Read Batak Angkola BAENON NI ANGKA RASUL 19 Bible Online

BAENON NI ANGKA RASUL 19 - Batak Angkola bible

BAENON NI ANGKA RASUL 19

¹Jadi dompak na di Korintus i si Apollos, topet ma hatiha i si Paulus mandalani angka luat pardolok na disi lopus lalu ia tu Epesus. Dapot ia ma disi piga-piga anak sisean.

²Disapai ia ma tu halahi, “Na dung jungada do dijagit hamu Tondi Parbadia dung porsaya hamu?” ning ia. Dialusi halahi ma, “Inda podo. Salang mambege na adong Tondi Parbadia so jungada dope hami,” ninna halahi.

³“Antong dohot pandidion ni ise do hamu dipandidihon?” ning si Paulus manyapai. “Dohot pandidion ni si Johannes,” ninna halahi mangalusi.

⁴Dung i didok si Paulus ma, “Anggo si Johannes mandidihon halak laho patandahon na dung muba do roha ni angka jolma i sian dosana be. Tapi laing dipaboa si Johannes do tu halak Israel, angkon porsaya dope halahi tu Sahalak na umpudi ro ulang ia, i ma Jesus,” ning ia.

⁵Dung dibege halahi na songon i, dipandidihon ma halahi mangulahi dibagasan goar ni Tuhan Jesus.

⁶Jadi hatiha dipayakkon si Paulus tangannia tu ginjang ni halahi, digohi Tondi Parbadia ma halahi jadi mamungka ma halahi mangkobari di angka hata na asing jana dipajojor halahi ma hata ni Debata.

⁷Adong do halahi hira-hira dua bolas halak.

⁸Marsitutu ma si Paulus marjamita tu halak na di bagasan paribadatan i adong tolu bulan honokna, jana inda marnaloja ia marsialusan dohot halahi laho paposkon roha ni halahi taringot tu Debata dohot HarajaanNa i.

⁹Tapi adong do deba sian halahi sijogal roha na so ra porsaya. Dijolo ni halak na bahat i diincahi halahi ma pangajaran taringot tu na giot paluaon ni Debata sude jolma markite-hite Jesus. Jadi gabe ditadingkon si Paulus ma halahi, kehe ma ia rap dohot angka sisean ni Jesus tu sikola Tiranus. Disi ma ia ganop ari marsipatangkasan dohot halak.[20]

¹⁰Adong dua taon sai songon i dibaen ia, lopus sudena halak na maringanan di Asia umbege hata ni Tuhan, bope halak Jahudi bope halak Junani.

¹¹Dipatupa Debata ma angka hahomangan na godang markite-hite si Paulus.

¹²Hum sapu tangan pe sanga abit pangalilit ni gonting na jungada dipake si Paulus diboan tu angka halak na marnyae, manigor malum ma i jana angka tondi na jahat pe marmorotan ma sian halahi.

¹³Adong ma deba angka datu ni halak Jahudi mardalani laho paorot angka setan sian halak. Dicubo-cubo angka datu i ma paorot angka begu i mangasahon goar ni Jesus. Didok halahi ma tu angka tondi na jahat i, “Mangasahon goar ni Jesus na nijamitahon ni si Paulus i, hupaorot ma ho!” ning halahi.

¹⁴Pitu halak dakdanak ni kapala ni malim ni halak Jahudi na margoar si Skewa ma na mambaen songon i.

¹⁵Tapi didok tondi na jahat i ma tu halahi, “Hutanda do Jesus, si Paulus pe hutanda do, tapi ise do hamu?” ninna.

¹⁶Jadi mangambur ma haroan ni tondi na jahat i mangaropo halahi sagogona, gabe marlojongi noma halahi sian bagas i mangkabugang jana marsaemara.

¹⁷Jadi tarboto ma na songon i tu sude halak Jahudi dohot tu halak Junani na adong di Epesus, gabe mabiar be ma halahi sude. Tapi anggo goar ni Tuhan Jesus mur marsangap ma.

¹⁸Bahat do halak na dung porsaya i tu Jesus mangoku angka pangalaho ni halahi di jolo ni angka dongan na bahat.

¹⁹Jana angka halak na dung somal padalan hadatuonna, dipalagut halahi ma angka buku ni halahi, ditutung halahi ma i di jolo ni halak na bahat. Sugari dipalagut arga ni buku i sude, mararga ma i hira-hira lima pulu ribu hepeng perak.

²⁰Angka songon i ma pardalanna gabe mur rarat hata ni Tuhan i jana mur markuaso.

