Read Batak Angkola BAENON NI ANGKA RASUL 13 Bible Online

BAENON NI ANGKA RASUL 13 - Batak Angkola bible

BAENON NI ANGKA RASUL 13

¹Adong do angka panurirang dohot angka guru di parlagutan na di Antiokia. I ma angka si Barnabas, si Simeon na nigoaran muse si Niger (astuanna ‘Si Lomlom’), si Lukius halak Kirene, si Menahem, bayo na dipagodang-godang rap dohot Gubernur Herodes[12] dohot si Saulus.

²Jadi sanoli dompak marsomba halahi tu Tuhan jana puaso, ro ma Tondi Parbadia tu halahi mandok, “Paasing hamu ma si Barnabas dohot si Saulus di Au, anso markarejo halahi di parkarejoan na Hutontuhon tu halahi.”

³Dung jolo puaso jana martangiang, dipayakkon halahi ma tanganna be tu si Barnabas dohot tu si Saulus, jana disuru halahi ma si dua halak i.

⁴Hara ni parsuru ni Tondi Parbadia, kehe ma si Barnabas dohot si Saulus tu Seleukia. Sian i, markapal ma halahi tu pulo Siprus.

⁵Dung lalu di Salamis, dijamitahon halahi ma hata ni Debata di angka bagas paribadatan ni halak Jahudi. Diurupi si Johannes Markus ma halahi di pardalanan i.

⁶Didalani halahi ma sude pulo i lopus tu Papos. Marsuo ma halahi disi dohot sada halak Jahudi na margoar si Barjesus. Parelmu jana panurirang pargabus do ia.

⁷Maraleale muse do bayo parelmu on tu si Sergius Paulus gubernur ni pulo i. Na pistar do gubernur i boti na malo. Dipio ia do si Barnabas dohot si Saulus, hara ni por ni rohania laho umbege hata ni Debata.

⁸Hape dialo si Elimas parelmu i ma si Barnabas dohot si Saulus. Diusahohon si Elimas ma (i ma goarnia di hata Junani) anso ulang sanga porsaya gubernur i tu Jesus.

⁹Tapi digohi Tondi Parbadia ma si Saulus, na nigoaran muse si Paulus, dipanotnoti ia ma bayo parelmu i,

¹⁰didok ia ma, “O anak ni Sibolis! Ho ma musu ni sude na denggan. Biasi dope laing so ra mantak ho manyego-nyego Dalan Ni Tuhan na tigor i?

¹¹Ligi ma saonnari uhumon ni Tuhan ma ho, lopus nada idaonmu be sondang ni mataniari piga-piga ari on,” ning si Paulus. Manigor taraso ma di si Elimas, songon na adong na golap manutup matania i, gabe gapa-gapa noma ia mardalan manjalahi halak manogu ia.

¹²Dung diida gubernur i songon i tarjadi, porsaya ma ia; angke na homang situtu do rohania mida pangajaran taringot tu Tuhan i.

¹³Sian Papos markapal ma si Paulus rap dohot angka dongannia i tu Perga na di kota Pamfilia. Ditadingkon si Johannes ma halahi disi, mulak ia tu Jerusalem.

¹⁴Sian Perga didalani halahi ma lalu tu Antiokia na di Pisidia. Dung Ari Sabat kehe ma halahi masuk tu bagas paribadatan.

¹⁵Dung disise Buku Ni si Musa dohot Buku Ni angka Panurirang, disuru angka pamimpin ni ibadat na disi i ma betak adong na giot mandok hata di halahi. “Hamu ale angka dongan, betak na adong do sipaingotmunu tu angka halak na bahat on, dok hamu ma.”

¹⁶Jadi jongjong ma antong si Paulus, dihiap ia ma dohot tangannia, laho mandok hata ia, “Hamu ale angka dongan halak Israel, bope sude angka dongan na asing na mangkabiari Debata na adong dison! Marsitangi-tangian ma jolo hita:

¹⁷Madung dipili Debata ni Israel angka ompunta i, jana dibaen Ia gabe bangso na godang bangsonta on hatiha halak dagang halahi di tano Mesir, dung i diparuar Ia ma halahi sian i markite-hite gogoNia.

