Read Batak Angkola BAENON NI ANGKA RASUL 16 Bible Online

BAENON NI ANGKA RASUL 16 - Batak Angkola bible

BAENON NI ANGKA RASUL 16

¹Dipatorus si Paulus ma mardalan tu Derbe, lopus tu Listra. Adong do disi sahalak sisean na margoar si Timoteus. Boru Jahudi do inangnia, tapi madung porsaya tu Jesus; tapi anggo amangnia halak Junani do.

²Sian tonga-tonga ni angka na porsaya na adong di Listra dohot Ikonium, tarbarita do na burju si Timoteus on.

³Giot ni si Paulus dohot ma nian si Timoteus rap dohot ia; jadi gabe dipasunatkon ia ma si Timoteus. Angke sude halak Jahudi na di luat i mamboto, halak Junani do amang ni si Timoteus.

⁴Di sude kota na nitopot ni halahi i, dipasahat halahi ma haputusan na nibaen ni angka rasul dohot angka pangituai na di Jerusalem i. Dipaingot halahi ma angka dongan na porsaya i anso didalankon halahi angka aturan i.

⁵Jadi mur dipatogu ma haporsayaan ni parlagutan i, jana mur martamba bahat ma ganop ari.

⁶Nada dipatola Tondi Parbadia pararaton ni si Paulus dohot si Silas hata ni Debata anggo di Asia. Jadi tu Prigia dohot tu Galatia noma dipatorus halahi mardalan.

⁷Dung lalu halahi di parbalohan ni Misia dirohahon halahi ma anso masuk nian tu Bitinia, hape dilarang Tondi Ni Jesus do halahi tusi.

⁸Jadi dipatorus[16] halahi ma sian Misia lopus lalu tu Troas.

⁹Bornginna i di Troas diida si Paulus ma ro sada halak Makedonia jongjong di jolonia mangido dohot gomos anso taripar ia tu Makedonia mangurupi halahi.

¹⁰Dung dijagit si Paulus parnidaan i, manigor markobas ma hami anso kehe tu Makedonia. Angke putus do rohanami mandok, na nisuru ni Debata do hami manjamitahon Jamita Na Denggan i tu angka halak na disi.

¹¹Hami tadingkon ma Troas torus ma hami markapal tu Samotrake, ancogotna i tu Neapolis.

¹²Sian i ma hami tu Pilippi, i ma sada kota di luat na parjolo di Makedonia.[17] Jajahan ni halak Rom do kota i. Disi ma hami piga-piga ari.

¹³Hatiha Ari Sabat kehe ma hami tu topi ni batang aek na di ruar ni horbangan ni kota i, angke disi do ninna rohanami inganan parsumbayangan ni halak Jahudi. Jadi hami pajuguk ma disi mangkata-hatai rap dohot angka dadaboru na dung marlagut hian disi.

¹⁴Adong ma sahalak sian halahi parjagal abit ungu, si Lidia goarna halak Tiatira. Holong do rohania tu Debata, gabe diungkap Debata ma rohania laho manjagit na niajarkon ni si Paulus tusia.

¹⁵Tardidi ma si Lidia dohot halahi na sabagas. Dung nididihon ia, diontang ia ma hami. Didok ia ma tu hami, “Muda na dung tutu do au porsaya tu Tuhan i dietong rohamunu ale angka dongan, antong di bagasku ma hamu manompang,” ning ia. Digogohon ia ma anso laing hami oloi pangidoannia i.

¹⁶Di sada ari hatiha kehe hami tu inganan partangiangan, marsuo ma hami dohot sada hatoban dadaboru. Na hona setan do anak boru i, jana tarpaboa setanna i do sanga aha na giot masa. Hara ni na sai mangaligi nasib ni halak ia, gabe bahat ma parlaboan ni angka tuannia.

¹⁷Sai dipaihut-ihut anak boru i ma si Paulus dohot hami, marsurahi ma ia, “Naposo ni Debata na gumogo i do halak on! Ro pe halahi, na giot paboahon dalan haluaan do tu hamu ale angka dongan!” ning ia.

¹⁸Sanga na piga ari sai songon i ma dipardokkoni ia. Goyak ma roha ni si Paulus umbegesa, gabe humusor ma ia manaili tu anak boru i didok ia ma tu tondi i, “Mangasahon goar ni Jesus Kristus, huparentahon anso ruar ho sian anak boru i!” ning ia. Manigor ditadingkon tondi i ma anak boru i.

¹⁹Jadi dung torang diboto angka tuanna i na so adong be dapot halahi parlaboan sian ia, ditangkup halahi ma si Paulus dohot si Silas, ditarik halahi ma sidua halak i tu balerong mangadop tu na markuaso.

