Read Batak Angkola BAENON NI ANGKA RASUL 20 Bible Online

BAENON NI ANGKA RASUL 20 - Batak Angkola bible

BAENON NI ANGKA RASUL 20

¹Jadi dung mantak hagaoron na di Epesus i, dipalagut si Paulus ma sudena parlagutan i, laho paingotkon halahi. Dung i marhata partinggal ma ia tu halahi, didalani ia ma tu Makedonia.

²Ditopoti ia ma angka luat na di Makedonia i jana dilehen ia ma bahat sipaingot tu angka na porsaya na disi laho pajopkon roha ni halahi. Dung i kehe ma ia tu Junani.

³Adong do tolu bulan ia disi. Jadi di na markobas ia laho taripar tu Siria adong ma dapot ia barita, bahaso na dung martahi halak Jahudi laho mamunu ia. Jadi gabe diputuskon ia ma mardalan sian Makedonia mangulahi.

⁴Rap ma si Sopater anak ni si Pirus halak Berea i dohot ia; songon i muse ma si Aristarkus dohot si Sekundus halak Tessalonika dohot si Gayus halak Derbe. Dohot si Timoteus, si Tikikus dohot si Tropimus halak na sian Asia i.

⁵Parjolo ma halahi sian hami tu Troas, disi ma halahi painte hami.

⁶Dung Ari Pesta Ni Roti Na So Marragi, markapal laut ma hami sian Pilippi. Dung lima ari marsuo ma hami mangulahi di Troas. Laing disi ma hami saminggu.

⁷Di ari na parjolo ni minggu i, dompak marlagut hami giot mamonggoli roti, mangkatai ma si Paulus tu angka dongan na disi, harana marsangkap do ia laho kehe ancogotna i. Lopus tonga borngin laing didatdati si Paulus dope na mangkobari i.

⁸Di bilik na di ginjang i, i ma inganan parluhutannami, bahat do lampu disi.

⁹Juguk-juguk ma sahalak doli-doli di jandela i, si Eutikus goarna. Hara ni na so marnamantak si Paulus na mangkobari i lopus songon na dokdok ma mata ni bayo i mondohondok, lopus tarpodom ia di jandela i, gabe madabu ma ia tu toru sian tirket patoluhon. Dung diangkat halahi ia, hape ma mate.

¹⁰Tapi mijur ma si Paulus tu toru, tungkap ma ia manghaol doli-doli i. Didok ia ma, “Ulang pola ganggu rohamunu, laing mangolu dope ia!” ning ia.

¹¹Dung i manaek ma mangulahi si Paulus tu ginjang, dibagi-bagi ia ma roti, rap mangan ma halahi. Dung songon i lolotna halahi na mangkatai i lopus tu manyogot, kehe ma si Paulus.

¹²Ditaruhon halahi ma doli-doli sinangkin laing mangolu tu bagasna. Jadi sonang ma panghilalaan ni halahi jana tarapul.

¹³Jadi parjolo ma hami markapal tu Asos anso hami aloalo si Paulus disi. Harana na dung nidoknia hian do songon i. Angke giot mardalan pat do ia lalu tu Asos.

¹⁴Dung padumpang hami di Asos, manigor masuk ma si Paulus tu kapalnami i, marlayar ma hami lalu tu Metilene.

¹⁵Sian i laing torus ma hami marlayar, ancogotna i lalu ma hami ditontang ni Kios. Haduanna i lalu muse ma hami di Samos, sadari nari sian i lalu ma hami tu Miletus.

¹⁶Na dung jolo didok si Paulus hian do, na so pola maradian ia di Epesus, anso ulang mabahattu abis ari-ari i di Asia. Diopop ia do anso satibu-tibuna ia lalu tu Jerusalem di Ari Pesta Pentakosta.

¹⁷Ditonahon si Paulus ma sian Miletus anso marroan jolo angka pangituai ni parlagutan na di Epesus marsuo dohot ia.

¹⁸Jadi dung marroan halahi, mandok hata ma si Paulus tu halahi, “Tangkas do diboto hamu ale angka dongan, sanga na tarsongon dia ngolungku sahonokna on di tonga-tongamunu mamungka sian ari parjolo lalu au tu Asia on.