¹⁸Sobar do Ia paida-ida pangalaho ni halahi[13] opat pulu taon honokna di halongonan i.

¹⁹Dung i dironcohon Ia pitu bangso di tano Kanaan, dilehen Ia ma tano i di halahi gabe teanonna.

²⁰Opat ratus lima pulu taon honok ni i sudena.[14] Dung sidung dibagi-bagi tano Kanaan i, dilehen Debata ma angka panguhum ni halahi, Panurirang Samuel ma panguhum na parpudi.

²¹Dung i dipangido halahi ma sada raja. Dilehen Debata ma di halahi si Saul anak ni si Kis sian marga ni halak Benyamin gabe raja ni halahi, opat pulu taon honokna.

²²Dung i dipaijur Debata ma ia sian juguhannia i, dipabangkit Debata ma si Daud gabe raja ni halahi. Jana on ma na nidok ni Debata tu si Daud, ‘Si Daud anak ni si Isai i do na pasonang rohangKu. Ia do na giot patuluskon hagiotKu.’

²³Sian pomparan ni si Daud i ma dipabangkit Debata sada Sipalua di halak Israel, laing songon na nijanjihonNia i hian. Jana Jesus do Kristus i.

²⁴Dompak so dipungka Jesus padalan karejoNia, jolo dipaboa si Johannes do tu halak Israel anso muba roha ni halahi manadingkon angka dosa ni halahi be jana nipandidihon.

²⁵Jana marayak sidung angka karejonia i, didok si Johannes do tu angka jolma i, ‘Ise do au ninna rohamunu? Nada au na nipainte-intemunu i. Ingot hamu ma, parpudi dope ro i ulang au; mangkarhari tali ni sipatuNia pe nada tama dope au.’

²⁶Hamu ale angka dongan pinompar ni si Abraham, bope sude angka dongan na asing na adong dison, angka na mangkabiari Debata! Madung ditongos Debata tu hita Jamita haluaan i;

²⁷angke na so pamotoan ni halak Jerusalem dohot angka pamimpin ni halahi, hapengani Ia do Jesus i. Na so mangarti do halahi na tarsurat di pangajaran ni angka panurirang haru pe disise halahi i ganop Ari Sabat, gabe diuhumi halahi ma Jesus. Tapi hara ni na nibaen ni halahi songon i gabe tulus ma na nidok ni angka panurirang hian.

²⁸Haru pe so adong dapot halahi sanga aha na patut mambaen hona bunu Ia, hape laing digogohon halahi do tu si Latus anso laing dibunu Ia.

²⁹Jadi dung salose sudena dibaen halahi na tarsurat taringot tuSia, dipaijur halahi ma bangkeNa i sian hayu parsilang i, dipayakkon halahi ma Ia di kuburan.

³⁰Hape dipangolu Debata ma Ia mangulahi sian na mate i.

³¹Jadi dipataridahon Ia do diriNia sanga na piga-piga ari tu angka donganNia na ro sian Galilea tu Jerusalem. Halahi ma na gabe saksiNia tu halak Israel.

³²Jadi saonnari, na pasahatkon Jamita Na Denggan i ma hami tu hamu ale angka dongan: Sanga aha na nijanjihon ni Debata tu angka ompunta,

³³madung dipatulus Ia i sude tu hita markite-hite na nipangoluNia Jesus mangulahi sian hamatean. Angke tarsurat do di Masmur paduahon songon on, ‘AnakKu do Ho, sadari on ma Au gabe AmangMu.’

³⁴Madung dipangolu Debata Ia mangulahi sian hamatean. Jadi saonnari nada be daionNia hamatean na di kuburan. Taringot tusi pe didok Debata do, ‘LehenonKu ma tu hamu janji na badia na angkon patuluson, i ma na dung Hujanjihon tu si Daud.’

