Read Batak Angkola BAENON NI ANGKA RASUL 10 Bible Online

BAENON NI ANGKA RASUL 10 - Batak Angkola bible

BAENON NI ANGKA RASUL 10

¹Adong ma sada bayo di Kaisarea na margoar si Kornelius, i ma komandan ni “Tentara Italia”.

²Halak na mangkabiari Debata do ia jana sude do halahi sabagas sai marsomba tu Debata. Bahat do ditolong ia halak Jahudi na pogos-pogos jana sai martangiang do ia tu Debata.

³Jadi di sada ari hira-hira pukul tolu arian, tangkas ma diida ia di bagasan sada parnidaan, ro sada surusuruan ni Debata mamiohon ia, “Ale Kornelius!”

⁴Diligi ia ma tu surusuruan i mardongan biar, didok ia ma, “Aha do ulaning Tuan?” Dialusi surusuruan i ma, “Madung dijagit Debata tangiang dohot denggan ni rohamu jana diingot Debata do ho.

⁵Saonnari, suruhon ma halak tu Jope mangalap si Simon, na nigoaran muse Simon Petrus.

⁶Di bagas ni tukang kulit na margoar si Simon muse do ia manompang, di topi ni laut do bagas i.”

⁷Jadi dung kehe surusuruan na mangkobari i dohot si Kornelius, dipiohon ia ma dua halak parkarejo di bagasnia dohot sada halak tentara pangawalnia na mabiar mida Tuhan.

⁸Dipaboa si Kornelius ma tu halahi na niidania i jana disuru ia ma halahi tu Jope.

⁹Ancogotna i, di na mardalan halahi marayak lalu tu Jope, manaek ma si Petrus tu tarup ni bagas giot martangiang, hira-hira pukul dua bolas tonga ari.

¹⁰Giot mangan ma ia hara ni malena dihilala ia. Dompak na paradehon panganan i ia, ro ma sada parnidaan tusia.

¹¹Diida ia ma mungkap langit jana disurduhon ma tu toru tarsongon abit na bidang, na gantung di suhi-suhina na opat i.

¹²Adong ma disi sude binatang siopat pat, sude ragam ni binatang na manjurur dohot angka unggas na riar.

¹³Adong muse ma sora na mandok tusia, “Petrus, jongjong ma ho! Samboli ma i jana pangan!”

¹⁴Dialusi si Petrus ma, “Nada le Tuhan! Nada unjung dope hupangan na haram dohot na hodar.”

¹⁵Didok sora i ma mangulahi tusia, “Sanga aha na nihalalkon ni Debata, ulang ma etong na haram i.”

¹⁶Jabat tolu noli mulak-ulak sai ro parnidaan i, baru pe diangkat abit i tu langit.

¹⁷Sapa-sapa ma si Petrus mamikiri sanga aha arti ni parnidaan i. Dompak marpikir-pikir ia, madung dapot halak na nisuru ni si Kornelius i hape bagas ni si Simon i jana madung di jolo ni pintu ni bagas i halahi jongjong.

¹⁸Jadi dipiohon halahi ma halak laho manyapai sanga na adong do di bagas i tamu marborngin na margoar si Simon Petrus.

¹⁹Jadi di na mamikiri astuan ni parnidaan i dope si Petrus didok Tondi i ma tusia, “O Petrus, adong ro tolu halak[7] manjalahi ho.

²⁰Pasigop ma mijur jana ulang pola ganggu rohamu mangihutkon halahi, na Husuru do halahi.”

²¹Jadi mijur ma si Petrus tu toru, didok ia ma tu sitolu halak i, “Au do na nijalahanmunu i. Aha do ulaning na niharohonmunu?”

²²Dialusi halahi ma, “Na nisuru ni kapten Kornelius do hami tuson. Halak na burju do ia jana mabiar mida Debata, boti sangap do ia dibaen halak Jahudi. Na ro do sahalak surusuruan na badia marsuru ia mangidohon anso ro tuan i tu bagasnia, angke giot begeonnia jamita sian ho.”

²³Jadi disuru si Petrus ma halahi masuk, marborngin disi. Ancogotna i kehe ma si Petrus rap dohot halahi. Dohot muse do deba halak na porsaya sian Jope mangihutkon halahi.

²⁴Dung ancogotna i, lalu ma halahi tu Kaisarea. Madung disi si Kornelius rap dohot angka koum sisolkotnia songon i muse dohot angka aleale haposan ni rohana na nipiohonnia laho painte-intehon.

²⁵Dung masuk si Petrus, dialo-alo si Kornelius ma ia jana unduk ma ia di jolo ni pat ni si Petrus.

²⁶Tapi ditogu si Petrus ma ia jongjong, jana didok ma tusia, “Jongjong ma ho! Au pe laing jolma do.”

