Read Batak Angkola JOHANNES 5 Bible Online

JOHANNES 5 - Batak Angkola bible

JOHANNES 5

¹Dung i adong ma pesta ni halak Jahudi, gabe dohot ma Jesus tu Jerusalem.

²Di Jerusalem di lambung ni “Horbangan Biri-biri,” adong do sada paridian.[7] Di hata Ibrani digoar do i Betesda.[8] Adong muse do lima sopo-sopo humaliang paridian i.

³Bahat do angka na marnyae marmodoman disi; adong na mapitung, adong na timpang, adong muse na pangpangon. [Sudena halahi painte-intehon panggulsak ni aek i.

⁴Harana sai mijur do huhul surusuruan ni Tuhan tu bagasan paridian i, manggaor aek i. Jana sanga ise sian na marnyae i parjolo masuk tu paridian i hatiha manggulsak aekna i, malum ma nyaena i; sanga na nyae aha pe angkon malum.]

⁵Adong ma disi sada bayo na dung tolu pulu salapan taon honokna marnyae.

⁶Diida Jesus ma ia modom disi, jana diboto Jesus ma na dung honok bayo i marnyae; gabe didok Jesus ma tusia, “Giot dehe ho malum?”

⁷Dialusi bayo na marnyae i ma, “Nada adong donganku dison Tuhan na pamasuk au tu paridian i muda hatiha manggulsak aek i. Jadi hatiha giot masuk dope au tu paridian i, hape ma dipajolo halak na asing masuk.”

⁸Gabe didok Jesus ma tusia, “Jongjong ma ho, oban lagemi jana mardalan ma ho.”

⁹Manigor malum ma bayo i. Dung i dioban ia ma lagenia, kehe ma ia mardalan. Topet do Ari Sabat hatiha i.

¹⁰Jadi hara ni i didok angka pamimpin ni halak Jahudi ma tu bayo na baru malum i, “Ari Sabat do da sadari on. Nada tola obanonmu lagemi.”

¹¹Tapi ning ia ma mangalusi, “Halak na pamalumkon au nangkin do na marsuru au; didok Ia, ‘Oban ma lagemi, mardalan ma ho.’ ”

¹²“Ise ma he i na marsuru ho mardalan, mangoban lagemi?” ninna halahi manyapai ia.

¹³Tapi hape na so ditanda bayo na malum i dope sanga ise halakna, hara ni bahat ni jolma disi. Jesus pe nada haidaan be di tonga-tonga ni halak na bahat i jana madung kehe Ia sian inganan i.

¹⁴Dung i marsuo ma Jesus dohot bayo i di Bagas Ni Debata. Didok Jesus ma tusia, “Saonnari madung malum ho; ulang be datdati mardosa. Angke muda mambaen dosa dope ho, na jumatjat sian on dope taononmu saulahon.”

¹⁵Jadi kehe ma bayo i paboahon tu angka pamimpin ni halak Jahudi, Jesus do hape na pamalumkon ia.

¹⁶Markite-hite i, dipungka halak Jahudi ma mangaroha-rohai Jesus, hara ni na nipamalumNia halak di Ari Sabat.

¹⁷Tapi didok Jesus ma tu halahi, “Tongtong do markarejo Damang; jana Au pe angkon laing markarejo do.”

¹⁸Angka pandohan ni Jesus i ma mambaen mur dirohai angka pamimpin ni halak Jahudi i giot mamunu Ia. Nada hum hara ni na mangalanggar tona ni ugamo sajo, i ma taringot tu Ari Sabat umbaen na songon i dibaen halahi, tapi dohot do muse hara ni hataNia na mandok AmangNia Debata; astuanna disarupahon Ia ma Ia dohot Debata.

¹⁹Dialusi Jesus ma halahi songon on, “Ingot hamu ma na Hudok on: Nada dibaen Anak i sanga na aha pe mangihutkon roha-rohaNia sandiri. Sanga aha na niidaNia dibaen AmangNia, hum i sajo do dibaen Ia. Angke sanga aha na nibaen ni Ama i, laing i muse do dibaen Anak i.

²⁰Angke na holong do roha ni Ama i mida Anak i. Dipatidahon Ia muse do sasude na nibaenNia sandiri tu AnakNia i, dohot angka pambaenan na gumodang, patidahononNia dope tu AnakNia i anso longang hamu.

²¹Songon Damang na manyungguli halak na mate, jana dilehen Ia hangoluan tu halahi; laing songon i muse ma Anak i mangalehon ngolu tu halak, sanga ise giot ni rohaNia.

²²Nada mandabu uhum anggo Ama i sandiri sanga na tu ise pe. Angke anggo kuaso laho mandabu uhum, na dung dipasahat do i di AnakNa i.

