Read Batak Angkola JOHANNES 7 Bible Online

JOHANNES 7 - Batak Angkola bible

JOHANNES 7

¹Dung i mardalani ma Jesus di Galilea. Nada ra Ia anggo tu Judea hara ni angka parkuaso ni halak Jahudi na disi, na sai manjalahi dalan giot mamunu Ia.

²Donok ma hatiha i Pesta Undung-undung Bulung Rata ni halak Jahudi.

³Jadi didok angka kahanggiNia ma tuSia, “Kehe ma Ho sian on tu Judea, anso laing diida angka siseanMi parkarejoanMu.

⁴Nada adong halak na manabunihon sanga aha na nibaennia muda giot tarbonggal goarnia. Muda baenonMu ma na songon i, angkon botoon ni na satano on ma i!” (

⁵Angke nada porsaya angka kahanggiNia i sandiri tuSia.)

⁶Jadi dialusi Jesus ma, “Nada hatihana dope anggo di Au, tapi anggo di hamu tongtong do dapot hatihana.

⁷Nada na ra portibi on mangkagigihon hamu. Tapi anggo Au tutu ma hagigian ni portibi on, hara ni na sai Hudok tu portibi on bahaso na jahat pambaenanna.

⁸Hamu sajo ma jolo kehe tu pesta i. Anggo Au indangkon ma sai kehe tusi,[9] angke nada hatihana dope di Au.”

⁹Songon i ma didok Jesus tu angka kahanggiNia i, jana laing di Galilea ma Ia tading.

¹⁰Dung kehe kahanggiNia tu pesta i, kehe muse ma Jesus tusi sip-sip.

¹¹Dijalak-jalahi angka parkuaso ni halak Jahudi ma Jesus di pesta i, sapa-sapa ma halahi, “Di dia do Ia ulaning?”

¹²Bahat ma hata-hata ni jolma na bahat i taringot tuSia. Adong na mandok, “Na burju do Ia.” Adong muse na mandok, “Nada, na paliluhon halak na bahat do Ia.”

¹³Tapi sahalak pe nada adong na puluk sian halahi mandok hatana torus torang taringot tuSia, hara ni na mabiar mida halak Jahudi i.

¹⁴Di tonga-tonga ni pesta i masuk ma Jesus tu Bagas Ni Debata mangajari.

¹⁵Homang sajo ma roha ni angka halak Jahudi i. Didok halahi ma, “Sian dia do parbinotoan ni Bayo on, hape nada jungada Ia sikola?”

¹⁶Dialusi Jesus ma, “Sanga aha na Huajarkon i nada pangajaranKu i, tapi pangajaran ni na marsuru Au do i.

¹⁷Sanga ise na ra mangihutkon hagiot ni Debata, botoon ni halahi ma sanga na sian Debata do pangajaranKi, sanga na sian roha-rohangKu sandiri.

¹⁸Anggo halak na marroha-roha mandok hatana, na manjalahi sangap tu dirina sajo do i. Tapi anggo halak na manjalahi sangap tu na marsuru ia, i ma halak na tigor; nada adong gabus disia.

¹⁹Madung nian dilehen si Musa di hamu angka Parenta Ni Debata. Tapi sahalak pe sian hamu umpe adong na mangoloi angka Parenta i. Biasi ma he giot bunuonmunu Au?”

²⁰Dialusi halak na bahat i ma, “Na marsibolis do Ho, ise he na giot mamunu Ho?”

²¹Dialusi Jesus ma, “Hum sada dope Hubaen pangalaho na so somal ma longang hamu sude.

²²Dibaen si Musa do paraturan di hamu, angkon sunatonmunu sude dakdanakmunu. Jana laing manyunat halak do hamu di Ari Sabat. (Anggo satutuna nada si Musa na parjolo mamungka manyunat halak, tapi angka ompunta na mangolu dompak so si Musa do.)

²³Muda disunat hamu halak di Ari Sabat, anso ulang mangalanggar Parenta Ni si Musa, biasi anggo songon i muruk hamu tu Au hara ni na Hupamalum sahalak di Ari Sabat?

²⁴Ulang ma marojahan tu na tarida sajo hamu muda manguhumi halak, tapi uhum na tigor ma baen hamu.”

²⁵Dung i adong ma deba halak Jerusalem na mandok, “Na he on do halakna, na giot bunuon ni halahi i?

²⁶Tapi ligi da! Laing marpupu do Ia mangkobari di jolo ni halak na bahat jana nada adong na mangkahua Ia, jana nada adong na mandok bagi aha tuSia! Sanga, betak na dung tangkas do diboto angka parkuasonta, na tutu do Ia Kristus i.

²⁷Hape anggo haroro ni Kristus i nada dong halak na umboto i sanga sian dia asalNa! Anggo Bayo on, inda he taboto do asalNia.”

