Read Batak Angkola BAENON NI ANGKA RASUL 15 Bible Online

BAENON NI ANGKA RASUL 15 - Batak Angkola bible

BAENON NI ANGKA RASUL 15

¹Adong ma piga-piga halak sian Judea ro tu Antiokia, mangajari ma halahi tu angka na porsaya na di kota i mandok, “Nada dapotan haluaan hamu, muda so jolo disunat mangihutkon adat na niajarkon ni si Musa.”

²Manggogo do si Paulus dohot si Barnabas mangalo halahi. Ujungna ditontuhon ma anso kehe si Paulus dohot si Barnabas rap dohot deba nari na asing tu Jerusalem laho manaringoti salaho tusi tu angka rasul dohot angka pangituai na disi i.

³Dipataru parlagutan na di Antiokia i ma halahi lalu tu balian ni kota i, halahi pe torus ma mardalan mamolus sian Punisia lalu tu Samaria. Dipaboa halahi ma disi sanga tarbia pangalahona angka bangso na asing na so Jahudi na gabe dohot pasahat dirina tu Debata. Moga sajo do roha ni angka halak na porsaya i disi umbege barita i.

⁴Jadi dung lalu halahi di Jerusalem, denggan do halahi dijagit parlagutan i, songon i dohot angka rasul i bope angka pangituai na disi. Jadi dicaritohon halahi ma tu angka halak na disi sudena na nibaen ni Debata markite-hite halahi.

⁵Tapi ro ma deba sian halak Parise na dung porsaya, jongjong mandok hata, “Anggo bangso na asing i na dung gabe porsaya angkon laing nisunat do halahi jana aturkonon laho mangihutkon angka tona ni si Musa.”

⁶Dung i marlagut ma angka rasul dohot angka pangituai i laho mangkatai taringot tusi.

⁷Lolot do halahi na martukar pikiran i. Ujungna jongjong ma si Petrus mandok hata, “Hamu ale angka dongan! Diboto hamu do di hatiha na salpu, dipili Debata do au sian tonga-tongamunu laho manjamitahon Jamita Na Denggan i tu angka halak na asing na so Jahudi, anso dohot halahi umbegesa dohot mangkaporsayai.

⁸Jana dipatandahon Debata siida roha ni jolma i do na dung nijagitNia halahi; i ma na nipatuduhonNia di na nilehenNia Tondi Parbadia tu halahi laing songon na dung nilehenNia i tu hita muse.

⁹Nada mardia imbar hita sian halahi dibaen Debata. Dipaias Ia do roha ni halahi, hara ni na porsaya halahi.

¹⁰Antong, hara ni aha dehe umbaen na diujimunu Debata saonnari markite-hite na mangalehen boban na dokdok tu angka sisean on, hape salang angka ompunta i pe dohot hita sandiri so tolap padalankon i?

¹¹Di balik ni i tahaporsayai do, hum hara ni ibo ni roha ni Tuhan Jesus sajo do umbaen na malua hita; laing songon i muse ma halahi.”

¹²Gabe tarhohom ma sudena na marlagut i disi. Dung i dibege halahi ma si Barnabas dohot si Paulus mangulahi mambaritahon sudena tanda-tanda dohot hahomangan na nibaen ni Debata markite-hite halahi di tonga-tonga ni bangso na asing na so Jahudi.

¹³Dung sidung halahi mangkatai didok si Jakobus ma, “Hamu ale angka dongan! Marsitangi-tangian ma jolo hita.

¹⁴Madung nipajojor si Simon bahaso sian mulana madung dipatuduhon Debata holongNia tu angka bangso na asing, anso laing dohot sian halahi dipili Debata na gabe bangsoNia.

¹⁵Mardomu do i tu hata ni angka panurirang, songon na tarsurat,

¹⁶‘Dung i mangulahi ma Au ro, pajongjongonKu ma mangulahi bagas ni si Daud na marumpak i, jana patureonKu ma sego-segona i, anso Hupajongjong mangulahi;

¹⁷anso sude halak na teba i manjalahi Tuhan, rap dohot angka bangso na asing na so Jahudi, i ma na dung Hupiohon gabe Au puna.’ Songon i ma pandok ni Tuhan i,

¹⁸na dung paboahon pangalaho i sian na jolo.”

¹⁹“Jadi anggo mangihutkon pandapotku, nada tola be arsahanta angka bangso na asing na so Jahudi i, na dung pauba rohana tu Debata.

²⁰Tapi angkon laing tatongos ma surat tu halahi paingotkon halahi anso ulang dipangan halahi angka sipanganon na hodar na nihaulkon tu gana-ganaan, sanga markarosuan, sanga pe na mangankon pahan-pahanan na nisongkik sanga mangan mudar. Boti anso laing dipadao halahi dirina sian angka pangalaho na jorngang.

