Read Batak Angkola BAENON NI ANGKA RASUL 2 Bible Online

BAENON NI ANGKA RASUL 2 - Batak Angkola bible

BAENON NI ANGKA RASUL 2

¹Dung dapot Ari Pentakosta marlagut ma di sada inganan sudena na porsaya i.

²Jadi tompu ma tarbege sora sian langit songon pangombus ni alogo na gogo. Digohi sora i ma sude bagas inganan ni halahi i.

³Dung i diida halahi ma angka dila songon jilam ni api na mangararati songgop tu halahi sude.

⁴Jadi digohi Tondi Parbadia ma halahi sude jana mamungka ma halahi mangkatai di hata na asing na marragam-ragam. Mangkatai ma halahi hombar tu hata na nilehen ni Tondi i dokkonon ni halahi.

⁵Jadi hatiha i, bahat do halak Jahudi na sian ragam-ragam ni luat na di portibi on ro tu Jerusalem, i ma angka na mangkabiari Debata.

⁶Di na tarbege sora i, bahat sajo ma halak ro marlagut disi. Tarsonggot be ma halahi sudena umbege angka rasul i mangkatai di hata ni halahi be.

⁷Homang-komang jana tartarik ma roha ni halahi jana marsipandohonan ma halahi, “Inda he halak Galilea do sude na mangkatai on?

⁸Na bia do pangalahona umbaen na tabege halahi mangkatai di hatanta be?

⁹Angka halak Partia do hita, halak Media, halak Elam; halak Mesopotamia; halak Judea; halak Kapadokia; halak Pontus dohot Asia,

¹⁰halak Prigia dohot halak Pamfilia, halak Mesir dohot halak na sian Luat Libia na di lambung Kirene; adong muse do hita on halak Rom,

¹¹adong angka halak Jahudi jana adong do bangso na asing na dung gabe masuk Jahudi; adong muse do halak Kreta dohot halak Arab. Di bagasan hatanta be do tabege halahi mandok hata taringot tu angka hahomangan na nibaen ni Debata!”

¹²Di na homang halahi sude jana marpikir be, marsisapaan ma halahi sama halahi, “Aha dehe astuan ni on?” ning halahi.

¹³Tapi adong do sian halahi na mangincahi. Didok halahi ma, “Ah, na mabuk dibaen anggur na tonggi do halak on!”

¹⁴Dung i jongjong ma si Petrus rap dohot rasul na sabolas nari i, mandok hata tu halak na bahat i, dipagogo ia ma sorania mandok, “Hamu angka dongan, halak Jahudi bope sude na maringanan di Jerusalem! Tangkas ma parrohahon hamu angke porlu do patorangonku tu hamu pangalaho on.

¹⁵Nada na mabuk halak on songon na nidokmunu i, harana pukul sambilan dope saonnari.

¹⁶Tapi madung dipaboa Debata hian on markite-hite panurirang Joel:

¹⁷Tulus ma di angka ari na parpudi, ninna Debata, usehononKu ma tondingKu tu sude jolma. Jadi manyurirangi ma angka anak dohot borumunu, maruli parnidaan ma angka naposo bulungmunu, marnipi ma angka simatobangmunu.

¹⁸Laing usehononKu muse ma tondingKu di hatiha i tu angka naposongKu, dadaboru dohot halaklahi, jana manyurirangi ma halahi.

¹⁹BaenonKu ma angka hahomangan di ginjang, di langit, dohot angka tanda di toru, di tano on; adong ma mudar dohot api, uas dohot timus.

²⁰Manggolap ma mataniari, marrara ma bulan i songon mudar dompak so dapot Ari Ni Tuhan i, i ma Ari na godang jana na marmulia i.

²¹Anggo di hatiha i, dapotan haluaan ma sanga ise na mangido pangurupi ni Tuhan i.”

²²“Hamu angka halak Israel, tangihon hamu ma hata on: Na humaksud i ma Jesus na sian Nasaret, na dung ditontuhon ni Debata markite-hite hagogoan dohot hahomangan dohot tanda na binaen ni Debata markite-hite Ia di tonga-tongamunu, songon na dung tangkas diboto hamu.

²³Ia na dung dilehen ni Debata tudos tu maksud dohot sangkapNa, madung diparsilangkon hamu di hayu na marsilang jana dibunu markite-hite bangso na geduk.

²⁴Tapi dipabangkit Debata do Ia jana dipalua sian bernit ni hamatean, angke nada tarbaen hamatean i torus maniop Ia.

²⁵Taringot tuSia jungada do didok si Daud, ‘Sai huida do tongtong Tuhan di jolongku; didongani Ia do au, anso ulang adong sanga aha pe na paganggu rohangku.

