Read Batak Angkola JOHANNES 6 Bible Online

JOHANNES 6 - Batak Angkola bible

JOHANNES 6

¹Dung i kehe ma Jesus mangulahi tu ipar ni Dano Galilea (na nigoaran muse Dano Tiberias).

²Diihutkon halak na bahat i ma Ia hara ni na dung niida ni halahi angka pangalaho hahomangan na nibaenNia dompak pamalumkon angka na marnyae Ia.

³Manangkok ma Jesus rap dohot angka siseanNia i tu sada dolok-dolok, laing dipajuguk halahi ma disi.

⁴Hatiha i laho dapot ma Pesta Paskah ni halak Jahudi.

⁵Di na manaili Jesus humaliang, diida Ia ma bahat sajo halak marroan mandapotkon Ia. Dung i didok Ia ma tu si Pilipus, “Di dia ma tobusanta panganon anso tarlehen hita halak na bahat on mangan?” (

⁶Didok Jesus pe songon i laho mancubo roha ni si Pilipus do Ia; harana anggo Jesus sandiri diboto Ia hian do sanga aha na giot baenonNia.)

⁷Dialusi si Pilipus ma, “Roti arga dua ratus hepeng perak nada tuk di angka jolma on, harupe hum saotik be sahalak.”

⁸Sahalak sian sisean ni Jesus na asing, i ma si Andreas anggi ni si Simon Petrus, mandok:

⁹“Adong do dison sada dakdanak na maniop lima roti dohot ihan duakibung. Tapi aha ma arti ni i tu halak na songon on bahatna?”

¹⁰“Suru hamu ma sudena halahi juguk,” ninna Jesus tu angka siseanNia i. Bahat do ruput-ruput disi, gabe marjuguhan di ruput-ruput i ma sude halak i — adong ma hira-hira lima ribu halak halaklahi.

¹¹Dung i dibuat Jesus ma roti i, didok Ia ma tarimakasi tu Debata. Lalu diparbagi-bagihon Ia ma roti i tu halak na bahat i. Laing songon i ma dibaen Ia tu ihan i. Mangan ma sudena halahi sabutong-butongna.

¹²Dung butong na mangan i, didok Jesus ma tu angka siseanNia i, “Palagut hamu ma teba-teba ni panganon i ulang adong na sayang.”

¹³Dipalagut angka siseanNia i ma teba-teba ni panganon i dapot ma dua bolas karanjang gok teba-teba ni roti na lima i na nipangan ni halak na bahat i.

¹⁴Dung diida halak na bahat i hahomangan na nibaen ni Jesus i, ninna halahi ma, “On ma tutu panurirang na giot ro i tu tano on!”

¹⁵Dung i giot paksaon ni halahi ma Jesus gabe raja ni halahi. Tapi diboto Jesus do na di roha ni halahi i, gabe kehe ma sada Ia tu dolok-dolok i.

¹⁶Dung potang ari, manuat ma angka sisean ni Jesus tu dano i.

¹⁷Marparau ma halahi manyiborangi dano i tu Kapernaum. Haru madung borngin laing so ro dope Jesus mandapoti halahi.

¹⁸Jadi mamungka ma marombak dano i hara ni pangombus ni alogo na gogo.

¹⁹Madung hira-hira opat tu lima kilometer daona halahi marparau tu tonga-tonga ni dano i; jadi ompot ma diida halahi ro Jesus mardalan di ginjang aek i mandapotkon parau ni halahi i. Mabiar situtu ma halahi.

²⁰Tapi didok Jesus ma tu halahi, “Ulang hamu mabiar, Au do i!”

²¹Giot dipamasuk halahi ma Ia tu parau i hape ma lalu halahi tu inganan sitopoton ni halahi i.

²²Ancogotna i diida halak na tinggal di siborang ni dano i ma, hum sada do parau disi. Diboto halahi do na dung parjolo kehe anggo sisean ni Jesus jana na so dohot Jesus di bagasan parau i rap dohot angka siseanNia i.

²³Adong do angka parau na marroan sian Tiberias maradian donok tu inganan parmanganan ni halak na mangan roti i dung didok Jesus tarimakasi tu Debata.

²⁴Dung diida halahi na so disi Jesus dohot angka siseanNia i, masuk ma halahi tu parau laho kehe tu Kapernaum manjalahi Jesus.

²⁵Dung marsuo halahi dohot Jesus di ipar ni dano i, disapai halahi ma tuSia, “Ale, Rabbi sadihari dehe Ho lalu tuson?”

