Read Batak Angkola JOHANNES 18 Bible Online

JOHANNES 18 - Batak Angkola bible

JOHANNES 18

¹Jadi dung sidung didok Jesus songon i, kehe ma Ia rap dohot angka siseanNia i tu ipar ni Batang aek Kidron. Adong do disi sada kobun, jana masuk ma Jesus tu kobun i dohot angka siseanNia i.

²Diboto si Judas panjehe i do inganan i; dibaen madung jotjot Jesus marlagut disi rap dohot angka siseanNia i.

³Dung i ro ma si Judas tu inganan i, dioban ia ma saparangan tentara dohot angka panjago ni Bagas Ni Debata na nisuru ni angka sintua ni malim dohot halak Parise. Maroban sinjata do halahi, lampu dohot sulu.

⁴Madung diboto Jesus hian sanga aha na giot masa tuSia. Dung i didapotkon Jesus ma angka jolma na ro i, ning Ia ma, “Ise dehe na nijalahanmunu?”

⁵Dialusi halahi ma, “Jesus halak Nasaret i.” “Au do i,” ninna Jesus tu halahi. Laing disi do jongjong si Judas panjehe i rap dohot halahi.

⁶Di na nidok ni Jesus tu halahi, “Au do i,” sumurut ma halahi sude gabe martinggangan tu tano i.

⁷Dung i disapai Jesus ma halahi sanoli nari, “Ise na nijalahanmunu?” ning Ia. “Jesus halak Nasaret i,” ning halahi mangalusi.

⁸Didok Jesus ma, “Madung Hudok Au do i. Jadi muda Au do na nijalahanmunu, padiar hamu ma anggo songon i kehe na asing on.” (

⁹Di na nidokNia songon i, tulus ma tarjadi na nidokNia hian; songon on, “Ale Amang, sian sude na nipasahat ni Damang i tu Au, umpe sahalak na gabe mago.”)

¹⁰Jadi ro ma si Simon Petrus na maniop podang hatiha i, disintak ia ma podangnia i ditampul ia ma naposo ni Malim Godang i, lopus ramping pinggol siamunna i. Si Malkus do goar ni bayo i.

¹¹Didok Jesus ma tu si Petrus, “Sarungkon ma podangmi, nada he angkon inumonKu do panginuman parkancitan na nilehen ni Damang i tu Au?”

¹²Dung i ro ma angka parajurit i dohot komandanna i songon i dohot angka Jahudi panjago i, ditangkup halahi ma Jesus jana ditambat.

¹³Jadi dioban halahi ma Ia parjolo tu si Hanas, i ma tulang ni si Kayafas. Si Kayafas, i ma Malim Godang di na sataon i.

¹⁴Jana ia do paingotkon halak Jahudi i, na dumenggan do mate sada halak manghopkop rayat sudena, ulang pado masarsar sude bangso i.

¹⁵Diihutkon si Simon Petrus rap dohot sada halak sisean na sada nari ma Jesus. Ditanda Malim Godang i do anggo sisean na sada nari i; jadi diihutkon ia ma Jesus masuk tu alaman ni bagas ni Malim Godang i,

¹⁶tapi anggo si Petrus diruar do ia paintehon di pintu i. Dung i haruar ma sisean na sada nari i, i ma na nitanda ni Malim Godang i, mangkatai ma ia dohot naposo dadaboru na manjago di pintu i, lalu dioban ia ma si Petrus masuk tu bagasan.

¹⁷Didok naposo dadaboru sijago pintu i ma tu si Petrus, “Nada he dohot ho sahalak sian angka sisean ni Bayo i?” “Nada,” ning si Petrus.

¹⁸Ngali do ari hatiha i, jadi dipagara angka naposo i ma dohot angka panjago i api, marsisudu ma halahi humaliang api i. Laing dohot do si Petrus disi marsisudu rap dohot halahi humaliang api i.

¹⁹Disapai Malim Godang i ma Jesus taringot tu angka siseanNia i dohot taringot tu pangajaranNia.

²⁰Ninna Jesus ma mangalusi, “Tangkas do Au mandok hata di jolo ni halak na bahat. Sai mangajari do Au di angka bagas paribadatan dohot di Bagas Ni Debata di inganan ni halak Jahudi na somal marlagut. Nada unjung Hudokkon sanga aha di na buni.