¹⁹Sai markarejo do au mangoloi Tuhan i sian sude rodop ni roha mardongan ilu ni matangku, di tonga-tonga ni parkancitan na hutaon hara ni tahi ni halak Jahudi na giot mangarohai au.

²⁰Diboto hamu do, na so pola maralang-alang au mandok sanga aha na marguna tu hamu. Huajari do hamu di tonga-tonga ni halak na bahat sanga pe na di bagas.

²¹Sanga na tu halak Jahudi pe sanga na tu bangso na asing, sai tongtong do hupaingot anso dipauba halahi be rohana sian angka dosa ni halahi jana anso ro mandapotkon Debata bope anso porsaya tu Tuhan Jesus.

²²Jadi saonnari, hara ni na giot mangoloi na nidok ni Tondi Parbadia, kehe ma au tu Jerusalem. Jana nada huboto dope sanga aha na giot masa tu au disi.

²³Hum on ma i na huboto, di ganop kota madung tangkas dipaboa Tondi Parbadia tu au, angkon tarhurung do au jana manaon parkancitan.

²⁴Tapi nada pola hupardulihon ngolungkon, asalkan ma hupasidung karejo na nipasahat ni Tuhan Jesus tu au jana asal ma sai burju au lopus tu ujung ni ngolungku laho manjamitahon Jamita Na Denggan i, i ma taringot tu asi ni roha ni Debata.

²⁵Madung hutogu hamu sudena jana madung hujamitahon muse tu hamu Harajaan Ni Debata. Anggo saonnari ninna rohangku, nada marsuo be au dohot hamu.

²⁶Jadi hara ni i, torang ma hudok tu hamu sadari on, muda laing adong sian hamu na mago sanoli on, nada au be na sala disi.

²⁷Nada unjung hutabunihon diringku maradopkon angka karejongku laho patorangkon tu hamu sude sangkap ni Debata.

²⁸Antong jagohon hamu ma dirimunu dohot sude habanan i, harana madung dipabangkit Tondi Parbadia hamu gabe parmahan. Parmahani hamu ma parlagutan ni Tuhan i, na nibaen gabe nampunaNia markite-hite mudarNia sandiri.

²⁹Angke disi kehe au, marroan ma angka sorigala panyoro tu tonga-tongamunu. Jana halak na nijagoanmunu i, i ma na giot soroon ni angka sorigala i.

³⁰Salang sian tonga-tongamunu sandiri pe, tarida ma angka halak sidok hata na so tutu. Anso gabe lilu sanga ise na dung porsaya tu Jesus jana mangihut tu halahi, i do tujuan ni halahi.

³¹Jadi hara ni i, marjago-jago ma hamu! Ingot hamu ma, tolu taon honokna arian na borngin mardongan ilu-ilu nada maradian au mangajari hamu pasada-sada.

³²Saonnari hupasahat ma hamu tu Debata, anso laing dipature-ture Ia hamu jana anso laing marsitiopan tu jamita na paboahon asi ni roha ni Debata i hamu. Markuaso do Debata laho patoguhon hamu bope laho mangalehen angka pasupasu na dung dipasingkop Ia tu halakNia sudena.

³³Nada jungada dipangido rohangku hepeng bope pakean sanga na sian ise pe.

³⁴Hamu pe diboto hamu do i, gogongku sandiri do hupake markarejo laho manjalahi na hasaya di au dohot di angka dongan na mandongani au.

³⁵Sanga taringot tu pasal bagi aha pe, madung hupatidahon di hamu tiruan na patuduhon angkon urupanta do halak na so margogo markite-hite na marsitutu karejo. Angke angkon ingotonta do, na nidok ni hata ni Tuhan i, ‘Martuaan do halak na mangalehen sian na manjagit.’ ”

³⁶Dung sidung si Paulus na mandok hata i, singgang ma ia rap dohot halahi sude martangiang.

³⁷Martangisan ma halahi sude, dihaol halahi ma si Paulus jana diummai halahi laho paborhatkon ia.

³⁸Gabe marsak ma halahi lumobi hara ni na nidok ni si Paulus i na so idaon ni halahi be ia. Dung i dipataru halahi ma ia lopus tu kapal.