³⁵Hara ni i didok Ia di Masmur na asing, ‘Nada loasonMu halak na badiaMu marnida habusuhon i.’

³⁶Madung mate si Daud jana ditanom muse rap dohot angka ompunia, dung dibaen ia sanga aha na nisuruhon ni Debata baenonnia. Abis muse do sude malangke pamatang ni si Daud.

³⁷Tapi anggo Jesus na nipangolu ni Debata mangulahi sian hamatean, nada malangke pamatangNa i.

³⁸Antong patut ma botoonmunu, ale angka dongan, markite-hite Jesus do dijamitahon di hamu hasesaan ni dosa,

³⁹jana nipatigor do ganup halak na porsaya diSia. Nada tarpalua hamu markite-hite tona ni si Musa.

⁴⁰Hara ni i ma umbaen na angkon tangkas parrohahononmunu ale angka dongan, anso ulang jabat tarjadi tu hamu[15] songon na nidok ni angka panurirang, songon on,

⁴¹‘Tangkas ma parrohahon hamu, ale angka pangincahi! Homang ma rohamunu, lopus mate! Angke Hubaen do di hatiha on pangalaho na so tarhaporsayai hamu sandiri, haru pe adong halak na patorangkonsa tu hamu.’ ”

⁴²Di na laho kehe si Paulus dohot si Barnabas sian bagas paribadatan i, dipangido angka halak na maribadat i ma anso laing ro halahi mangulahi di Ari Sabat na mangihut, laho patorangkon na nidok ni halahi i tumangkas.

⁴³Dung haruar halak na bahat i sian bagas paribadatan i, bahat ma halak Jahudi mangihutkon si Paulus dohot si Barnabas. Dipaingot rasul si dua halak i ma halahi anso marpos ni roha tu asi ni roha ni Debata halahi.

⁴⁴Di Ari Sabat na mangihut i, bolas dohonon, sude halak na di kota i marroan laho umbege hata ni Tuhan.

⁴⁵Jadi dung diida halak Jahudi songon i, gabe mangiburu ma halahi. Diincahi halahi ma si Paulus jana dialo halahi ma sude hata na nidoknia i.

⁴⁶Tapi mur barani do si Paulus dohot si Barnabas mandok hata. Didok halahi ma, “Tutu do i angkon jolo paboaon do hata ni Debata tu hamu. Tapi hara ni na so ra hamu manjagitsa disi ma ditontuhon hamu sandiri paboa na so tama hamu manjagit ngolu na so mantak i. Jadi saonnari tadingkononnami ma hamu, kehe ma hami mandapotkon bangso na asing.

⁴⁷Angke songon on do diparentahon Tuhan tu hami di na nidokNia, ‘Madung Hutontuhon hamu gabe sada sondang tu angka bangso na asing na so Jahudi; anso paroonmunu haluaan tu na satano on.’ ”

⁴⁸Dung dibege angka bangso na asing na so Jahudi i hata ni halahi i, jop ma roha ni halahi, dipapuji-puji halahi ma hata ni Tuhan i. Gabe porsaya ma angka halak na nitontuhon ni Debata laho manjagit ngolu na so mantak i.

⁴⁹Sar ma barita taringot tu hata ni Tuhan i di na saluat i.

⁵⁰Tapi dijajang halak Jahudi i ma angka dadaboru sian halak na sangap angka na mangkabiari Debata. Dipatubu halahi ma goyak ni roha mida si Paulus dohot si Barnabas, jana dipaorot halahi ma halahi na dua sian luat i.

⁵¹Dung i dipaspaskon rasul na dua i ma abuan ni pat ni halahi di jolo ni halak na bahat i, i ma na gabe songon sipaingot. Kehe ma halahi tu Ikonium.

⁵²Sai marmoga-moga do angka siihutkon Jesus na di Antiokia boti digohi Tondi Parbadia do halahi.