²⁰Dioban halahi ma si Paulus dohot si Silas mangadop tu jolo ni angka panjabat ni pamarenta Rom, dung i didok halahi ma, “Halak Jahudi do halak on. Mambaen gaor halahi di kotanta on.

²¹Disosoi halahi do halak anso mangihutkon adat na maralo tu aturan na somal di hita halak Rom. Nada tarjagit hita angka adat na songon i!” ninna halahi.

²²Halak na bahat pe dohot ma mangaroro rasul na dua i; songon i panjabat ni pamarenta i pe, disibak halahi ma pakean ni si Paulus dohot si Silas jana disuru halahi ma halak mangaloncing halahi na dua.

²³Jadi dung digogo halahi mangaloncing na dua i, dipamasuk ma halahi tu hurungan. Disuru ma kapala ni hurungan i, anso dijago ia dohot denggan sidua halak i.

²⁴Jadi hara ni parenta i, dipamasuk kapala ni hurungan i ma halahi na dua tu kamar parbagasan situtu di hurungan i jana dibayangkon ia dope pat ni halahi tu balok.

²⁵Hira-hira tonga borngin, martangiang ma si Paulus dohot si Silas, angka marende bage halahi mamuji Debata. Dibege angka halak na tarhurung na asing i do halahi na marende i.

²⁶Jadi tompu ma ro lalo na lobi gogo, jabat humutur dohot ojahan ni hurungan i. Marbuka ma sude pintu ni hurungan i jana martaldusan muse ma angka rante ni na tarhurung i sude.

²⁷Tarsonggot ma kapala ni hurungan i, ngot ma ia. Dung diida ia na dung marbuka angka pintu ni hurungan i, disintak ia ma podangnia laho maniham dirinia, diambang ia na dung marlojong sude angka na tarhurung i.

²⁸Hape marsurak ma si Paulus sagogonia, “Ulang hahua dirimu! Dison do hami sudena!” ning ia.

²⁹Dipangido kapala ni hurungan i ma sulu, dilojong ia tu bagasan. Humitir ma ia manungkap di jolo ni si Paulus dohot si Silas.

³⁰Dung i dioban ia ma halahi tu ruar, didok ia ma, “Ale tuan, aha do sibaenonku anso dapot au haluaan i?” ning ia.

³¹Dialusi si Paulus ma dohot si Silas, “Porsaya ma ho tu Tuhan Jesus! Dapotan haluaan ma ho, dohot sude halak na adong di bagasmu!” ninna halahi.

³²Dung i dipajojor si Paulus ma dohot si Silas hata ni Tuhan tu kapala ni hurungan i dohot tu sude halak na di bagasna i.

³³Laing di tonga borngin i, dioban kapala ni hurungan i ma halahi, dipaias ia ma angka bugang hara ni pangaloncingan i. Gabe manigor dipandidihon ma ia dohot sude halahi na sabagas.

³⁴Dung i dioban ia ma si Paulus dohot si Silas tu bagasnia dihobasi ma panganon di halahi. Jop sajo noma rohania dohot halahi na sabagas hara ni na dung porsaya halahi saonnari tu Debata.

³⁵Ancogotna i, disuru angka panjabat ni pamarenta Rom i ma polisi tu hurungan laho paboahon parenta anso nipalua si Paulus dohot si Silas.

³⁶Dipaboa kapala ni hurungan i ma tu si Paulus, ning ia ma, “Madung ro parenta sian angka panjabat ni pamarenta laho paluahon tuan i. Mulak ma hamu di bagasan hahorasan!”

³⁷Tapi didok si Paulus ma tu angka polisi na ro i, “Warga negara Rom do hami. Haru so jolo diadili, hape manigor diloncingi hami di jolo ni halak na bahat jana dipamasuk tu hurungan. Hape saonnari suruon ni halahi ma hami kehe sajo songon i sip-sip? Inda ra hami songon i! Suru hamu angka panjabat ni pamarenta i ro tuson. Angkon halahi sandiri do ro paluahon hami,” ning ia.

³⁸Dilapurkon angka polisi i ma songon i tu angka panjabat ni pamarenta Rom. Dung dibege halahi warga negara Rom do hape si Paulus dohot si Silas, gabe mabiar ma halahi.

³⁹Dung i kehe ma halahi mangido maap tu si Paulus dohot si Silas, jana ditaruhon halahi ma sidua halak i ruar sian hurungan i; dipangidohon halahi muse ma anso laing morot halahi na dua sian kota i.

⁴⁰Kehe ma si Paulus dohot si Silas sian hurungan i tu bagas ni si Lidia. Dung marsuo bohi halahi rap dohot angka na porsaya disi, diapoi halahi na dua ma roha ni halahi, dung i kehe ma si Paulus dohot si Silas.