²⁸Hatiha mangajari Jesus di bagasan Bagas Ni Debata, didok Ia ma, “Nian di tanda hamu do sanga ise Au jana diboto hamu sian dia harorongKu? Nada marhite roha-rohangKu sandiri umbaen na ro Au, tapi na nisuru ni Na Tigor i do Au, tapi nada ditanda hamu Ia.

²⁹Anggo Au Hutanda do Ia, harana sian Ia do harorongKu jana Ia do na marsuru Au.”

³⁰Jadi dirohahon halahi ma giot manangkup Ia, tapi inda adong na puluk manjama Ia, angke nada dapot dope hatihaNa.

³¹Tamba ni i, bahat muse do sian angka jolma na bahat i na porsaya tuSia, didok halahi ma, “Muda ro Kristus i tarbaen Ia dope ulaning hahomangan umbahat sian na dung binaenNia on?”

³²Dibege halak Parise ma hata-hata ni halak na bahat taringot tu Jesus. Jadi hara ni i, disuru halahi ma dohot angka sintua ni malim, piga-piga halak panjago ni Bagas Ni Debata anso kehe manangkup Jesus.

³³Didok Jesus ma, “Hum santongkin nari noma Au rap dohot hamu. Dung i mulak ma Au mandapotkon na marsuru Au.

³⁴Jalahanmunu ma Au tapi nada dapot hamu be: Harana nada tarbaen hamu ro tu ingananKi.”

³⁵Dung i didok angka halak Jahudi i ma, “Na giot tudia muse dehe Ia umbaen jabat nada tarbaen hita mandapotkon Ia? Adong he ulaning na giot kehe mandapotkon halak Jahudi na mangaranto di tonga-tonga ni halak Junani i ma Ia jana giot ajaranNia ma angka halak Junani i?

³⁶Aha dehe maksudNia mandok, ‘Jalahanmunu ma Au tapi nada dapot hamu Au,’ dohot, ‘Nada tarbaen hamu ro tu ingananKi?’ ”

³⁷Ari na parpudi di pesta i, i ma mata ni pesta i. Jongjong ma Jesus disi mandok hata marsora na gogo, ning Ia ma, “Sanga ise na manguas, tu Au ma ro anso minum.

³⁸Tarsurat do di Buku Na Badia i songon on, ‘Sanga ise na porsaya di Au, mabaor do angka batang aek na mangalehen ngolu sian bagasan rohana.’ ” (

³⁹Tondi Ni Debata do na nidok ni Jesus disi, i ma na giot sijagiton ni angka na porsaya tuSia. Harana nada podo ro Tondi Parbadia i, hara ni na so dipasangap dope Jesus.)

⁴⁰Bahat do halak na manangihon sanga aha na nidok ni Jesus. Jadi adong do sian halahi na mandok, “Na tutu do Ia panurirang!”

⁴¹Adong muse na asing na mandok, “On ma Kristus i!” Tapi laing adong muse do na mandok, “Dia ma he sian Galilea haroro ni Kristus i.

⁴²Harana di Buku Na Badia i tarsurat, sian pomparan ni si Daud do Kristus i jana sorang di Betlehem, i ma Kota Ni si Daud i.”

⁴³Ujungna gabe martongkari ma halak na bahat i taringot tu Jesus.

⁴⁴Adong ma na giot manangkup Ia tapi sahalak pe nada adong na puluk manjamaSa.

⁴⁵Dung i mulak ma angka panjago ni Bagas Ni Debata na nisuru manangkup Jesus, mandapotkon angka sintua ni malim dohot halak Parise. Disapai angka sintua ni malim dohot angka Parise i ma tu angka panjago i, “Biasi inda dioban hamu Ia tuson?”

⁴⁶Dialusi angka panjago i ma tu halahi, “Nada adong dope pangkatai ni jolma songon i!”

⁴⁷“Adong he na dung tarpaoto-oto muse dohot hamu?” ninna halak Parise i.

⁴⁸“Adong dehe sada halak sian angka pamimpin sanga halak Parise na dung porsaya tuSia?

⁴⁹Tapi anggo halak na bahat na so umboto angka Tona Ni si Musa, hona bura ma halahi.”

⁵⁰Sahalak sian angka Parise i madung unjung kehe mandapotkon Jesus borngin-borngin; si Nikodemus goarna. Didok si Nikodemus on ma tu angka Parise na asing i,

⁵¹“Anggo mangihutkon Tona i nada tola hita manguhum-uhumi halak, anggo so jolo nibege dope parkarona, jana anggo so jolo dipareso sanga aha na nibaenNia.”

⁵²“Adong he na halak Galilea ho? Pareso jolo di Buku Na Badia i. Nada adong panurirang na ro sian[10] Galilea!” [

⁵³Dung i mulak be ma halahi sudena tu bagasna.