²⁶Dialusi Jesus ma, “Satutuna do na Hudok tu hamu: Nada hara ni na dung diastui hamu angka hahomangan na Hubaen i umbaen na nijalahanmunu Au, tapi hara ni na dung butongan do hamu mangan roti i.

²⁷Ulang pola marloja-loja hamu markarejo hara ni sipanganon na ra abis dohot na ra busuk. Markarejo ma hamu, anso dapot hamu sipanganon na so ra busuk jana na mangalehen hangoluan na so mantak. Lehenon ni Anak Ni Jolma i do di hamu panganon i; angke madung dilehen Damang, i ma Debata, kuaso i diSia.”

²⁸Dung i disapai halahi ma tuSia, “Aha do sibaenonnami anso tarkarejohon hami hagiot ni Debata?”

²⁹Dialusi Jesus ma, “On ma na nipangido ni roha ni Debata sikarejohononmunu diSia: Haporsayai hamu ma na nisuru ni Debata i.”

³⁰Didok halahi ma, “Antong anggo songon i, adong dehe tanda hahomangan sibaenonmi Guru siidaonna ni anso porsaya hami tu Ama i? Patidahon ma sanga aha do na tarbaen Ho!

³¹Anggo angka ompunami mangan manna do di halongonan, songon na adong tarsurat, ‘Dilehen Ia do di halahi sipanganon na sian banua ginjang.’ ”

³²Dung i didok Jesus ma tu halahi, “Satutuna Hupaboa ma di hamu: Anggo na nilehen ni si Musa i di hamu, nada sipanganon na sian banua ginjang i; anggo sipanganon na sian banua ginjang i, i ma sipanganon na satutuna lehenon ni Damang di hamu.

³³Angke anggo sipanganon na nilehen ni Debata, i ma na mijur sian banua ginjang jana na mangalehen ngolu na so mantak tu portibi on.”

³⁴Dung i ninna halahi ma, “Ale Tuhan, lehen ma di hami tontong sipanganon na songon i.”

³⁵Jadi didok Jesus ma tu halahi, “Au do roti na mangalehen hangoluan; sanga ise na ro tu Au nada malean be ia, jana sanga ise na porsaya tu Au nada manguas be ia.

³⁶Tapi madung Hudok tu hamu, ‘Bope madung diida hamu Au, tapi nada porsaya hamu.’

³⁷Sudena halak na dung dipasahat Damang tu Au, ro ma halahi tu Au. Nada tulahonKu, sanga ise pe na ro tu Au.

³⁸Angke umbaen na mijur pe Au sian banua ginjang, na giot patuluskon hagiot ni na marsuru Au do, nada hagiotKu sandiri.

³⁹Jana songon on ma hagiot ni na marsuru Au; anso ulang Huagohon sahalak pe sian sudena halak na nipasahatNia tu Au; tapi anso Hupangolu do halahi mangulahi dung di Ari Parpudi.

⁴⁰Harana on do hagiot ni Damang: Sudena halak na marnida Anak i jana porsaya tuSia, i do na marhangoluan na so mantak jana pangoluonKu ma halahi mangulahi dung di Ari Parpudi.”

⁴¹Mamungka ma mungut-ungut halak Jahudi tu Jesus, hara ni na nidokNia i, “Au do roti na mijur sian banua ginjang i.”

⁴²Didok halahi ma, “Na he Jesus anak ni si Josep i do on? Hami tanda do amangNia dohot inangNia! Biasi ma he didokkon Ia na mijur sian banua ginjang Ia?”

⁴³Dung i didok Jesus ma tu halahi, “Ulang marungut-ungut hamu.

⁴⁴Nada tarbaen sanga ise pe ro tu Au, anggo so disosoi Damang na marsuru Au halakna i tu Au; jana pangoluonKu ma halahi di Ari Parpudi.

⁴⁵Tarsurat do di buku ni angka panurirang songon on: Ajaran ni Debata ma sudena halak. Jadi sudena halak na manangihon Debata jana na marsiajar sian Ia, angka halahi ma na ro tu Au.

⁴⁶Nada na mandok na dung adong halak unjung mida Damang i. Anggo na dung unjung mida Damang, hum na ro sian Damang i do. Sasada Ia sajo ma i!”

⁴⁷“Tutu do na Hudok on tu hamu: Halak na porsaya tu Au, i do na marhangoluan na so mantak.

