Read Batak Angkola BAENON NI ANGKA RASUL 18 Bible Online

BAENON NI ANGKA RASUL 18 - Batak Angkola bible

BAENON NI ANGKA RASUL 18

¹Dung i kehe ma si Paulus sian Atena, lalu ma ia tu Korintus.

²Marsuo ma ia disi dohot sada halak Jahudi na margoar si Akuila na marasal sian Pontus. Na baru dope si Akuila ro sian Italia dohot daborunia si Priskila. Na niusir ni Raja Godang Klaudius do sandok halak Jahudi sian Rom umbaen na gabe tu Korintus halahi ro. Ditopot si Paulus ma halahi na dua,

³gabe rap ma halahi sainganan jana rap karejo ma halahi, harana sarupa do pangomoan ni halahi dohot si Paulus, i ma pature abit tenda.

⁴Tapi muda di Ari Sabat sai kehe do si Paulus mangkobar-hobari tu bagas paribadatan laho manyosoi halak Jahudi dohot halak Junani anso porsaya halahi.

⁵Dung lalu si Silas dohot si Timoteus tu Makedonia, tu halak Jahudi ma sude diabiskon ia ari-arinia laho mamaritahon jamita na sian Debata tu halahi, paboahon bahaso Jesus do Kristus i.

⁶Tapi hara ni na sai torus dialo angka jolma i boti sai mangincahi halahi, gabe dipaspaskon si Paulus ma abuan na di pakeannia i adop halahi, gabe songon tanda laho paingotkon hasalaan ni halahi sandiri. Didok ia ma, “Muda gabe mago hamu, salamunu sandiri noma i! Nada ahana be i di au! Olat ni on, tu bangso na so Jahudi noma au kehe.”

⁷Morot ma si Paulus manadingkon halahi tu bagas na hombar tu bagas paribadatan i. Goar ni nampuna bagas i, i ma si Titius Justus. Nada halak Jahudi ia, tapi na marsomba tu Debata. Jadi disi ma si Paulus maringanan.

⁸Nian anggo si Krispus, i ma kapala ni bagas paribadatan i dohot sude halahi na sabagas, porsaya do tu Tuhan Jesus. Jana miduk do sian halak Korintus na umbege jamita i laing porsaya jana lalu tardidi.

⁹Di na sanoli borngin-borngin didok Tuhan ma tu si Paulus di bagasan sada parnidaan, “Ulang pola mabiar ho! Torus ma ho mangkobari, ulang ho hohom.

¹⁰Harana dongananKu do ho. Nada adong sahalak pe na mambaen na jahat tu ho, angke bahat do di kota on halak na gabe punangKu.”

¹¹Jadi hara ni i, di Korintus ma si Paulus maringanan adong sada satonga taon honokna jana diajarkon ia hata ni Debata tu angka jolma i.

¹²Dung si Galio gabe gubernur di Akaya, satahi ma halak Jahudi mangalo si Paulus jana dioban halahi ma ia tu pangadilan.

¹³Dipajojor halahi ma pangaduan ni halahi songon on, “Dijajang-jajang bayo on do halak na bahat anso marsomba tu Debata sian dalan na maralo tu angka parenta ni Debata na nilehen ni si Musa di hami!”

¹⁴Disi giot dialusi si Paulus, manigor mandok hata ma si Galio tu halak Jahudi i, “Hamu angka halak Jahudi! Sugari na mangalanggar sanga taringot tu hajahatan pangaduanmunu on, sobar do au manangihonsa.

¹⁵Hape na martangkangi do hamu hara ni angka pandohan dohot angka goar dohot angka aturanmunu sandiri! Anggo soal na songon i hamu do pasidungkon i. Nada ra au laho manguhumi angka pangalaho na songon i!”

¹⁶Dung i manigor dipakehe si Galio ma halahi sian inganan i.

¹⁷Dung i gabe ditangkup halahi ma si Sostenes, kapala ni bagas paribadatan i, dibalbal halahi ma ia laing di jolo ni paruhuman i. Tapi nada pola diantoi si Galio taringot tusi.

¹⁸Anggo si Paulus laing honok dope ia tinggal di Korintus. Dung i marhata partinggal ma ia tu angka halak na porsaya i disi, kehe ma ia markapal dohot si Priskila dohot si Akuila tu Siria. Di Kengkrea ma dipangkas obuk ni si Paulus na ginjang i hara ni haulnia tu Tuhan.[19]

¹⁹Dung lalu di Epesus, ditadingkon si Paulus ma si Priskila dohot si Akuila, masuk ma ia tu bagas paribadatan martukar pikiran disi dohot halak Jahudi.

²⁰Dipangido halahi do nian lumolot ia rap dohot halahi, tapi nada ra ia.

²¹Tapi haru songon i pe, di na laho kehe ia laing didok ia do, “Muda dipaloas Debata, mangulahi dope au ro tuson.” Dung didok ia songon i, kehe ma ia markapal sian Epesus.

²²Jadi dung lalu ia di Kaisarea, kehe ma ia tu Jerusalem laho palalu tabenia tu parlagutan na disi i, dung i manigor kehe ma ia tu Antiokia.

²³Dung adong sanga sadia honok disi, kehe ma ia mangulahi manopot Luat Galatia dohot Prigia laho patoguhon roha ni angka na porsaya i.

²⁴Jadi laing di hatiha i, ro ma tu Epesus sada halak Jahudi na sorang di Aleksandria, na margoar si Apollos. Na malo do bayo i mandok hata jana na pistar taringot tu isi ni Buku Na Badia i,

²⁵jana na dung diajari do ia laho mananda Dalan Ni Tuhan. Jadi sai marsitutu jana manat do ia mangajari taringot tu Jesus, haru pe hum pandidion ni si Johannes sajo dope na nibotonia.

²⁶Puluk sajo do ia mangkobari di bagas paribadatan i. Jadi dung dibege si Priskila dohot si Akuila pangajarannia i dioban halahi ma ia tu bagas. Dipaboa halahi ma tumangkas tusia taringot tu Dalan Ni Tuhan.

²⁷Dung i ditahi roha ni si Apollos ma giot kehe tu Akaya. Jadi mambaen surat ma angka halak na porsaya i di Epesus tu angka dongan na porsaya di Akaya anso sonang roha ni halahi manjagit si Apollos. Jadi dung lalu si Apollos di Akaya, marguna situtu do hape pangurupinia tu halak na porsaya hara ni asi ni roha ni Debata.

²⁸Angke hara ni sahalania, ditaluhon si Apollos do halak Jahudi di angka na marsoal-soal i di jolo ni halak na bahat. Jana tangkas do dipatuduhon ia angka ayat sian Buku Na Badia i laho mambuktihon bahaso na tutu do Jesus i Kristus.