Read Batak Angkola BAENON NI ANGKA RASUL 17 Bible Online

BAENON NI ANGKA RASUL 17 - Batak Angkola bible

BAENON NI ANGKA RASUL 17

¹Didatdati si Paulus dohot si Silas ma pardalanan ni halahi i, dibolus halahi ma Ampipolis dohot Apolonia lopus lalu tu Tessalonika. Adong do disi bagas paribadatan ni halak Jahudi.

²Jadi songon na somal, kehe ma si Paulus tu paribadatan i mangkobar-hobari dohot angka halak na disi i taringot tu angka ayat-ayat na di Buku Na Badia i. Tolu Ari Sabat diulak-ulahi ia kehe tusi.

³Dipatorang ia ma tu halahi jana dipatangkas ia markite-hite ayat ni Buku Na Badia i bahaso na porlu do manaon parkancitan Kristus na nijanjihon ni Debata i jana mulak mangolu sian hamatean. “Jesus na hupaboa i tu hamu, i ma da ibana Kristus i,” ning si Paulus.

⁴Adong ma deba na ra porsaya, manigor diihutkon halahi ma si Paulus dohot si Silas; laing songon i muse ma angka halak Junani na mangkabiari Debata jana bahat dope dohot angka dadaboru ni halak na pangkat.

⁵Tapi mangiburu ma halak Jahudi i. Dipio halahi ma angka parlompong na di pasar i mambaen garombolan ni sipanggaori. Digaori halahi ma sude kota i, disaroso halahi ma bagas ni si Jason laho manjalahi si Paulus dohot si Silas, harana giot boanon ni halahi do si Paulus dohot si Silas tu jolo ni halak na bahat.

⁶Tapi hara ni na so dapot halahi si Paulus dohot si Silas gabe si Jason ma ditarik halahi dohot deba nari na porsaya i tu jolo ni angka panjabat na markuaso di kota i. Marsurak ma halahi, “Angka on ma sipanggaori i di na satano on! Saonnari giot di hita on ma halahi manggaori,

⁷jana madung dijagit si Jason on halahi di bagasnia. Sude do halahi mangalo aturan ni Kesar, harana didok halahi, adong dope raja na asing na margoar Jesus.”

⁸Tarsonggot be ma halak na bahat dohot angka parkuaso na di kota i dung dibege halahi angka hata sinangkinan i.

⁹Dung i disuru parkuaso i ma si Jason dohot halak na porsaya na asing i manggarar hepeng jaminan. Baru pe anso dipalua halahi.

¹⁰Jadi manigor disuru angka dongan na porsaya i ma si Paulus dohot si Silas borngin i tu Berea. Dung lalu disi, kehe ma si Paulus dohot si Silas tu bagas paribadatan ni halak Jahudi.

¹¹Umburju do roha ni halak Berea ulang pado halak na di Tessalonika. Jop do roha ni halahi umbege barita taringot tu Jesus, jana ganop ari do dipareso-reso halahi Buku Na Badia i laho patangkaskon sanga na tutu do na niajarkon ni si Paulus.

¹²Bahat do sian halahi na gabe porsaya tu Jesus, jana miduk muse do sian halak Junani angka na marpangkat, adong dadaboru dohot halaklahi.

¹³Jadi dung diboto halak Jahudi na di Tessalonika na dung dihobarkon ni si Paulus muse hata ni Debata di Berea, gabe ro muse ma halahi tu Berea laho mangirang-irangi halak anso ganggu rohana.

¹⁴Diompoti angka dongan na porsaya i ma manaruhon si Paulus tu topi ni laut. Tapi anggo si Silas dohot si Timoteus laing di kota i dope halahi.

¹⁵Dung ditaruhon halahi si Paulus lopus tu Atena, mulak ma dongan i mangulahi tu Berea. Laing dioban halahi do tona ni si Paulus anso satibu-tibuna si Silas dohot si Timoteus ro mandapoti ia.

¹⁶Di na painte-intehon si Silas dohot si Timoteus si Paulus di Atena, marsak ma rohania mida kota i hara ni gokna disi angka gana-ganaan.

¹⁷Jadi hara ni i mangkobar-hobari ma ia di bagas paribadatan i rap dohot halak Jahudi dohot halak na asing na manyomba Debata disi. Di poken i pe laing dialo ia do mangkobari halak na adong disi.

