Read Batak Angkola JOHANNES 8 Bible Online

JOHANNES 8 - Batak Angkola bible

JOHANNES 8

¹Tapi anggo Jesus kehe tu Dolok Zetun do Ia.

²Ancogotna i manyogot dope, kehe ma Ia mangulahi tu Bagas Ni Debata, jana bahat ma marroan halak mandapotkon Ia. Dung i juguk ma Ia, dipungka Ia ma mangajari halahi.

³Jadi laing di hatiha i marroan ma angka Siboto Surat dohot angka Parise maroban tuSia sada anak boru na tardapot markamainan. Dipajongjong halahi ma anak boru i di tonga-tonga,

⁴jana didok halahi ma tu Jesus, “Na tardapot do Rabbi anak boru on markamainan.

⁵Anggo di Tona Ni si Musa, adong do Tona na mandok angkon nidangguran do dohot batu dadaboru sisongon on lopus mate. Saonnari bia do pandapotMu?”

⁶Disapai halahi pe songon i na giot padapotkon hasalaan ni Jesus do halahi. Tapi dipaunduk Jesus do jana disurat Ia tano i dohot jari-jariNia.

⁷Tapi dung sai disosak halahi, dipadorgak Ia ma uluNia jana didok Ia ma tu halahi, “Sanga ise na so mardosa sian hamu, padiar ma ia parjolo mandanggur anak boru on dohot batu.”

⁸Dung i dipaunduk Jesus ma jana disurati Ia tano i mangulahi.

⁹Dung dibege halahi songon i pandok ni Jesus, morot ma halahi sian inganan i kehe-kehe sada mamungka sian na tumobang. Ujungna tinggal ma Jesus sajo disi dohot anak boru i na laing jongjong disi.

¹⁰Dung i jongjong ma Jesus, didok Ia ma tu anak boru i, “Ma di dia halahi sude? Nada he adong na manguhumi ho nangkin?”

¹¹“Nada adong, Tuhan” ning ia mangalusi. Didok Jesus ma, “Antong denggan, Au pe nada Huuhumi ho. Kehe ma ho saonnari, ulang be datdati na mardosa tu pudi on.”][11]

¹²Didok Jesus dope mangulahi tu halahi, “Au do sinondang ni portibi on. Dapotan sinondang hangoluan do sanga ise na mangihutkon Au. Nada be mardalan di na golap halahi.”

¹³Didok halak Parise i ma tu Jesus, “Saonnari Ho do na manyaksihon diriMu sandiri, nada tutu na nisaksihonMi!”

¹⁴Dialusi Jesus ma, “Haru pe Husaksihon taringot tu diringKu sandiri, tutu do na Husaksihon i; angke Huboto do sanga sian dia Au ro jana tu dia Au kehe. Anggo hamu nada diboto hamu sanga sian dia Au ro jana tu dia Au kehe.

¹⁵Diuhumi hamu do halak mangihutkon pambaen ni jolma; anggo Au nada adong sahalak pe na Huuhumi.

¹⁶Tapi sugari pe adong halak na Huuhumi, tigor do haputusanKu, harana nada hum Au sandiri, rap do Au dohot Damang i na marsuru Au.

¹⁷Tarsurat do di angka Tona i songon on: Na tutu do na ni saksian ni dua halak.

¹⁸Adong do dua na mangalehen hasaksian taringot tu diringKu Au dohot Damang na marsuru Au.”

¹⁹“Di dia ma AmangMi?” ning halahi. Dialusi Jesus ma, “So na ditanda hamu Au. Damang pe nada ditanda hamu i. Sugari ditanda hamu Au, laing ditanda hamu do Damang.”

²⁰Sudena i didok Jesus, hatiha mangajari Ia di Bagas Ni Debata di lambung ni poti hepeng. Tapi sahalak pe nada adong na manangkup Ia, angke nada podo dapot hatihana.

