Read Batak Angkola JOHANNES 4 Bible Online

JOHANNES 4 - Batak Angkola bible

JOHANNES 4

¹Dibege halak Parise ma na umbahat sisean ni Jesus, dohot na nididihonNia ulang pado si Johannes. (

²Nian nada Ia na mandidihon halak, tapi angka siseanNia i do.)

³Dung tarboto tu Jesus na dung tarbege na songon i tu halak Parise, gabe kehe ma Ia sian Judea jana mulak tu Galilea.

⁴Angkon sian Samaria do Ia mamolus di pardalananNia i.

⁵Dung di Samaria lalu ma Jesus tu sada kota na margoar Sikhar, nada sadia dao sian tano na nilehen ni si Jakob narobi tu anaknia na margoar si Josep.

⁶Disi ma sumur ni si Jakob i. Loja sajo ma Jesus na mardalan i, gabe kehe Ia juguk maradian di topi ni sumur i. Hira-hira pukul dua bolas ma hatiha i.

⁷Dung i ro ma sada dadaboru Samaria muhat tusi, jadi didokkon Jesus ma tusia, “Lehen ma Au minum.”

⁸Angke ma kehe tu kota anak siseanNia manobusi panganon.

⁹Dialusi boru Samaria i ma, “Halak Jahudi do Ho hape au halak Samaria do. Biasi mangido minum Ho tu au?” (Harana na so ra do halak Jahudi mardongan dohot halak Samaria.)[6]

¹⁰Dialusi Jesus ma, “Sugari ma diboto ho silehen-lehen ni Debata jana ditanda ho na mangido minum sian ho, gabe ho sandiri noma mangido sian Ia, jana lehenonNia ma di ho aek na mangolu.”

¹¹Didok anak boru i ma, “Tapi so adong timba di Tuhan i, hape sai bagas sumur on. Sian dia ma dapot Tuhan i aek na mangolu i?

¹²Ompungnami si Jakob do na mangalehen sumur on di hami. Ia sandiri pe sian sumur on do dibuat ia inumonnia; songon i muse angka dakdanaknia dohot pahan-pahanannia. Gumodang dehe lakna Ho sian ompungnami si Jakob?”

¹³Didok Jesus ma, “Sude halak na minum sian aek on manguas do mangulahi,

¹⁴tapi anggo halak na manginum aek na giot lehenonKi disia, nada manguas be ia salolot-lolotna. Angke anggo aek na giot lehenonKi angkon gabe sada mata mual na marbuldak-buldak do i di dirinia jana mangalehen hangoluan na so mantak.”

¹⁵Didok anak boru i ma, “Lehen ma di au aek i, anso ulang sai manguas be au, jana anso ulang mulak-ulak au tuson muhat.”

¹⁶“Kehe ma ho jolo mamiohon halaklahimu, dung i ro ma ho mangulahi tuson,” ninna Jesus.

¹⁷“So adong halaklahingku,” ning anak boru i mangalusi. Didok Jesus ma, “Tutu do na nidokmi, ‘Nada adong halaklahimu,

¹⁸harana madung lima halaklahimu jana halaklahi na nidongananmu na saonnari i, anggo satutuna nada halaklahimu i. Jadi, tutu do na nidokmi.’ ”

¹⁹“Saonnari pe anso huboto, panurirang do hape Tuhan i,” ning anak boru i.

²⁰“Anggo angka ompunami di dolok on do marsomba, tapi anggo Ho mandok hum di Jerusalem sajo do inganan ni halak marsomba.”

²¹Didok Jesus ma, “Porsaya ma ho di Au. Sada hatiha sombaon ni halak ma Damang, nada be di dolok on jana nada muse di Jerusalem.

²²Hamu angka halak Samaria disomba hamu do na so ditanda hamu, tapi anggo hami halak Jahudi, na hami tanda do na hami somba; angke sian halak Jahudi do ro haluaan i.

²³Tapi na giot ro do hatihana, jana madung ro saonnari, marsomba ma angka parsomba na tutu tu Ama i di bagasan Tondi dohot hasintongan; angke jop do roha ni Debata marnida halak na songon i.

²⁴Tondi do anggo Debata, jana angka na giot marsomba tu Debata, angkon marsomba di bagasan Tondi dohot hasintongan.”

²⁵Didok anak boru i ma tu Jesus, “Huboto do na giot ro humani Mesias i (i ma na margoar Kristus). Jadi muda ro Ia, paboaonNia ma sasudena tu hita.”

²⁶“Au do Ia, na mangkataion dohot ho,” ninna Jesus.

²⁷Disi ma ro angka sisean ni Jesus mangulahi. Homang ma roha ni halahi mida Jesus mangkobari dohot sada anak boru. Tapi umpe sahalak sian halahi na marsapa, “Aha do na nihagiotiMu? Sanga: Aha do na nihataanMu dohot ia?”