⁴⁸Au do roti hangoluan.

⁴⁹Mangan manna do angka ompumunu di halongonan hape laing marmatean do halahi.

⁵⁰Tapi asing situtu do anggo sipanganon na mijur sian banua ginjang i; halak na mangankon sipanganon i, nada mate be.

⁵¹Au do roti na mijur sian banua ginjang i, i ma sipanganon na mangalehen hangoluan. Halak na mangankon sipanganon on, mangolu ma salolot-lolotna. Anggo sipanganon na giot lehenonKi, i ma pamatangKu. LehenonKu ma pamatangKon anso mangolu portibi on.”

⁵²Gabe martongkari ma halak Jahudi sama halahi hara ni hata ni Jesus nangkinan i. “Bia do pangalehen ni Bayo on di pamatangNia i tu hita gabe sipanganon?” ninna halahi.

⁵³Dung i didok Jesus ma tu halahi, “Tutu do na Hudok on di hamu: Anggo so dipangan hamu do pamatang ni Anak Ni Jolma i jana nada diinum hamu mudarNia, nada adong hangoluan na tutu di bagasan hamu.

⁵⁴Anggo halak na mangankon pamatangKu jana manginum mudarKu marhangoluan na so mantak do jana pangoluonKu ma halahi mangulahi di Ari Parpudi.

⁵⁵Angke pamatangKu do sipanganon na tutu jana mudarKu do siinumon na tutu.

⁵⁶Halak na mangankon pamatangKu jana na manginum mudarKu, ngolu ni halahi ma na sada tu Au jana ngolungKu pe sada tu halahi.

⁵⁷Damang na mangolu i do na marsuru Au jana Au pe na mangolu sian Damang i do. Laing songon i muse ma na mangankon pamatangKu, laing sian Au ma ia mangolu.

⁵⁸On do roti na mijur sian banua ginjang i: Nada sarupa sipanganon on dohot sipanganon na nipangan ni ompumunu. Angke dung dipangan halahi sipanganon i, laing mate do halahi. Tapi anggo na mangan sipanganon on, mangolu do salolotna.”

⁵⁹Hatiha mangajari ma Jesus di bagas paribadatan na di Kapernaum didokkon Ia sudena i.

⁶⁰Bahat do angka sisean ni Jesus umbege angka hata na nidok ni Jesus i. Didok halahi ma, “Ma kasartu do pangajaran on. Ise ma he na tahan manangihonsa?”

⁶¹Haru pe so jolo adong halak na paboahonsa, madung diboto Jesus do na marungut-ungut angka siseanNia i taringot tusi. Dung i gabe ning Ia ma tu halahi, “Adong he na so sonang rohamunu di pangajaran i?

⁶²Bia do muda diida hamu saulahon Anak Ni Jolma i mulak manaek tu ingananna humani?

⁶³Tondi i do na mangalehen hangoluan, anggo sibuk nada adong guna ni i. Angka hata na Hudokkon, i do tondi dohot hangoluan.

⁶⁴Hape laing adong dope sian hamu na so porsaya.” (Madung diboto Jesus hian do sian mulana sanga ise-ise na so ra porsaya dohot ise na giot manghianat tuSia.)

⁶⁵Dung i didok Jesus ma mangulahi, “Hara ni i ma umbaen na Hudok tu hamu, umpe sahalak tarbaen ro tu Au anggo so dilehen Damang dalan disia laho mandapotkon Au.”

⁶⁶Mamungka sian i bahat ma sian angka siseanNia i manadingkon Ia, jana nada ra be halahi mangihutkon Ia.

⁶⁷Dung i disapai Ia ma siseanNia sidua bolas halak i, “Adong he na giot tadingkononmunu muse ma Au?”

⁶⁸Dialusi si Petrus ma, “O Tuhan, giot tu ise dope hami kehe? Hum hataMi sajo do na mangalehen hangoluan na so mantak.

⁶⁹Porsaya do hami jana marpos ni roha, Ho do Na Badia na ro sian Debata.”

⁷⁰Dialusi Jesus ma tu halahi, “Au do nian mamili hamu na dua bolas halak on. Tapi haru songon i pe gabe songon Sibolis do sahalak sian hamu!”

⁷¹Si Judas anak ni si Simon Iskariot do na nidok ni Jesus disi. Angke haru pe sahalak sian sidua bolas halak i si Judas, ia do na giot manghianat tu Jesus.