²³Dibaen Damang pe i anso dipasangap halak do Anak i songon na ni baen ni halak tu Damang. Halak na so pasangapkon Anak i, nada diparsangapi ia muse Ama na marsuru Anak i.

²⁴Hudok ma tu hamu: Satutuna sanga ise na manangihon hata na Hudok jana na porsaya tu na marsuru Au, halahi ma na dapotan hangoluan na so mantak. Nada siuhumon be i; madung malua ia sian hamatean jana dapotan hangoluan.

²⁵Tutu do na Hudok di hamu: Ro ma hatihana, jana tardok madung ro i, begeon ni halak na dung mate i ma sora ni Anak Ni Debata, jana sanga ise na umbegesa dapotan hangoluan.

²⁶Dibaen songon Ama i marhangoluan di bagasan diriNia sandiri, laing songon i ma madung dibaen Ama i do Anak i, gabe marhangoluan di bagasan diriNia sandiri.

²⁷Madung dilehen Ia kuaso tu AnakNia laho manontuhon uhuman, harana Anak Ni Jolma i do Ia.

²⁸Ulang longang rohamunu umbege on; harana ro do hatihana, sude halak na di bagasan kuburan i begeonna ma soraNia,

²⁹jana haruar ma halahi sian kuburan i. Jana sude halak na mambaen na denggan disungguli ma tu hangoluan. Tapi anggo sibaen na jahat disungguli tu hamatean.”

³⁰“Nada tarpatupa Au sanga aha pe anggo sian roha-rohangKu sandiri. Sanga aha na niparentahon ni Debata tu Au, hombar tusi do Au manontuhon uhuman. Hara ni i, adil do na Huputuskon i, angke nada na mambaen roha-rohangKu sandiri Au. Hagiot Ni Damang na marsuru Au, i sajo do na Huoloi.

³¹Anggo Au sandiri do na mangalehen hasaksian taringot tu diringKu sandiri, nada tarjagit hasaksianKi.

³²Tapi adong do sada halak na asing mangalehen hasaksian taringot tu Au jana Huboto do bahaso na tutu hasaksianNia i.

³³Hamu sandiri pe madung ditongos hamu suruanmunu tu si Johannes jana si Johannes pe madung dilehen ia hasaksian na tutu taringot tu Au.

³⁴Hupajojor pe i sudena, nada hara ni na porlu di Au hasaksian sian jolma, tapi anso dipalua do hamu.

³⁵Songon lampu na gara jana na marsinondang do da anggo si Johannes; jana hamu pe, anggo hum santongkin ra do hamu ditorangi sondang ni lampu i.

³⁶Tapi adong dope di Au hatorangan na ummarga sian na nilehen ni si Johannes. Karejo na nidok ni Damang karejohononKu, i ma karejo na Hubaen saonnari, sudena i patorangkon bahaso Ama i do na marsuru Au.

³⁷Jana Ama na marsuru Au pe madung dilehen Ia hasaksian taringot tu Au. Anggo hamu nada unjung dope umbege sora ni Ama i, sanga marnida bohiNia.

³⁸Nada diargahon hamu di bagasan rohamunu angka hataNia, angke na so porsaya do hamu tu halak na nisuruNia.

³⁹Diparsiajari hamu do nian Buku Na Badia i angke dipikir hamu dapot hamu ma hangoluan na so mantak i muda dung diparsiajari hamu i. Jana Buku Na Badia i sandiri pe disaksihon i do taringot tu Au!

⁴⁰Hape nada ra hamu ro tu Au laho manjagit hangoluan na so mantak.

⁴¹Nada Hujalahi pujian sian jolma.

⁴²Hutanda do hamu. Huboto do na so dihaholongi hamu Debata di bagasan rohamunu.

⁴³Mardongan kuaso na sian Damang do Au ro, hape nada dijagit hamu Au. Hape anggo halak na asing na ro mamake kuasona sandiri, dijagit hamu do.

⁴⁴Tarbia muse ma pambaenmunu porsaya, harana na manjalahi sangap do hamu sama hamu, anggo sangap sian Debata na sasada i nada dijalahi hamu.

⁴⁵Ulang ma didok rohamunu na mangaduhon hamu Au tu Damang. Si Musa do na mangaduhon hamu — harana si Musa do na nipainte-intemunu.

⁴⁶Sugari na tutu hamu porsaya tu si Musa, angkon laing porsaya muse do hamu tu Au, angke taringot tu Au do na nisuratkon ni si Musa.

⁴⁷Tapi muda nada dihaporsayai hamu sanga aha na nisurat ni si Musa, tarbia ma pangkaporsayaimunu tu na Hudok?”