Read Batak Angkola JOHANNES 19 Bible Online

JOHANNES 19 - Batak Angkola bible

JOHANNES 19

¹Dung i ditogu si Latus ma Jesus, jana diloncingi ma Ia.

²Dibaen angka tentara na disi i ma sada tuku sian angka ranting na marduri-duri. Dipamasuk halahi ma tuku i tu ginjang ni ulu ni Jesus. Dung i dipamasuk halahi ma baju juba na ungu tuSia,

³lalu marroan ma halahi tu joloNia ninna halahi ma, “Horas ma di Raja i, Raja Ni halak Jahudi!” Dung i ditampeleng halahi ma Ia.

⁴Dung i haruar ma si Latus sanoli nari, didok ia ma tu halak na bahat i, “Ligi hamu ma! Madung huoban Ia saonnari tu ruar anso diboto hamu na so adong dapot au hasalaanNia bagi aha pe.”

⁵Dung i haruar ma Jesus mamake tuku duri dohot baju juba na ungu i. Didok si Latus ma tu halahi, “Ligi hamu ma halak on!”

⁶Dung diida angka kapala ni malim dohot angka panjago i Jesus, marsurak ma halahi, “Parsilangkon i! Parsilangkon i!” ning halahi. Ninna si Latus ma mandok halahi, “Hamu ma mambuat dohot mamparsilangkonsa. Anggo au nada adong dapot au bagi na aha salaNia.”

⁷Dialusi halak Jahudi i ma, “Mangihutkon tona na adong di hami simatehononkon do i, angke dioku Ia diriNia Anak Ni Debata.”

⁸Jadi dung dibege si Latus songon i pandok ni halahi, mur mabiar ma ia.

⁹Masuk ma ia mangulahi tu bagasan inganan i, disapai ia ma tu Jesus, “Sian dia dehe asalMu?” Tapi nada dialusi Jesus bagi aha.

¹⁰Jadi didok si Latus ma manyapai Ia, “Na so ra do Ho mangalusi au? Na so diboto Ho do lakna na markuaso do au paluahon Ho sanga mamparsilangkon Ho?”

¹¹Dialusi Jesus ma, “Anggo na so dilehen Debata do kuaso di ho, nada adong kuasomu tu Au. Hara ni i gumodang do dosa ni na pasahatkon Au tu ho ulang pado ho.”

¹²Dung dibege si Latus na songon i mur diakalkon ia ma palua Jesus. Tapi marsurak-surak ma halak Jahudi i, “Muda dipalua tuan i do i, na so dongan ni Kesar do tuan i! Sanga ise na mandok diriNa raja, alo ni Kesar do i!”

¹³Disi dibege si Latus angka pandohan i, dioban ia ma Jesus tu ruar jana juguk ma ia di juguhan paruhuman di inganan na margoar Litostrotos (astuanna: pantar batu; di hata Ibrani digoari do i Gabbata).

¹⁴Hira-hira pukul dua bolas ma hatiha i, jana andospotangna i mamungka ma etongon Ari Sabat. Didok si Latus ma tu halak Jahudi i, “Na ma, indon rajamunu on!”

¹⁵Marsurak-surak ma halahi, ninna halahi, “Bunu ma i! Bunu ma! Parsilangkon i!” Dung i ninna si Latus ma mandok tu halahi, “Parsilangkononku ma he Rajamunu?” Dialusi angka kapala ni malim i ma, “Hum sasada Kesar i do rajanami!”

¹⁶Dung i dipasahat si Latus ma Jesus tu halahi anso dipakuhon tu hayu parsilang i. Dijagit halahi ma Jesus jana dioban halahi.

¹⁷Kehe ma Jesus, diporsan Ia sandiri ma hayu parsilangNia tu inganan na margoar “Partangkurahan”. (Di saro Ibrani didok Golgota.)

¹⁸Dipakuhon ma Ia disi tu hayu parsilang i. Diparsilangkon muse do dua halak nari na asing rap dohot Ia, sahalak di siambirang, sahalak nari di siamunNia, di tonga-tonga ma Jesus.

¹⁹Di hayu parsilang ni Jesus, disuru si Latus ma dibaen surat songon on, “Jesus na sian Nasaret Raja Ni halak Jahudi.”

²⁰Bahat ma halak na manyise suratna i, harana nada pola sadia dao inganan i sian kota. Disuratkon di hata Ibrani, hata Latin dohot hata Junani do dibaen suratna i.

²¹Didok angka sintua ni malim ni halak Jahudi i ma tu si Latus, “Ulang ma suratkon ‘Raja Ni halak Jahudi,’ songon on ma suratkon disi, ‘Didok Bayo on, Au do Raja Ni halak Jahudi.’ ”

²²Tapi ninna si Latus ma mangalusi, “Nada uba-ubaon be sanga aha na dung husuratkon i!”

