Read Batak Angkola JOHANNES 17 Bible Online

JOHANNES 17 - Batak Angkola bible

JOHANNES 17

¹Dung sidung didok Ia songon i, manatap ma Jesus tu langit, ning Ia ma, “O ale Amang, saonnari madung dapot hatihana. Pasangap ma AnakMu anso dipasangap AnakMi muse Ho Amang.

²Madung dilehen Damang tu Anak i kuaso mangarajai sude jolma manusia anso dilehen Anak i hangoluan na so mantak tu sudena halak na nipasahat ni Damang tuSia.

³On ma hangoluan na so mantak; anso ditanda halak Ama i, sasada Ia do Debata na tutu, jana mananda Jesus Kristus na nisuruhon ni Ama i.

⁴Madung Hupasangap Ama i di ginjang tano on; jana madung Hupasidung karejo na nisuru ni Ama i karejohononKu.

⁵Amang! Pasangap ma Au saonnari markite-hite hasangapan na Hujagit rap dohot Ho dompak so dijadihon dope portibi on.

⁶Madung Hupatorang Ho Amang tu angka jolma na sian portibi on, i ma na dung nipasahatMu tu Au. Ho do Amang nampuna halahi; jana madung dipasahat Ho halahi tu Au. Madung diihutkon halahi hata na nilehenMi.

⁷Jana saonnari madung diboto halahi, sudena na nilehenMi tu Au, laing Damang do nampuna i.

⁸Madung Hupalalu tu halahi barita na nilehen ni Damang i tu Au; jana madung dijagit halahi i. Madung tangkas sajo di halahi, Damang do na marsuru Au.

⁹Hara ni halahi do umbaen na martangiang Au. Nada Hutangiangkon anggo portibi on; hum tu angka jolma na nipasahat ni Damang i tu Au do na Hutangiangkon; harana Damang do nampuna halahi.

¹⁰Sude na adong di Au laing Damang do nampuna i; jana sude sinadongan ni Damang laing Au do nampuna i. Markite-hite halahi do Au dipasangap.

¹¹Saonnari ro ma Au mandapotkon Damang. Nada be di portibi on Au; tapi anggo halahi laing di portibi on dope. Ale Amang na badia! Jagohon ma halahi dohot kuasoMi — i ma kuaso na nilehen ni Damang i tu Au[19] — anso gabe sada halahi songon Damang na sada dohot Au.

¹²Salolot rap Au dohot halahi di portibi on, madung Hujagohon halahi markite-hite kuaso ni Damang i — i ma kuaso na nilehen ni Damang i tu Au. Madung Huondingi halahi na nipasahat ni Damang tu Au, jana umpe sada sian halahi na mago, asing ni anak mago i; anso laing tulus ma na tarsurat di Buku Na Badia i.

¹³Saonnari ro ma Au mandapotkon Damang. Jadi taran di portibi on Au, Hubaritahon angka na songon i; anso tarkilala situtu hajojop ni rohangKu di bagasan roha ni halahi.

¹⁴Madung Hupalalu tu halahi pangajaran ni Damang jana dihosom portibi on do halahi, angke nada portibi on nampuna halahi; laing sarupa ma i tu Au na so nampuna ni portibi on.

¹⁵Nada Hupangido anso diparuar Damang halahi sian portibi on tapi on do na Hupangido, anso dijagohon Damang halahi maradopkon si Jahat i.

¹⁶Nada portibi on nampuna Au, laing songon i dohot halahi; nada portibi on nampuna halahi.

¹⁷Markite-hite hasintongan ni Damang, baen ma halahi gabe angka jolma hapunjungan ni Damang sandiri; hata na nidok ni Damang i do hasintongan i.

¹⁸Madung disuru Damang Au tu portibi on, laing songon i muse madung Husuru halahi tu portibi on.

¹⁹Hupasahat do diringKu tu Damang laho humopkop halahi, anso halahi pe gabe nampuna ni Damang di bagasan hasintongan.

²⁰Nada hum hara ni halahi sajo umbaen na martangiang Au. Laing Hutangiangkon muse do angka halak na giot porsaya tu Au hara ni hasaksian ni halahi on.

²¹Hupangido tu Damang anso gabe sada halahi sude, songon Damang na sada dohot Au jana Au sada muse dohot Damang. Sai sada ma nian halahi dohot Hita anso porsaya portibi on na nisuru ni Damang do Au.

²²Madung Hupasangap halahi mardongan hasangapan na nilehen ni Damang i di Au, anso gabe sada halahi hara ni i, laing songon parsada ni Damang dohot Au;

²³sada Au dohot halahi jana sada Damang dohot Au; anso sada situtu halahi jana hara ni i botoon ni portibi on ma Damang do marsuru Au jana dihaholongi Damang do halahi songon panghaholongi ni Damang tu Au.

²⁴Madung dipasahat Damang halahi tu Au. Saonnari Hupangidohon ma tu Damang anso rap dohot Au halahi sanga di dia pe Au maringanan, anso diida halahi hasangapanKi, i ma hasangapan ni Damang na nilehenMi tu Au, angke na holong do roha ni Damang tu Au mamungka sian dompak so dijadihon dope portibi on.

²⁵Ale Amang na tigor roha! Nada ditanda portibi on Ho, tapi anggo Au Hutanda do Damang, jana halak on pe diboto halahi do, Damang do na marsuru Au.

²⁶Madung Hupabotohon Damang tu halahi; jana sai pupuonKu do mambaen songon i, anso laing dihilala halahi muse holong ni roha ni Damang tu Au jana Au pe sada ma dohot halahi.”