Read Batak Angkola BAENON NI ANGKA RASUL 1 Bible Online

BAENON NI ANGKA RASUL 1 - Batak Angkola bible

BAENON NI ANGKA RASUL 1

¹Teofilus na niparsangapan! Madung hupatorang di buku na parjolo sasudena na nikarejohon dohot na niajarkon ni Jesus mulai sian na mamungka Ia markarejo,

²lopus tu ari hananaekNia tu banua ginjang. Dompak so manaek Ia tu banua ginjang, madung dilehen Ia hian markite-hite kuaso ni Tondi Parbadia angka tona tu angka rasul na nipiliNia i.

³Dung mate Ia, adong do opat pulu ari honokna sai marpupu dipatidahon Ia diriNia tangkas di angka rasul i paboa na tutu do Ia mangolu. Diida halahi do Ia tangkas jana dihatahon Ia do tu halahi taringot tu Harajaan Ni Debata.

⁴Jadi di na marlagut Ia rap dohot halahi[1] ditonahon Ia ma tu halahi songon on, “Ulang morot hamu sian Jerusalem. Painte hamu ma disi lopus dilehen Damang sanga aha na nijanjihonNia i, i ma na dung Hupaboa hian tu hamu na salpu i.

⁵Harana anggo si Johannes, aek do dididihon ia tu hamu, tapi nada pola piga ari nari be pandidihonon ma hamu dohot Tondi Parbadia.”

⁶Dompak marlagut angka rasul rap dohot Jesus, disapai halahi ma tuSia, “PajongjongonMu dehe Tuhan di hatiha on harajaan ni Israel i mangulahi?”

⁷Dialusi Jesus ma, “Damang do na umboto taringot tu ari dohot hatiha ni i. Nada porlu botoonmunu i, angke kuaso ni Damang do i.

⁸Tapi jagitonmunu ma kuaso muda dung ro Tondi Parbadia tu hamu. Jana gabe saksingKu ma hamu di Jerusalem, di sude Luat Judea, di Samaria lopus tu ujung ni tano on.”

⁹Dung didok Jesus songon i, tarangkat ma Ia tu banua ginjang dipanotnoti halahi, jana diholipi ombun i ma Ia sian parnidaan ni halahi.

¹⁰Dompak na manatap tu ginjang i halahi mangaligi parkehe ni Jesus, tompu ma jongjong dua halak na marbaju na bontar di lambung ni halahi.

¹¹Ninna ma, “Ale hamu halak Galilea, biasi jongjong sajo hamu disi mangaligi tu langit i? Anggo Jesus na niidamunu i kehe manaek tu banua ginjang di adopanmunu, mulak do Ia mangulahi laing songon na niidamunu sinangkin.”

¹²Dung i mulak ma angka rasul i tu Jerusalem sian Dolok Zetun. Na donok do dolok i tu Jerusalem, hira-hira sakilometer daona.

¹³Dung di Jerusalem, masuk ma halahi tu bagas panompangan ni halahi i torus tu kamar na di lotengna i. Angka on ma goar-goar ni rasul i: Si Petrus dohot si Johannes, si Jakobus dohot si Andreas, si Pilipus dohot si Tomas, si Bartolomeus dohot si Mateus, si Jakobus anak ni si Alpeus, si Simon Ulubalang i dohot si Judas anak ni si Jakobus;

¹⁴satahi saoloan do halahi na marlagut i laho martangiang. Rap martangiang ma halahi dohot angka dadaboru songon i dohot si Maria inang ni Jesus dohot anggi ni Jesus.

¹⁵Disada hatiha marlagut ma halahi, — hira-hira saratus dua pulu halak ma na ro i — jongjong ma si Petrus mandok hata. Ning ia ma,

¹⁶“Hamu ale angka dongan! Angkon tulus do tarjadi sanga aha na tarsurat di Buku Na Badia i. Najolo madung dipaboa Tondi Parbadia markite-hite si Daud taringot tu si Judas, i ma na manguluhon halak laho manangkup Jesus i.

¹⁷Nietong hian do ia donganta jana na dung dipili hian do ia gabe donganta saparkarejoan.”

¹⁸Anggo si Judas on, madung dapot ia tano kuburannia upa ni hajahatannia na manghianat i. Madabu ma ia jana mate, mapultak butuhana i gabe sarge sude na di butuhana i.

¹⁹Sude do halak na di Jerusalem umboto i, gabe digoari halak ma inganan i Hakal-Dama astuanna ‘Tano Mudar’.

²⁰“Angke tarsurat muse do di Buku Masmur songon on, ‘Gabe halongonan na lungun ma ingananna i; anso ulang adong halak maringanan disi.’ Laing tarsurat muse do songon on, ‘Halak na asing noma manggonti tohonanna.’ ”

²¹“Jadi hara ni i, angkon laing adong ma sada nari donganta na gabe saksi paboahon na dung ngot Tuhan Jesus mangulahi sian na mate.

²²Jadi sahalak sian hita na sai rap dohot Tuhan Jesus ma i dompak sai mardalani dope Tuhan Jesus rap dohot hita, mamungka sian na mandidihon si Johannes[2] lopus tu na manaek Jesus tu banua ginjang sian tonga-tonganta.”

²³Jadi ditodo halahi ma dua halak, i ma si Josep na margoar muse si Barsabbas (laing digoari muse do i si Justus) dohot si Matias.

²⁴Dung i ditangiangkon halahi ma i. Ninna halahi ma, “O Tuhan, Ho do na umboto sude roha ni jolma. Madung ditinggalkon si Judas tohonan harasulonnia. Madung mate ia. Hara ni i patuduhon ma tu hami, sanga ise do sian na dua on na nitodoMu gabe hasahatan ni karejo i manggonti si Judas.”

²⁶Dung i diundi halahi ma goar na dua i, jadi madabu ma tu si Matias. Jadi diangkat halahi ma ia gabe rasul anso rap dohot angka rasul na sabolas halak nari i.