²³Dung diparsilangkon angka tentara i Jesus, dibuat halahi ma pakeanNa i. Dibagi opat halahi ma i, sabagian be ma sada halak. Dibuat halahi muse ma baju jubaNia i. Nada adong panjaitan ni baju jubaNia i — na ditonun do i sian ginjang lalu tu toru.

²⁴Dung i didok angka tentara i ma sama halahi, “Ulang pola tabagi anggo on. Taundi ma manontuhon sanga ise na mandapot on.” Anso laing tulus ma tarjadi na tarsurat di Buku Na Badia i na mandok songon on, “Dibagi-bagi halahi ma pakeanKu. Jana diundi halahi ma laho manontuhon bajungKu.” I ma na dung nipatulus ni angka tentara i.

²⁵Jongjong ma di lambung ni parsilang ni Jesus i, inangNia, bujingNia, si Maria dadaboru ni si Klopas dohot si Maria Magdalena.

²⁶Diligi Ia ma tu inangNia dohot sisean na nihaholongan ni Jesus na jongjong disi. Dung i didok Jesus ma tu inangNia i, “Ligi ma inang, anakmu do indon.”

²⁷Dung i didok Jesus ma tu siseanNia i, “Ligi ma, inangmu do indon!” Mamungka sian i dioban sisean i ma inang ni Jesus tinggal di bagasnia sandiri.

²⁸Dung i diboto Jesus ma na dung sidung sasudena; jadi songon na tarsurat di Buku Na Badia i angkon laing tulus do i, gabe didok Ia ma, “Manguas Au.”

²⁹Adong disi sada mangkuk na bubung marisi anggur na mancom. Dironjomkon halahi ma lumut tu bagasan anggur i dibaen halahi ma tu ujung ni bulu. Dung i didaiskon halahi ma lumut i tu pamangan ni Jesus.

³⁰Diincop Jesus ma anggur i, dung i ning Ia ma, “Madung marujung!” Jadi dipaunduk Ia ma uluNia, tos ma hosaNia.

³¹Ari Jumahat do hatiha i, i ma ari parhobasan tu Ari Pesta Paskah i. Nada tola di halak Jahudi laing gantung bangke ni halak na niparsilangkon di hayu parsilang di Ari Sabat. Tarlobi Ari Sabat na gumodang do Ari Sabat on. Jadi hara ni i dipangido halak Jahudi i ma tu si Latus anso niponggolan holi-holi ni pat ni angka na diparsilangkon i anso nipaijur bangke ni halahi sian hayu parsilang i.

³²Jadi kehe ma angka tentara i mamonggoli pat ni na parjolo i, dung i pat ni na sada nari na niparsilangkon rap dohot Jesus.

³³Tapi dung lalu halahi tu lambung ni Jesus, diida halahi ma, hape ma mate Jesus. Jadi nada pola diponggol halahi be patNa i.

³⁴Tapi ro ma sada tentara i, disusukkon ia ma hujur tu rusuk ni Jesus; manigor haruar ma mudar na marcampur aek sian rusukNa i.

³⁵Na marnida i sandiri do mamaritahon na masa on, anso laing porsaya[20] hamu. Jana tutu do songon on na nidoknia i; tangkas do diboto ia songon i.

³⁶Umbaen na songon i pe i, anso laing tulus do tarjadi na tarsurat di Buku Na Badia i, i ma, “Umpe sada sian holi-holiNa i na niponggol.”

³⁷Di Buku Na Badia i pe laing tarsurat do songon on, “Tatapon ni halak ma Ia, na nihujur ni halahi i.”

³⁸Dung i ro ma si Josep halak Arimatea mangido isin tu si Latus laho mambuat bangke ni Jesus. (Na dung gabe sisean ni Jesus do si Josep on di na buni, harana laing mabiar dope ia mida angka parkuaso ni halak Jahudi i.) Dilehen si Latus ma tusia isin, jadi kehe ma ia mambuat bangke i.

³⁹Dohot do si Nikodemus, i ma na ro borngin-borngin nabaruon mandapotkon Jesus, rap dohot si Josep. Dioban si Nikodemus ma angka ramu-ramuan mur dohot aloe marborat-borat tolu pulu kilo.

⁴⁰Dibuat halahi na dua ma bangke ni Jesus, dibaen halahi ma kopenna dohot angka ramu-ramuan i songon na nihasomalkon ni halak Jahudi laho mananom na mate.

⁴¹Adong do di lambung inganan ni hayu panyilangan ni Jesus i sada kobun. Adong do sada kuburan na imbaru na so jungada dope marpake gabe pananoman ni halak.

⁴²Gabe tusi ma dipamasuk halahi bangke ni Jesus hara ni na giot dapot ma Ari Sabat, boti hara ni donokna.