²¹Dung tarjadi sudena i, diputuskon si Paulus ma[21] di bagasan rohania anso kehe ia tu Jerusalem, mamolus sian Makedonia dohot Akaya. Didok ia ma, “Dung sian i angkon torus dope au tu Rom.”

²²Jadi disuru ia ma dua halak angka dongannia i tu Makedonia, i ma si Timoteus dohot si Erastus, tapi anggo ia sandiri laing tinggal dope santongkin nari di Asia.

²³Laing hira-hira di hatiha i ma masa hagaoran na godang di Epesus hara ni pangajaran taringot tu Dalan Ni Tuhan.

²⁴Angke adong do di kota i sahalak tukang perak na margoar si Demetrius na pature angka bagas paribadatan ni Dewi Artemis. Bahat do pangomoan ni angka parkarejonia sian usaho i.

²⁵Jadi dipalagut ia ma angka parkarejonia rap dohot sude halak na asing na songon i karejona. Didok ia ma tu halahi, “Hamu ale angka dongan! Tangkas do diboto hamu, sian usaho on do pangomoanta.

²⁶Saonnari madung tangkas diida jana dibege hamu sandiri sanga aha na nibaen ni si Paulus. Didok ia, anggo angka debata na nibaen ni tangan ni jolma, nada tutu i debata. Jana madung marbalik bahat halak dibaen ia gabe mangkaporsayai na niajarkonnia i. Nada hum di Epesus on sajo, tapi bolas dohonon madung sudena halak na saluat Asia on.

²⁷Hara ni i, sego ma goar ni parusahoanta on. Tapi nada hum i sajo, marlayas muse dope goar ni bagas paribadatan ni Dewi Artemis, jana etongon ni halak ma hasangapannia i songon sisoada; hape nian ia do dewi na nipasomba-somba ni sude halak na di Asia on, dohot na satano on!” ning ia.

²⁸Disi dibege angka jolma i songon i, manigor milas ma roha ni halahi, marsurahi ma halahi mandok, “Na godang do Dewi Artemis ni halak Epesus!”

²⁹Dung i mur gaor ma sude kota i, jana rap marlojong tu stadion, jana disarat halahi ma si Gayus dohot si Aristarkus halak Makedonia, dongan ni si Paulus.

³⁰Giot ihutkonon ni si Paulus do nian halahi, tapi nada dipaloas angka siseannia i.

³¹Laing songon i deba sian angka halak na marpangkat na di kota i na marale-ale tu si Paulus, disuru paboa halahi ma tu halak anso ulang pola tarida si Paulus di stadion i.

³²Jadi anggo angka jolma na ribur i nada martontu be. Salaku na marsidok hatana be noma sude, deba mandok songon on, deba mandok songon i. Angke bahatan do halak na so umboto sanga hara ni aha umbaen na marlagut halahi disi.

³³Ninna roha ni na deba, hara ni si Aleksander do boncirna, angke ia do na nionjar-onjar ni halak Jahudi i tu jolo. Gabe martudu ma ia anso mandok hata laho mambela dirinia di jolo ni halak na bahat i.

³⁴Tapi disi diida halak na bahat i, hape na halak Jahudi do ia, manigor rap marsurak ma halahi sagogo-gogona, hira-hira dua jom lolotna, “Na godang do Dewi Artemis ni halak Epesus!”

³⁵Ujungna tarpahohom juarotulis ni kota i do halak na bahat i. Mandok hata ma ia, “Hamu halak Epesus! Sude do halak umboto, kota Epesus on do na pature-turehon bagas paribadatan ni Dewi Artemis na godang dohot patungnia na madabu sian ginjang.

³⁶Nada tarsoadahon sanga ise i. Antong so be ma hamu jana ulang matomputu baen hamu sanga aha.

³⁷Nada hara ni na nitangko ni halak on bagas ni debata sanga dipabile halahi debatanta i umbaen na niobanmunu halahi tuson.

³⁸Muda adong ma antong pangaduan ni si Demetrius rap dohot angka parkarejonia maradopkon halak, tu paruhuman do i pasahaton jana sai disi do angka panggomgomi.

³⁹Tapi betak sai adong dope pangalaho na asing na di rohamunu, angkon di bagasan rapot godang na resmi do i putuskononkon.

⁴⁰Angke ra do gabe marmara hita hara ni hagaoran na tarjadi sadari on. Taraduhon halak do hita songon panggaori, harana nada tarbaen hita sada alasan pe laho patigorkon hagaoran sinangkinan i,” ning ia.

⁴¹Dung didok ia songon i, disuru ia ma halak na bahat i marmulahan.