²⁷Hatiha na mangkobari i, laing masuk ma si Petrus tu bagas i. Madung marlagut bahat halak disi diida ia.

²⁸Dung i mandok hata ma ia tu halahi, “Diboto hamu do, na so tola do halak Jahudi hara ni ugamo ni halahi mardongan dohot angka bangso na asing sanga masuk tu bagas ni halahi. Tapi madung dipatidahon Debata tu au, na so tola dokkononku hodar sanga haram sanga na ise pe.

²⁹Hara ni i, nada dokdok rohangku di na nipio au ro tuson. Jadi saonnari husapai ma hamu, aha ma harana dibaen na nipiomunu au?”

³⁰Dialusi si Kornelius ma, “Tolu ari na salpu, laing tarsongon on ma hatiha i pukul tolu arian, martangiang[8] do au di bagaskon. Na so huambang-ambang ro ma sada bayo jongjong di jolongku. Marlinang noma idaon baju ni bayo i.

³¹Didok ia ma, ‘Kornelius! Madung dijagit Debata tangiangmi jana diingot Ia do denggan ni rohamu.

³²Antong suru ma halak tu Jope mangalap bayo na margoar si Simon Petrus, na marborngin di bagas ni tukang kulit na margoar si Simon muse, di topi laut do bagas i.’

³³Hara ni i do umbaen na husuru manigor halak mangalap tuan i. Jana songon i ma burju ni rohamu ro tuson. Saonnari madung lagut hami dison, di adopan ni Debata laho umbege sudena na nitonahon ni Tuhan tu ho.”

³⁴Dung i mandok hata ma si Petrus, “Saonnari tangkas ma huastui, na sarupa do hape sude jolma diida Debata.

³⁵Sanga ise na mabiar mida Debata jana na mambaen na denggan dijagit Debata do halahi, so pola marimbar sanga sian bangso dia.

³⁶Hamu ale angka dongan, tontu madung diboto hamu isi ni jamita na nipabolkas ni Debata tu halak Israel. Jamita Na Denggan do barita i na paboahon dame markite-hite Jesus Kristus, i ma Tuhan ni sude jolma.

³⁷Tontu diboto hamu muse do ale angka dongan, sanga aha na tarjadi di sude Luat Judea, i ma na mamungka sian Galilea dung hamamasa ni pandidion na nidok ni si Johannes.

³⁸Diboto hamu do, na dung dipili Debata do Jesus halak Nasaret i, jana dilehen tuSia Tondi Parbadia dohot kuaso. Laing diboto hamu do, na dung mardalani Jesus i tudia-tudia mambaen na denggan; dipamalum Ia sudena halak na nitaluhon ni Sibolis, angke didongani Debata do Ia.

³⁹Hami sandiri ma na marnida sasudena na nibaenNia i di luat ni halak Jahudi dohot di Jerusalem. Tapi haru songon i pe diparsilangkon halahi do Ia jana dibunu.

⁴⁰Hape di ari patoluhon dipangolu Debata ma Ia mangulahi sian hamatean jana patidahon diriNa tu halak;

⁴¹nada tu na sabangso on, tapi hum tu hami do, i ma na dung jolo dipili Debata hian gabe saksiNia: Mangan minum do hami rap dohot Ia dung mulak mangolu Ia sian hamatean.

⁴²Jana disuruhon Ia ma hami mamaritahon Jamita Na Denggan i tu bangso on, dohot mangalehen hasaksian paboa Ia do na niangkat ni Debata gabe Panguhum tu angka jolma na mangolu dohot tu angka jolma na dung mate.

⁴³Sude do angka panurirang manaringoti Ia. Didok halahi, dapotan hasesaan ni dosa do sudena halak na porsaya tu Jesus, markite-hite goarNia.”

⁴⁴Dompak na mandok hata i dope si Petrus, mijur ma Tondi Parbadia manggohi sudena halak na umbege barita i.

⁴⁵Homang ma roha ni halak Jahudi na dung porsaya i tu Jesus, i ma na rap dohot si Petrus i, na marnida bahaso dilehen Debata do muse Tondi Parbadia tu bangso na asing.

⁴⁶Angke dibege halahi do mangkobari angka bangso na asing i di bagasan hata na marragam-ragam dohot mamuji-muji hagodangan ni Debata. Jadi didok si Petrus ma,

⁴⁷“Ligi hamu ma! Madung dapotan Tondi Parbadia halak on songon hita. Tarlarang jolma dope he halahi pandidihonon dohot aek?”

⁴⁸Dung i disuru si Petrus ma halahi nididihon markite-hite goar ni Jesus Kristus. Dung i dipangido halahi ma anso laing tinggal si Petrus rap dohot halahi sanga na piga-piga ari honokna.