Read Batak Angkola JOHANNES 16 Bible Online

JOHANNES 16 - Batak Angkola bible

JOHANNES 16

¹“Hupaboa pe i sudena tu hamu, anso ulang gabe mardandi do hamu.

²Paruaron ni halahi ma hamu sian angka bagas paribadatan. Olo, na ro do hatihana, sanga ise na mamunu hamu, diambang ia na dung mangoloi Debata ma ia, hara ni na dung dibunu ia hamu.

³Dibaen halahi pe songon i tu hamu, hara ni na so ditanda halahi dope Damang dohot Au.

⁴Tapi madung Hupaboa hian i saonnari tu hamu anso diingot hamu i saulahon muda dung dibaen halahi tu hamu na songon i, madung Hupaboa hian do i tu hamu.” “Anggo sian mulana nada pola Hupaboa hian i tu hamu, angke rap dope Au dohot hamu.

⁵Tapi anggo saonnari, kehe noma Au mandapotkon na marsuru Au; hape haru songon i, umpe sahalak sian hamu na manyapai, ‘Giot tu dia de Ho kehe?’

⁶Mur hancit muse noma rohamunu dung Hupaboa na songon i tu hamu.

⁷Torus torang ma Hupaboa tu hamu: Maruntungan do hamu muda kehe Au; harana anggo so kehe Au, nada tulus ro Pangurupi i tu hamu. Tapi muda kehe Au, suruhononKu ma Ia ro tu hamu.

⁸Jana muda dung ro Ia, pabotohononNia ma tu portibi on arti ni dosa na satutuna, arti ni hatigoran dohot arti ni panguhuman.

⁹PabotohononNia ma bahaso dosa do muda laing so porsaya halahi tu Au,

¹⁰hara ni hatigoran jana hara ni na kehe Au mandapotkon Damang, jana nada idaonmunu be Au;

¹¹madung manguhumi Debata, dibaen madung hona uhum parkuaso ni portibi on!

¹²Bahat dope nian na giot dokkononKu tu hamu, tapi anggo saonnari nada tuk dope gogomunu laho manjagit i.

¹³Tapi muda dung ro Tondi ni hasintongan i pabotohonNia ma hatutuan salaho tu Debata, Ia ma na manguluhon hamu laho mananda sude hatutuan. Nada dohononNia sanga aha sian roha-rohaNia sandiri; hum taringot tu na nibegeNia do hatahononNia. Jana paboaonNia ma tu hamu sanga angka aha na giot masa tu pudian ni ari.

¹⁴PasangaponNia ma Au, angke sanga aha na nipalaluNia tu hamu, sian Au do i dijagit Ia tu hamu.

¹⁵Au do nampuna sasude na adong di Ama i. I do umbaen na Hudok, sanga aha na nipasahat ni Tondi i tu hamu, sian Au do i dijagit Ia.”

¹⁶“Hum santongkin nari noma, nada idaonmunu be Au, tapi santongkin nari muse, idaonmunu ma Au.”

¹⁷Dung i marsisapa-sapaan ma deba angka sisean ni Jesus i, ninna halahi ma, “Aha dehe astuan ni i sudena? Didok Ia, ‘Santongkin nari noma nada idaonmunu be Au, jana santongkin nari idaonmunu ma Au.’ Didok muse dope, ‘Harana kehe ma Au mandapotkon Damang.’

¹⁸Aha do maksudNia mandok ‘Santongkin nari’? Nada binoto sanga taringot tu aha na nidokNia!”

¹⁹Mangarti do Jesus na giot manyapai halahi tuSia. Jadi ning Ia ma tu halahi, “Hara ni na Hudok i, ‘Hum santongkin nari noma nada idaonmunu be Au, tapi santongkin nari muse idaonmunu ma Au.’ I dehe na giot sapaanmunu?

²⁰Hudok ma tu hamu: Satutuna martangisan ma hamu jana mangandungi; tapi jop ma roha ni portibi on. Susa ma rohamunu tapi gabe muba ma hasusaanmunu i gabe hajojop ni roha.

²¹Muda giot sorang anak ni sada ina, marsak ma rohania hara ni na dung dapot hatihana manaon na hancit ia. Tapi disi sorang dakdanak i, manigor lupa ma ina i di na hancit i; marjop ni roha ma ia angke madung sorang sada dakdanak tu tano on.

²²Laing songon i ma hamu: Susa ma rohamunu saonnari, tapi marsuo dope Au dohot hamu, gabe jop ma rohamunu; jana nada tarbuat sanga ise hajopjop ni roha i sian hamu.

²³Anggo di ari i, nada sapaanmunu be sanga aha tu Au. Tutu do na Hudok on tu hamu; sanga aha na nipangidomunu sian Ama i markite-hite goarKu lehenon ni Damang ma i di hamu.

²⁴Lopus tu hatiha on na so unjung dope dipangido hamu sanga na aha markite-hite goarKu. Torus ma pangido hamu, gabe manjagit ma hamu, anso sanggam jop ni rohamunu.”

²⁵“Markite-hite umpama do sudena i Hupatorang tu hamu. Tapi ro do hatihana, nada pola marumpama be Au muda mandok hata tu hamu. Torus tangkas noma dokkononKu tu hamu taringot tu Ama i.

²⁶Anggo disi, pangidoonmunu ma tu Ama i markite-hite goarKu; jana nada Hudok na giot pangidoonKu tu Ama i di hamu,

²⁷harana Ama i sandiri pe holong do rohaNia tu hamu. Holong do rohaNia mida hamu, dibaen holong rohamunu tu Au, jana dihaporsayai hamu na sian Debata do Au ro.

²⁸Tutu do i na ro sian Ama i do Au, jana madung Hudapotkon portibi on. Tapi saonnari, tadingkononKu ma mangulahi portibi on, mulak ma Au tu Damang.”

²⁹Dung i didok angka siseanNia i ma tu Jesus, “Saonnari madung marsitangkas Ho Tuhan mandok hata; nada be marumpama Ho.

³⁰Saonnari madung tangkas di hami, diboto Ho do sasudena; jana nada porlu be sapaan ni halak sanga na aha tu Ho. Jadi hara ni i, porsaya ma hami na sian Debata do haroroMu.”

³¹“Saonnari madung porsaya dehe hamu?” ninna Jesus tu halahi.

³²“Ligi hamu ma: Ro ma hatihana, jana tardok madung lalu i, paserahon ma hamu. Marmulahan be ma hamu tu bagasmunu jana tinggalkononmunu ma sada Au. Hape nada mamunjung Au, angke rap do Ama i dohot Au.

³³Hudok pe i sudena anso marhasonangan do hamu harana di bagasan Au do hamu. Marhancit ma hamu baenon ni portibi on. Tapi sobar ma hamu! Madung Hutaluhon portibi on!”