²¹Harana anggo angka Tona Ni si Musa, madung dibaca i sian nabaruon ganop Ari Sabat di angka bagas paribadatan, jana nijamitahon di ganop kota.”

²²Putus ma tahi ni angka rasul dohot angka pangituai rap dohot sude anggota ni parlagutan i laho mamili sanga na piga-piga halak sian halahi sisuruon tu Antiokia mandongani si Paulus dohot si Barnabas. Jadi ditodo halahi ma si Silas dohot si Judas na nigoaran muse si Barsabbas. Halak na sangap do halahi na dua dietong sian angka na porsaya di Jerusalem.

²³Laing maroban surat do halahi na nisuru i, songon on ma hata ni surat i, “Mandapotkon angka dongan na porsaya na marasal sian bangso na asing na so Jahudi, na maringanan di Antiokia, di Siria dohot di Kilikia. Tabe ma di hamu sian donganmunu, i ma angka rasul dohot angka pangituai.

²⁴Hami bege do adong sian hami on na ro mandapotkon hamu jana mambaen gurgar rohamunu jana gaor pikiranmunu hara ni na niajarkon ni halahi i. Hape nada na hami suru halahi.

²⁵Hara ni i gabe marrapot do hami jana saroha do sude mamili piga-piga halak mandapotkon hamu angka dongan. Ro ma halahi mandapotkon hamu rap dohot donganta si Paulus dohot si Barnabas na hami haholongi.

²⁶Na dung dohot do halahi na dua mangalehen hosana hara ni Tuhanta Jesus Kristus.

²⁷Jadi hami suru ma si Judas dohot si Silas mandapotkon hamu. Patangkason ni halahi sandiri ma tu hamu hata ni surat on.

²⁸Madung tumbuk di roha ni Tondi Parbadia — jana i do na hami ihutkon anso ulang be nilehen boban na dumokdok sian boban na umporlu on:

²⁹Ulang ma pangan hamu sipanganon na nihaulkon tu gana-ganaan, ulang pangan hamu mudar, ulang pangan hamu binatang na nisongkik, jana ulang ma adong sian hamu angka pangalaho na markarosuan. Muda dipadao hamu dirimunu sian angka pangalaho na songon i, na denggan noma baenonmunu. Horas ma di hamu, botima!”

³⁰Jadi dung marsijalangan, kehe ma halahi na nisuru i tu Antiokia. Dung lalu halahi di Antiokia, dipio halahi ma marlagut sude anggota ni parlagutan i laho pasahatkon surat i.

³¹Di na manyise surat i anggota ni parlagutan i, moga sajo ma halahi hara ni hata ni surat i na mangapoi roha ni halahi.

³²Honok do si Judas dohot si Silas panurirang i mangkobari dohot angka dongan na porsaya i di Antiokia laho pagomos roha dohot patoguhon roha ni halahi.

³³Dung adong sanga na sadia honok disi si Judas dohot si Silas, dipabuat halahi ma rasul na dua i mulak jana disuru halahi ma anso dipalalu tabe tu angka na marsuru halahi. [

³⁴Tapi anggo si Silas laing tinggal dope ia disi.]

³⁵Si Paulus pe dohot si Barnabas laing honok dope tinggal di Antiokia. Mangajari do halahi disi jana marjamita taringot tu hata ni Tuhan rap dohot angka dongan na asing i.

³⁶Nada sadia honok dung i, didok si Paulus ma tu si Barnabas, “Beta ma tatopoti mangulahi angka dongan sahaporsayaan di sude kota na dung tatopoti i nabaruon, tajamitahon ma disi hata ni Tuhan i, anso laing taida sanga na tarbia do pangalaho ni halahi,” ning ia.

³⁷Sai giot obanon ni si Barnabas do nian si Johannes Markus,

³⁸hape nada tumbuk be tu roha ni si Paulus padohot si Markus, hara ni na so ra ia rap markarejo dohot halahi di na nitadingkonnia halahi di Pamfilia, na salpu i.

³⁹Gabe marbada godang ma si Paulus dohot si Barnabas lopus marsirang halahi: Dioban si Barnabas ma si Markus markapal laut tu Siprus.

⁴⁰Ditodo si Paulus ma si Silas dongannia, kehe ma halahi dung jolo dipasahat angka dongan na di Antiokia halahi tu Tuhan na manghaholongi halahi.

⁴¹Didalani halahi ma Siria dohot Kilikia; dipatogu halahi ma roha ni angka parlagutan na disi.