²⁸Dung i ditadingkon anak boru i ma guncinia i disi, kehe ma ia marlojong tu kota jana didok ia ma tu angka halak na di kota i,

²⁹“Beta ma taligi halak na paboahon tu au sasudena na dung hubaen. Ia dehe Kristus i?”

³⁰Dung i marruaran ma halak sian kota i kehe mandapotkon Jesus.

³¹Jadi laing di hatiha i, disuru angka siseanNia i ma anso mangan jolo Jesus, “Mangan ma jolo Rabbi,” ning halahi.

³²Tapi dialusi Jesus ma, “Adong do di Au sipanganon, tapi nada diboto hamu sanga sipanganon aha i.”

³³Dung i mamungka ma sisean i marsisapaan sama halahi, “Na adong do halak maroban panganon diSia?”

³⁴Dung i didok Jesus ma, “Anggo sipanganonKi, i ma na mangihutkon hagiot ni na marsuru Au, jana pasidungkon parkarejoan na nilehenNia sikarejohononKu.

³⁵Didok hamu, ‘Opat bulan nari sabion ma.’ Tapi anggo Au mandok di hamu: tangkas ma ligi hamu tu angka ladang i. Nada he madung tarsabi i?

³⁶Manjagiti upana ma angka na manyabi i; jana dipalagut ma suhana i tu hangoluan na so mantak. Rap marsonang-sonang ma panyabur dohot panyabi.

³⁷Jadi tutu do hata ni pandohan on, ‘Halak do manyuan, hape na asing do manyabi.’

³⁸Tu ladang na nikarejohon ni halak do hamu Husuru manyabi; halak do na markarejo disi hape hamu do na mambuat suha ni karejo ni halahi.”

³⁹Gabe bahat ma halak Samaria na sian kota i porsaya tu Jesus hara ni na nidok ni anak boru i, ‘Madung dipaboa Ia tu au sasudena parkarejoanku nabaruon.’

⁴⁰Jadi dung marsuo angka halak Samaria i dohot Jesus gomos ma dipangidohon halahi anso tinggal Ia rap dohot halahi. Jadi disi ma Jesus dua ari.

⁴¹Dung i umbahat dope halak gabe porsaya tu Jesus hara ni na niajarkonNia sandiri tu halahi.

⁴²Didok halahi ma tu anak boru i, “Saonnari madung porsaya hami, nada hara ni angka na nipaboami be tu hami, tapi hara ni na dung hami bege sandiri sian Ia, jana madung hami boto tutu do Ia Sipalua ni portibi on.”

⁴³Dung adong dua ari, kehe ma Jesus tu Galilea.

⁴⁴Jesus sandiri do manyaksihon, “Nada dipasangapi panurirang, anggo di kota hagodanganna sandiri.”

⁴⁵Tapi dung lalu Ia di Galilea, marjop ni roha ma halak na disi manjagit Ia, harana taran di Jerusalem halahi di Pesta Paskah i, madung diida halahi sude na nibaen ni Jesus hatiha i.

⁴⁶Jadi bolkas ma Jesus tu Kana di Galilea, di kota i ma na nibaenNia aek gabe anggur. Adong ma sahalak pagawe ni bagas godang na topet marnyae anakna di Kapernaum.

⁴⁷Dung dibege ia na ro Jesus sian Judea tu Galilea, didapotkon ia ma Jesus jana dipangidohon ia ma anso ro Jesus tu Kapernaum laho pamalumkon anaknia na giot mate.

⁴⁸Didok Jesus ma tu pagawe ni bagas godang i, “Anggo so jolo diida hamu angka na luar biasa dohot angka hahomangan, laing na so ra do hamu porsaya.”

⁴⁹Didok pagawe ni bagas godang i ma, “Tuhan tibu ma Ho ro dompak so mate anakki.”

⁵⁰Didok Jesus ma, “Kehe ma ho mangolu do anakmi.” Jadi porsaya do bayo i di na nidok ni Jesus i, laing kehe ma ia.

⁵¹Di tonga dalan i dope di na laho mulak ia, ro ma angka naposonia mandapotkon ia laho paboahon tusia, “Madung mangolu do anakmi!”

⁵²Dung i disapai ia ma tu halahi sanga pukul piga mamungka malum anaknia i. Alus ni halahi, “Natuari hira-hira pukul sada i mondap ma na milas i.”

⁵³Dung i diingot amang ni dakdanak i ma laing di jom i ma didok Jesus tusia, “Mangolu do anakmi.” Gabe porsaya ma ia dohot halahi na sabagas tu Jesus.

⁵⁴I ma tanda hahomangan na paduahon dibaen Jesus di Galilea dung ro Ia sian Judea.