²¹Didok Jesus dope tu halahi, “Kehe ma Au jana jalahanmunu ma Au, tapi mate ma hamu di bagasan dosamunu. Tu inganan hakeheanKu, nada tarbaen hamu ro tusi.”

²²Dung i didok angka parkuaso ni Jahudi i ma, “AropKu na giot manyingkot ma Ia, harana didok Ia, ‘Tu inganan hakeheanKu nada tarbaen hamu ro tusi.’ ”

²³Dung i didok Jesus ma tu halahi, “Sian toru on do hamu ro; tapi anggo Au sian ginjang do. Hamu sian portibi on do; tapi anggo Au nada sian portibi on.

²⁴Hara ni i do umbaen na Hudok tu hamu, angkon mate hamu di bagasan angka dosamunu. Jana tutu do i angkon mate hamu di bagasan angka dosamunu, anggo laing na so porsaya hamu, ‘Au do ibana’.”

²⁵“Ise do Ho satutuna?” ninna halahi manyapai. Dialusi Jesus ma, “Aha dope gunana mangkobari Au dohot hamu![12]

²⁶Bahat dope na giot dokkononKu dohot uhumanKu taringot tu hamu. Tapi Hum na Hubege sian na marsuru Au, i sajo do paboaonKu tu portibi on — harana sintong do Ia.”

²⁷Nada diboto halahi, taringot tu Ama i do na nihatahonNia.

²⁸Jadi didokkon Jesus ma tu halahi, “Dung dipatuginjang hamu sanoli on Anak Ni Jolma i, botoonmunu ma disi, ‘Au do’ na nidok ni surat i. Disi pe anso tangkas diboto hamu na so adong sada pe na Hubaen i sian roha-rohangKu sandiri. Sanga aha na niajarkon ni Damang tu Au, hum i sajo do na Huhatahon.

²⁹Jana na marsuru Au, sai rap do Ia dohot Au. Nada jungada dipadiar Ia sasada Au sajo, angke sai Hubaen do sanga aha na pasonangkon rohaNia.”

³⁰Dung didokkon Jesus sudena i, bahat ma halak porsaya tuSia.

³¹Dung i didokkon Jesus ma tu halak Jahudi na dung porsaya tuSia, “Anggo burju hamu mandalankon angka ajaranKi, i pe anso tutu hamu gabe siihutkon Au.

³²Botoonmunu ma hasintongan i jana paluaon ni hasintongan i ma hamu.”

³³Ninna halahi ma, “Pomparan ni si Abraham do hami. Nada jungada dope hami gabe hatoban ni sanga ise pe! Aha do maksudmu umbaen didok Ho, ‘Paluaon ma hamu?’ ”

³⁴Dialusi Jesus ma, “Tutu do na Hudok di hamu. Sude halak na mambaen dosa, i ma da hatoban ni dosa.

³⁵Muda adong sada hatoban di bagas, nada tongtong ia tinggal di bagas i, tapi anggo anak tongtong do tinggal di bagas i.

³⁶Muda dibaen Anak i hamu malua, i pe anso tutu hamu na malua.

³⁷Huboto do, pomparan ni si Abraham do nian hamu. Hape laing giot dibunu hamu do Au, hara ni na so ra hamu manjagit pangajaranKi.

³⁸Na nipatidahon ni Damang tu Au, i do na Huhatahon; jana hamu pe dibaen hamu do sanga aha na nisuruhon ni amangmunu sibaenonmunu.”

³⁹Dialusi halahi ma, “Si Abraham do ompunami.” Didok Jesus ma, “Anggo na tutu ma hamu pomparan ni si Abraham, tontu baenonmunu do sanga aha na nibaen ni si Abraham.

⁴⁰Hasintongan na Hubege sian Debata, hum i sajo do na Hupaboa tu hamu, hape mur giot bunuonmunu dope Au. Anggo si Abraham nada dibaen ia songon i!

