung dipasahat AmangNia sude kuaso tuSia. Jana diboto Ia muse do na ro sian Debata Ia, jana angkon mulak muse Ia tu Debata.

⁴Jadi jongjong ma Ia sian meja i, dibuka Ia ma baju jubaNia, dililitkon Ia ma sada anduk di gontingNia.

⁵Dung i diusehon Ia ma aek tu sada sambong, dibasu Ia ma pat ni angka siseanNia i jana dipahiang Ia dohot anduk na lilit di gontingNia i.

⁶Dung lalu tu si Simon Petrus, didok si Simon Petrus ma, “Na giot mamasu patku do Ho, ale Tuhan?”

⁷Dialusi Jesus ma, “Anggo saonnari nada mangarti dope ho sanga aha na Hubaen, tapi botoonmu do i muse.”

⁸Didok si Petrus ma, “Ulang Tuhan. Bagi na bia pe nada tola ho mamasu patkon!” Tapi didok Jesus ma tusia, “Anggo so Hubasu do patmon, nada tola be ho gabe siseanKu.”

⁹Dialusi si Simon Petrus ma, “Anggo songon i do Tuhan, ulang ma hum patKu sajo dibasu, tapi dohot ma tanganKu dohot ulungKu!”

¹⁰Didok Jesus ma, “Sanga ise na dung maridi, tontu madung ias ia sude. Nada porlu be nipaias mangulahi; hum patnia[17] sajo noma i sipaiason. Anggo hamu na dung ias hian do, tapi nada sude hamu.” (

¹¹Madung diboto Jesus hian sanga ise na giot manghianat tuSia. I do umbaen na nidokNia, “Anggo hamu na dung ias hian do, tapi nada sude hamu.”)

¹²Dung sidung dibasu Jesus pat ni halahi sude, dipake Ia ma mangulahi baju jubaNia i, dipajuguk Ia ma tu juguhanNia hian. Dung i didokkon Ia ma tu halahi, “Diboto hamu do sanga aha astuan ni na Hubaen i tu hamu?

¹³Digoari hamu do Au Guru dohot Tuhan. Tutu do na nidokmunu i; harana Guru do Au tutu jana Tuhan.

¹⁴Jadi muda Au Tuhan dohot Gurumunu mamasu patmunu, hamu pe angkon marsibasuan pat ni donganna ma hamu.

¹⁵Tiruan do na Hubaen i tu hamu, anso dibaen hamu muse songon na Hubaen i tu hamu.

¹⁶Tutu do na Hudok on tu hamu: Nada gumodang naposo sian morana; jana nada gumodang suruan sian na marsurusa.

¹⁷Saonnari madung diboto hamu na songon i; jadi muda didalankon hamu songon i, martua situtu ma hamu.”

¹⁸“Nada tu hamu sudena na Hudokkon on. Huboto do sanga ise na dung Hupili. Tapi angkon laing tarjadi do sanga aha na tarsurat di Buku Na Badia i; songon on do tarsurat disi, ‘Sanga ise na mangan rap dohot Au, i ma ibana na giot mangalo Au.’

¹⁹Jolo Hupaboa hian do i tu hamu saonnari dompak so tarjadi dope, jadi muda dung tarjadi anso porsaya hamu Au do na nidok ni surat i.

²⁰Tutu do na Hudok on tu hamu: Sanga ise na manjagit suruanKu, na manjagit Au do i. Sanga ise na manjagit Au, Debata na marsuru Au do na nijagitna disi.”

²¹Dung didok Jesus songon i, marsak sajo ma rohaNia di bagasan. Dung i torus torang ma didok Ia, “Tutu do na Hupaboa on tu hamu: Sahalak sian hamu giot manghianati tu Au.”

²²Marsiligian ma angka siseanNia i di bagasan pangkilalaan na so martontu. Nada diboto halahi sanga ise na nidokNia.

²³Tapi adong ma sahalak sisean haholongan ni roha ni Jesus juguk di lambungNia.

²⁴Jadi dihilap si Simon Petrus ma tusia anso disapai ia tu Jesus sanga ise na nidok ni Jesus.

²⁵Dung i dipadonok ia ma tu Jesus laho manyapai ning ia ma, “Ise dehe i, Tuhan?”

²⁶Dialusi Jesus ma, “Sanga tu ise Hulehen roti na Husornomkon on, i ma ibana.” Dung i dibuat Jesus ma roti i, disornomkon Ia ma tu mangkuk i; jadi dilehen Ia ma tu si Judas anak ni si Simon Iskariot.

²⁷Disi dijagit si Judas roti i, manigor susur ma Sibolis i tusia. Dung i didok Jesus ma tusia, “Pasigop ma baen sanga na aha giot baenonmu!”

²⁸Nada adong na umboto sian halahi na juguk mangan disi, sanga hara ni aha umbaen na didok Jesus songon i tu si Judas.

²⁹Adong deba na marpikir, na disuru Jesus do si Judas manobusi na porlu tu pesta i sanga betak na nisuru ni Jesus si Judas mangalehen hepeng saotik tu angka na pogos — harana si Judas do sitiop hepeng kas ni halahi.

³⁰Dung dijagit si Judas roti i, manigor haruar ma ia. Madung borngin hatiha i.

³¹Dung morot si Judas sian i, didok Jesus ma, “Pasangapon ma saonnari Anak Ni Jolma Suruan ni Debata i. Jana nipasangap muse ma Debata markite-hite Ia.

³²Muda dipasangap Debata markite-hite Ia, pasangapon ni Debata muse ma Ia markite-hite diri ni Debata sandiri. Manigor baenon ni Debata ma songon i.

³³Hamu angka dakdanakKu, nada sadia honok nari be Au rap dohot hamu. Jalahanmunu ma Au, tapi songon na dung Hudokkon i tu halak Jahudi, laing songon i ma dohononKu tu hamu: Nada tarbaen hamu ro tu inganan hakeheanKi.

³⁴Jagit hamu ma tona na imbaru on sian Au: Angkon marsihaholongan do hamu sama hamu. Songon pangkaholongingKu di hamu, laing songon i ma angkon marsihaholongan hamu.

³⁵Muda marsihaholongan do hamu, gabe botoon ni halak ma sude, na tutu do anak siseanKu hamu.”

³⁶“O Tuhan, na giot tu dia do Ho Tuhan?” ning si Simon Petrus manyapai Jesus. Didok Jesus ma, “Na giot kehe do Au tu sada inganan, tapi nada tarihutkon ho Au tusi saonnari. Tu pudi on pe ihutkononmu Au.”

³⁷Didok si Petrus ma tuSia, “Biasi nada tarihutkon au Ho saonnari Tuhan? Ra do au mate humopkop Ho Tuhan!”

³⁸Dialusi Jesus ma, “Tutu ma he na ra ho mate humopkop Au? Tutu do na Hudok on tu ho: Painte so martahuak manuk, ma pola tolu noli diporso ho Au!”