¹⁸Tapi adong do deba sian golongan Epikuros dohot golongan Stoa, na marsoal dohot ia; jadi deba sian halahi mandok, “Aha ma he na giot dohonon ni na matubekbek on lakna?” Adong muse na asing mandok, “Idaon na maroban ajaran taringot tu angka debata na asing do ia,” dibaen dijamitahon ia do jamita na denggan taringot tu Jesus dohot hangongot ni angka na mate.[18]

¹⁹Dung i dioban halahi ma si Paulus tu inganan parrapotan na di Dolok Areopagus. Didok halahi ma disi tusia, “Por do rohanami umbege pangajaran na imbaru na nipaboami.

²⁰Harana pangalaho na ganjil do na nipardokkonanmi hami bege. Jadi gabe por do rohanami anso hami boto astuan ni i,” ning halahi. (

²¹Harana sude do halak Atena dohot halak na asing na markota disi sai giot manangihon dohot mangkobari angka pangalaho na imbaru.)

²²Di na jongjong si Paulus di jolo ni halak na marlagut di Areopagus i, didok ia ma tu halahi, “Hamu angka halak Atena! Anggo parnidaanku di bagasan sudena pangalaho, halak parugamo do hamu.

²³Harana di na mardalan-dalan au humaliang kotamunu on, huparrohahon do angka inganan parsombaanmunu. Huida muse do sada inganan pamelean, tarsurat do disi, ‘Tu Debata Na So Nitanda.’ Jadi, Debata na so nitandamunu i, i ma da ibana na hubaritahon i tu hamu.

²⁴Debata na manjadihon tano on dohot sude isina, i ma Tuhan di langit dohot di tano on. Nada ra Ia maringanan di angka bagas ni debata na nipature ni tangan ni jolma.

²⁵Nada na nioloan ni tangan ni jolma Ia, songon na hurangan Ia di bagi aha, angke apala Ia do na mangalehen hangoluan dohot hosa dohot sude na asing i tu sude jolma.

²⁶Sian sada jolma dibaen Ia ma sude bangso jana disuru Ia halahi mangingani tano on sudena. Laing marguru diSia do sian mulana laho manontuhon sanga andigan hatihana jana olat ni dia batasna halahi tola mangolu.

²⁷Songon i ma dibaen Debata anso dijalahi halahi Ia. Ibo rohana nian sai padumpang ma halahi dohot Ia di na nijalahan ni halahi Ia. Tapi anggo satutuna, nada dao Debata sian hita sude.

²⁸Harana, “Mangolu pe hita jana manggulot sanga pe adong hita, di bagasan Ia do.” Laing songon na nidok ni angka parumpama di hamu on, “Angka pomparanNia do hita.”

²⁹Antong, muda pomparan ni Debata do hita, nada tola etongon ni rohanta na sarupa Debata i sanga tu aha pe na nibaen marguru tu hapistaran ni jolma, i ma na nibaen sian sere sanga perak sanga batu.

³⁰Madung disalpuhon Debata angka hatiha i dompak maoto hita, tapi anggo saonnari madung disuru Ia sudena jolma na satano on pauba rohana sian angka dosa ni halahi be.

³¹Harana na dung ditontuhon Ia hian do sada hatiha laho manguhumi portibi on sudena mangihutkon hatigoran. Pasahaton ni Debata ma karejo i tu sada halak na dung nipiliNia tusi. Jadi anso pos roha ni halak sudena taringot tusi, madung dipangolu Debata do Ia mangulahi sian hamatean!” ning si Paulus.

³²Dung dibege angka jolma i taringot tu na mulak mangolu sian na mate, dipartatai na deba ma si Paulus. Adong muse do deba na mandok, “Por dope rohanami manangihon ho mangkobari taringot tusi mangulahi,” ninna.

³³Dung i ditadingkon si Paulus ma parrapotan i.

³⁴Tapi laing adong do antong sian halahi na mamihak tu si Paulus jana gabe porsaya tu Jesus. I ma angka si Dionisius anggota ni rapot Areopagus i, dohot sada dadaboru na margoar si Damaris rap dohot na asing i dope deba nari.