²¹Biasi disapai tuan i Au? Tu halak na dung umbege Au mangajari ma sapai hamu. Sapai ma halahi sanga aha na Hudok tu halahi — diboto halahi do i.”

²²Dung didokkon Jesus songon i, ro ma sada halak panjago i manampeleng Ia didok ma tuSia, “Na puluk ma Ho mangkatai songon i tu Malim Godang i!”

²³Dialusi Jesus ma, “Muda adong Hudokkon na sala, paboa ma jolo antong dison sanga aha hasalaanKi! Tapi muda tutu do na Hudokkon i, biasi manampelengi ho tu Au?”

²⁴Dung i disuru si Hanas ma dioban Jesus tu Malim Godang Kayafas laing tartambat.

²⁵Anggo si Petrus laing disi dope ia jongjong marsisudu. Didokkon halak ma tusia, “Nada he laing dohot ho sahalak sian angka sisean ni bayo i?” Tapi diporso si Petrus ma. Didok ia, “Nada le!”

²⁶Sahalak sian angka naposo ni Malim Godang i, i ma sisolkot ni bayo na hona tampul ni si Petrus pinggolna i, mandok tu si Petrus, “Nada he ho na huida i di kobun i rap dohot Ia?”

²⁷Dung i didok si Petrus ma mangulahi, “Nada,” — jana manigor martahuak ma manuk disi.

²⁸Dung i dioban halahi ma Jesus sian bagas ni si Kayafas tu inganan ni gubernur. Manyogot dope hatiha i. Anggo halak Jahudi i sandiri nada pola masuk tu bagasan inganan i, anso ulang gabe ramun halahi mangihutkon ugamo, hara ni na giot dohot halahi mangankon sipanganon Paskah.

²⁹Jadi si Latus do haruar mandapotkon halahi laho manyapai, “Aha do pangaduanmunu taringot tu bayo on?” ning ia.

³⁰Dialusi halahi ma, “Nada pola hami oban Ia tu Gubernur i anggo hara ni na so marsala.”

³¹Didok si Latus ma tu halahi, “Hamu ma mamaresoSa dohot mamutuskon uhuman mangihutkon tona ni ugamomunu sandiri!” Tapi dialusi halak Jahudi i ma, “Nada tola bunuonnami sanga ise.” (

³²Tarjadi pe songon on anso tulus do hata na nidok ni Jesus taringot tu pangalaho ni parmateNia.)

³³Masuk ma si Latus mangulahi tu bagasan mamiohon Jesus. Dung i disapai ia ma Jesus ning ia ma, “Adong he Raja Ni halak Jahudi Ho?”

³⁴Dialusi Jesus ma, “Sapa-sapamu sandiri dehe i sanga adong halak na asing paboahon tu ho taringot tu Au?”

³⁵Dialusi si Latus ma, “Halak Jahudi dehe au lakna? BangsoMi sandiri dohot angka sintua ni malim i do na pasahatkon Ho tu au. Aha do lakna na nibaenMu?”

³⁶Ninna Jesus ma mangalusi, “Anggo HarajaanKu nada harajaan portibi on. Sugari na sian portibi on HarajaanKi, aloon ni angka halakKu ma anso ulang jabat nipasahat Au tu halak Jahudi. Tapi nada sian portibi on anggo HarajaanKu!”

³⁷Dung i marsapa ma si Latus tuSia, “Antong anggo songon i, tutu do Ho raja?” Dialusi Jesus ma, “Tutu do Au raja, songon na nidokmi. Sorang pe Au jana ro tu portibi on hum na sada on sajo do maksudna, i ma laho manyaksihon hasintongan. Jana sanga ise na marasal sian hasintongan i dijagit ia do Au.”

³⁸Disapai si Latus ma Ia, “Aha dehe arti ni hasintongan?” Dung i marlojong ma si Latus kehe tu ruar mandapotkon halak Jahudi i, didok ia ma tu halahi, “Sada pe nada adong dapot au hasalaanNia.

³⁹Tapi mangihutkon na somal, sai hupalua do sada halak na tarhurung ganop Pesta Paskah. Ra do hamu muda hupalua di hamu Raja Ni halak Jahudi on?”

⁴⁰Dialusi halahi ma marsurak-surak, “Nada! Indangkon sai palua i! Si Barabbas ma palua!” Panyamun do si Barabbas on.