²⁶Hara ni i jop do rohangku jana marolop-olop dohot dilangku, pamatangku pe maradian do di bagasan arop ni roha,

²⁷angke nada dipadiar Ho au di inganan ni halak na mate jana nada dipadiar Ho na badiaMi marnida habusuhon i.

²⁸Madung dipatidahon Ho tu au dalan tu hangoluan na so mantak i. Dilehen Ho do di au gok jop ni roha di adopanMu.’

²⁹Hamu ale angka dongan, paloas hamu ma au, pajojorkon satangkas-tangkasna taringot tu si Daud ompunta i. Madung mate ia, jana madung dikuburkon; di hita on do kuburannia lopus tu sadari on.

³⁰Madung dijanjihon Debata tu si Daud mardongan sumpa paboa na adong sahalak sian pomparan ni si Daud baenon ni Debata gabe raja. Hara ni na dung diboto si Daud janji i boti hara ni panurirang do ia,

³¹laing diboto ia do sanga aha na giot baenon ni Debata. Jadi madung dipaboa ia hian na mulak mangolu do Kristus na nijanjihon ni Debata i. Didok si Daud do, ‘Na so padiaron Ia laing tinggal di inganan ni angka jolma na mate; na so jabat abis malangke pamatangNa.’

³²Jesus on ma da na nipangolu ni Debata mangulahi sian hamatean. Sude do hami manyaksihon i.

³³Dipatuginjang do Ia tu inganan ditangan siamun ni Debata, laing dijagit Ia ma sian Ama i Tondi Parbadia na dung nijanjihon hian. Tondi i ma na niusehon saonnari tu hami, jana i ma na nibege dohot na niidamunu angka dongan saonnari.

³⁴Anggo si Daud sandiri nada manaek ia tu banua ginjang tapi didok ia do, ‘Didok Tuhan i do tu Tuanku: Juguk ma Ho di siamunKu,

³⁵lopus Hubaen tunduk tu Ho angka musuMu!’ ”

³⁶“Hara ni i ma angkon gabe sude halak Israel tangkas umboto bahaso Jesus na niparsilangkonmunu i, laing Jesus i muse do na nibaen ni Debata gabe Tuhan dohot Kristus!”

³⁷Jadi dung dibege angka jolma i na songon i, manorusi ma tu ate-ate ni halahi. Dung i disapai halahi ma tu si Petrus dohot tu angka rasul na asing i, “Hamu angka dongan, aha noma sibaenonnami?”

³⁸Dialusi si Petrus ma, “Pauba hamu ma rohamunu sian angka dosamunu. Jana angkon dipandidihon ma hamu ganop be di bagasan goar ni Jesus Kristus, anso nisesa sude dosamunu i. Dung i jagitonmunu ma silehen-lehen ni Debata, i ma Tondi Parbadia.

³⁹Angke tu hamu do ale angka dongan, dohot tu pomparanmunu, songon i muse tu angka halak na maringanan di na dao do na nijanjihon ni Debata i — i ma sudena halak na nipiohon ni Debata Tuhanta i anso ro tuSia.”

⁴⁰Songon i ma dipatorang si Petrus tu halahi dohot ragam-ragam pandohan na asing, jana dipaingot ia halahi, ninna ma, “Sai ra ma hamu nipalua sian sundut na jahat on.”

⁴¹Bahat do halak na porsaya tu na nidok ni si Petrus i, jana tardidi ma halahi. Gabe martamba ma bilangan ni na porsaya di na sadari i, tolu ribu halak.

⁴²Dihaburjuhon halahi do marsiajar sian angka rasul i jana sai tongtong ma halahi rap marlagut. Rap do halahi di na mamonggoli roti, dohot martangiang.

⁴³Na bahatan do angka tanda hahomangan na nibaen ni angka rasul i na mambaen tartarik roha ni halahi sude jana patubu biar di halahi.

⁴⁴Sai tongtong do sada angka na porsaya i jana sanga aha na adong di halahi rap mamake do halahi sude.

⁴⁵Digadisi halahi ma angka barang dohot sinadongan ni halahi, jana dibagi-bagihon halahi ma hepengna i di halahi sudena marguru tu haporluanna be.

⁴⁶Ganop ari marlagut do halahi di Bagas Ni Debata; marmoga-moga jana martoruk ni roha, rap mamonggoli roti halahi di angka bagas ni halahi. Jana rap mangan ma halahi di bagasan jop ni roha dohot toruk ni roha;

⁴⁷jana sai tongtong do Debata dipuji-puji halahi, jana sai jop do roha ni halak sudena mida halahi. Ganop ari do martamba bilangan ni halahi, harana sai dilehen Tuhan i do tu halahi angka halak na nipalua.