Read Batak Angkola JOHANNES 3 Bible Online

JOHANNES 3 - Batak Angkola bible

JOHANNES 3

¹Adong ma sada halak Parise na margoar si Nikodemus pamimpin ni halak Jahudi.

²Di sada borngin ro ma ia mandapotkon Jesus jana didok ia ma, “Gurunami, hami boto do Guru na nisuruhon ni Debata ho. Angke nada adong halak na bisa mambaen angka hahomangan songon na nibaenMi, anggo so didongani Debata do ia.”

³Dialusi Jesus ma, “Tutu do na Hudok on: Nada tarbaen sanga ise pe gabe anggota ni Harajaan Ni Debata, anggo so jolo sorang ia mangulahi.”[4]

⁴Didok si Nikodemus ma tu Jesus, “Bia ma he parjadina halak na dung magodang sorang mangulahi? Tarbaen dope lakna masuk mangulahi tu bortian ni inangna anso ditubuhon mangulahi?”

⁵Dialusi Jesus ma, “Tutu do na Hudok tu ho: Anggo so sorang halak sian aek dohot sian Tondi, nada tarbaen gabe parsidohot di Harajaan Ni Debata.

⁶Dibaen sibuk do na tubu sian sibuk, jana tondi do na tubu sian Tondi.

⁷Ulang homang rohamu muda Hudok: Angkon ditubuhon hamu sude mangulahi.

⁸Na mangombus do alogo sanga na tudia giotnia; tabege do nian husasakna, tapi nada taboto sanga sian dia harorona jana tu dia kehena. Songon i muse ma halak na nitubuhon ni Tondi i.”

⁹“Tarbia ma parjadi ni i?” ning si Nikodemus manyapai.

¹⁰Dialusi Jesus ma, “Guru ni halak Israel ma ho, hape hum i pe so diboto ho?

¹¹Tutu do na Hudok di ho: Na hami boto do na hami hatahon, jana na hami ida do na hami patorang; hape nada ra hamu manjagit na hami dok.

¹²So ra hamu porsaya tu Au muda Hupaboa tu hamu taringot tu angka na di tano on; tarbia muse be pambaenna hamu porsaya tu Au muda Hupaboa tu hamu taringot tu na di banua ginjang?

¹³So na adong sahalak pe na jungada manaek tu banua ginjang, tapi anggo sian banua ginjang madung adong Sahalak na mijur tu tano on, i ma Anak Ni Jolma i.”

¹⁴“Songon ulok tumbaga na nipatuginjang ni si Musa di sada hayu di halongonan i, laing songon i muse ma Anak Ni Jolma i angkon dipatuginjang,

¹⁵anso sude halak na porsaya tuSia tarbaen maruli ngolu na manongtong.

¹⁶Angke songon i ma holong ni roha ni Debata di portibi on jabat dilehen Ia AnakNia na sasada i anso sude halak na porsaya tuSia nada mago, tapi maruli di ngolu na manongtong.

¹⁷Harana nada anso manguhumi portibi on umbaen na nitongos ni Debata AnakNia i tu tano on, tapi anso gabe Sipalua ni portibi on do.”

¹⁸“Sanga ise na porsaya tuSia nada be uhuman ni Debata di adopan ni paruhuman. Tapi anggo na so porsaya madung ditoru ni uhuman ni Debata, hara ni na so porsaya ia tu Anak Ni Debata Na Sasada i.

¹⁹Tapi on do panguhuman i: Madung ro hatorangan i tu tano on, tapi humolongan do roha ni jolma i tu hagolapan ulang pado hatorangan i, harana jahat do pangalaho ni halahi.

²⁰Sude halak sibaen na jahat magigi do i tu na torang; nada ra ia ro tu na torang, angke nada jop rohania haidaan pangalahonia na jahat i.

²¹Tapi anggo halak na mangkarejohon hasintongan, ro do ia tu na torang i; anso tarida angka pambaenna i, angke madung dibaen i markite-hite Debata.”

²²Dung i kehe ma Jesus dohot angka siseanNia tu Luat Judea. Disi ma halahi sangombas jana mandidihon do halahi disi.

²³Hatiha i nada tarhurung dope si Johannes Pandidi. Di Ainon do ia mandidihon, nada sadia dao i sian Salim, harana bahat do disi aek. Marroan ma halak mandapotkon ia jana dipandidihon ia ma halahi.

²⁵Jadi adong ma deba sian sisean ni si Johannes i na martongkar dohot halak Jahudi[5] taringot tu aturan haiason mangihutkon ugamo Jahudi.

²⁶Didapotkon halahi ma si Johannes jana disapai halahi ma, “Rabbi, jolma na rap dohot ho, na di ipar ni Batang aek Jordan i, na dung nisaksihonmi, mandidihon muse do Ia saonnari, jana marroan sude halak tuSia!”

²⁷Dialusi si Johannes ma, “Nada tarbaen jolma mangkarejohon bagi na aha pe, anggo so dilehen Debata i disia.

²⁸Hamu pe madung dibege hamu hudok, ‘Nada au Kristus i. Hum patujolo sajo do au umbaen na disuru parjolo ulang Ia.’

²⁹Bayo pangoli do nampuna boru na niolina. Anggo dongan ni bayo pangoli i hum jongjong sajo do ia mandongani jana manangihon pangoli i jana jop ma rohania umbege sora ni pangoli i. Songon i ma au, saonnari marjop ni roha situtu do au.

³⁰Ia do na angkon mur pagodangon tapi anggo au angkon mur nipamenek do.”

³¹Ise na ro sian ginjang do di ginjang ni sudena. Na ro sian tano on, di tano on do, jana mangkobari do ia taringot tu tano on. Anggo na ro sian ginjang i, di ginjang ni sudena do.

³²Angka na niidaNia dohot na nibegeNia do disaksihon Ia, hape umpe sahalak na mangkaporsayai hasaksianNia.

³³Sanga ise na porsaya di hasaksianNia i, i do na mangoku bahaso na tigor Debata.

³⁴Sanga ise na nisuru ni Debata, barita sian Debata do dioban Ia, harana madung dilehen Debata TondiNia i, nada hasuhatan bahatna.

³⁵Dihaholongi Damang do AnakNia jana madung dipasahat Damang sasudena tuSia.

³⁶Sanga ise na porsaya tu Anak i, halahi do na maruli ngolu na manongtong. Tapi anggo halak na so ra porsaya tu Anak i indangkon na dapot ni halahi ngolu na manongtong i, jana hamumuruk ni Debata do tongtong adop halahi.