⁴¹Na nibaen ni amangmunu; i do na nibaenmunu.” Dialusi halak Jahudi i ma, “Nada anak gampang hami. Hum sada do Amangnami, i ma Debata sandiri.”

⁴²Dung i didok Jesus ma tu halahi, “Sugari na tutu Debata Amangmunu, angkon holong do rohamunu tu Au, harana, tutu do Au na ro sian Debata. Nada sian roha-rohangKu umbaen na ro Au. Na nisuruNia do Au.

⁴³Hara ni aha dehe umbaen na so diastui hamu na Hudok i? Angke nada tahan hamu umbege pangajaranKi.

⁴⁴Angka anak ni Sibolis do hamu. Jadi hagiot ni amangmunu do na nijalahanmunu. Sian mula-mulana do Sibolis i sibunu jolma. Nada mangolu dibagasan hatutuan ia, harana nada adong disia hatutuan. Pargabus do Sibolis, angke songon i hian do bako ni i. Tutu do pargabus Sibolis i, ia do ama ni sandok gabus.

⁴⁵Tapi hara ni na Hupaboa tu hamu taringot tu Debata, hara ni i muse ma umbaen na so porsaya hamu tu Au.

⁴⁶Ise ma sian hamu na tarbaen mambuktihon paboa na adong dosa di Au? Muda hupaboa tu hamu taringot tu Debata, biasi inda porsaya hamu tu Au?

⁴⁷Sanga ise na ro sian Debata ditangihon Ia do na nidok ni Debata. Tapi anggo hamu nada sian Debata hamu, hara ni i ma umbaen na so ra hamu manangihon i.”

⁴⁸Dialusi halak Jahudi i ma, “Nada he tutu do muda hami dokkon halak Samaria do Ho, jana na nisonggopan ni setan?”

⁴⁹Dialusi Jesus ma, “Nada na nisonggopan ni setan Au! Na pasangapkon Damang do Au, hape nada dipasangap hamu Au.

⁵⁰Nada manjalahi sangap tu diringKu sandiri Au. Adong do Sada na manjalahisa jana Ia do na manguhumi.

⁵¹Tutu do na Hudok tu hamu; sanga ise na mangoloi na Hudok, nada mate be Ia salolot-lolotna.”

⁵²Dung i didok angka halak Jahudi i ma tu Jesus, “Saonnari pe anso tangkas sajo di hami, na nisonggopan ni setan do Ho! Si Abraham sandiri madung mate, songon i muse angka panurirang i. Hape didok Ho dope, ‘Sanga ise na mangoloi hatangKu, nada mate halahi salolot-lolotna.’

⁵³Madung mate angka panurirang. Dohot ise ma patudosonMu diriMu? Adong he gumodang Ho ulang pado amanami si Abraham na dung mate?”

⁵⁴Dialusi Jesus ma, “Sugari Au mamuji diringKu sandiri, na so adong do arti ni pujianKi. Damang do na mamuji Au; jana didok hamu, Damang i do Debatamunu,

⁵⁵hape so ditanda hamu Ia. Tapi anggo Au Hutanda do Ia. Jadi muda Hudok na so Hutanda Ia, gabe pargabus ma Au songon hamu. Hutanda do Ia jana Huoloi do na nidokNia.

⁵⁶Na jopan do roha ni si Abraham amangmunu i laho marnida aringKu. Madung diida Ia i jana jop rohaNia!”

⁵⁷Dung i didok halak Jahudi i ma tu Jesus, “So tuk dope lima pulu taon umurMu, na niidaMu ma lakna si Abraham?”[13]

⁵⁸Dialusi Jesus ma, “Tutu do na Hudok di hamu: Dompak so sorang dope si Abraham, madung adong hian Au.”

⁵⁹Dung i dibuat angka halak Jahudi i ma batu giot mandanggur Jesus; tapi martabuni ma Jesus, lalu kehe Ia morot sian Bagas Ni Debata i.