Read Batak Angkola JOHANNES 14 Bible Online

JOHANNES 14 - Batak Angkola bible

JOHANNES 14

¹Didok Jesus ma, “Ulang pola marsak rohamunu. Porsaya ma hamu tu Debata jana porsaya ma hamu tu Au.

²Bahat do inganan di bagas ni Damang. Na giot pasingkop ingananmunu do Au kehe tusi. Pola ma Hudok songon i tu hamu, anggo na so tutu do songon i?

³Dung kehe Au pasingkop inganan i di hamu, mulak pe Au anso laing disi muse ma hamu.

⁴Madung diboto hamu do dalan tu inganan na Hutopot i.”

⁵Dung i didok si Tomas ma tu Jesus, “Nada hami boto Tuhan sanga na giot tu dia Ho kehe, sian dia ma hami boto dalan tusi?”

⁶Ninna Jesus ma mangalusi, “Au do dalan i dohot hasintongan dohot hangoluan. Nada adong na tarbaen ro tu Ama i anggo so markite-hite Au.

⁷Sugari ditanda hamu Au, tontu laing tandaonmunu muse[18] ma Damang. Mamungka saonnari madung ditanda hamu Ia, jana madung diida hamu.”

⁸Dung i didok si Pilipus ma tu Jesus, “Patidahon ma Ama i tu hami Tuhan, anso sombu rohanami,” ning Ia.

⁹Tapi dialusi Jesus ma, “Sai honok ma Au dung rap dohot hamu sudena, hape laing na so ditanda ho dope Au Pilipus? Sanga ise na marnida Au, madung diida Ia muse Ama i. Biasi dope didokkon ho, ‘Patuduhon ma tu hami Ama i’?

¹⁰O, ale Pilipus! Adong he laing na so porsaya do ho na sada do Au dohot Ama i jana Ama i sada dohot Au? Sudena na Hudok on tu ho nada sian roha-rohangKu sandiri i. Damang na sai maringanan di bagasan Au, Ia do na mangkarejohon i sudena.

¹¹Porsaya ma hamu di Au, na sada do Au dohot Ama i, jana Ama i dohot Au. Tapi porsaya ma hamu tu Au hara ni sude angka parkarejoan i.

¹²Hudok ma tu ho: Satutuna sanga ise na porsaya tu Au, tarbaen ia ma mangkarejohon angka karejo songon na Hupambaeni i, salang na gumodang sian i pe tarbaensa — angke na kehe mandapotkon Ama i do Au.

¹³Jana sanga aha pe na nipangidomunu di bagasan goarKu, baenonKu ma i di hamu, anso nipasangap Ama i markite-hite Anak i.

¹⁴Pangido hamu ma sanga aha sajo markite-hite goarKu; Hupatulus pe i di hamu.”

¹⁵“Muda holong rohamunu tu Au, dalankononmunu do angka na Huparentahon.

¹⁶Dung i Hupangido pe tu Ama i, anso dilehen Ia Pangurupi na asing di hamu, na tinggal rap dohot hamu salolot-lolotna,

¹⁷i ma Tondi ni hasintongan. Nada tarjagit portibi on Tondi i, angke nada diida portibi on Ia jana nada ditanda halahi muse. Tapi anggo hamu, ditanda hamu do Tondi i angke rap dohot hamu do Ia tongtong mangolu, jana di bagasan hamu muse do Ia.

¹⁸Nada pola padiaronKu hamu mardangol-dangol. Mulak do Au mandapotkon hamu.

¹⁹Nada sadia honok nari, nada idaon ni portibi on be Au, tapi anggo hamu laing idaonmunu do Au; jana dibaen na mangolu do Au, hamu pe laing mangolu.

²⁰Di hatiha i tangkas ma botoonmunu, na di bagasan Damang do Au, hamu pe di bagasan Au jana Au di bagasan hamu.

²¹Sanga ise na manjagit angka parentangKi jana na mangoloisa, i ma na mangkaholongi Au. Haholongan ni Damang ma sanga ise na mangkaholongi Au. Au pe laing haholonganKu ma halahi, jana patidahononKu ma tu halahi sanga ise Au.”

²²Disapai si Judas (tapi nada si Judas Iskariot) ma Jesus, “O Tuhan! Biasi ma hum tu hami dipatangkas Ho diriMu Tuhan, hape tu portibi on nada?”

²³Ninna Jesus ma mangalusi, “Sanga ise na mangkaholongi Au, ihutkononna do angka pangajaranKu. Haholongan ni Damang ma Ia. Ro ma Damang dohot Au sandiri mandapotkon ia jana maringanan ma Hami rap dohot ia.

²⁴Sanga ise na so mangkaholongi Au nada ihutkonon ni i angka pangajaranKu. Angka pangajaran na nibegemunu i, nada pangajaranKu i. Tapi pangajaran ni na marsuru Au do i, i ma Damang.

²⁵Sudena i Hupaboa tu hamu salolot rap dope Au dohot hamu.

²⁶Tapi Tondi Parbadia i ma na mangajarkon sasudena i tu hamu. Ia do Pangurupi na giot suruhonon ni Ama i markite-hite goarKu. Pangurupi i ma paingotkon tu hamu sasudena na dung Hupaboa i tu hamu.

²⁷Hasonangan do Hutadingkon di hamu. Hasonangan na sian Au sandiri do na Hulehen tu hamu. Nada songon pangalehen ni portibi on anggo pangalehenKu hasonangan i tu hamu. Ulang pola susa rohamunu; ulang hamu mabiar.

²⁸Ma dibege hamu Hudok, ‘Kehe ma Au, tapi ro do Au mandapotkon hamu mangulahi’. Anggo na holong do rohamunu tu Au, jop do rohamunu di na kehe Au tu Ama i, angke gumodang do Ama i sian Au.

²⁹Jolo Hupaboa hian do i sudena tu hamu dompak so tarjadi dope, anso porsaya hamu muda dung tarjadi i muse.

³⁰Nada pola bahat be Au mandok hata tu hamu angke madung ro raja ni portibi on. Tapi nada markuaso i tu Au.

³¹Tapi anso diboto portibi on na holong do rohangKu mida Ama i, i do umbaen na Hukarejohon sandok na nisuruhon ni Ama i karejohononKu. I pe, beta ma hita kehe sian on.”