Read Batak Angkola BAENON NI ANGKA RASUL 21 Bible Online

BAENON NI ANGKA RASUL 21 - Batak Angkola bible

BAENON NI ANGKA RASUL 21

¹Jadi dung marsijalangan hami dohot angka pamimpin ni parlagutan na sian Epesus i, hami tadingkon ma halahi. Manigor marlayar ma hami torus tu pulo Kos; ancogotna i lalu muse ma hami tu pulo Rodos. Sian i hami patorus ma tu labuan Patara.

²Dapot hami ma di Patara kapal na giot kehe tu Penisia. Gabe masuk ma hami tu kapal i lalu kehe ma,

³jana marlayar lopus hami ida pulo Siprus sabola siambirangnami; tapi laing torus do hami marlayar laho tu Siria. Di Tirus ma hami mandarat, harana giot marbongkar muatan disi kapal na hami tompang i.

⁴Hami dapotkon ma angka na porsaya tu Jesus disi, jana rap ma hami saminggu dohot halahi. Hara ni boa-boa ni Tondi Parbadia dipaingot halahi ma si Paulus anso ulang kehe ia tu Jerusalem.

⁵Tapi dung dapot hatihana sai honok hami disi, hami tadingkon ma halahi, hami patorus ma pardalanannami. Sude ma halahi pataru hami, na menek na magodang, ama dohot ina lopus tu ruar ni kota i. Di topi ni laut i marsinggang ma hami martangiang disi.

⁶Dung i marsijalangan ma hami, lalu masuk tu kapal, jana halahi pe mulak be ma tu bagasna.

⁷Torus ma hami marlayar sian Tirus lopus tu Ptolomais. Hami topot ma angka na porsaya disi laho manjalangi halahi, jana disi ma hami sadari dohot halahi.

⁸Ancogotna i kehe muse ma hami, jana lalu ma di Kaisarea. Hami topot ma disi sahalak parjamita na margoar si Pilipus, jana laing di bagasnia ma hami tinggal. Sahalak sian na tarpili na di Jerusalem i do ia.

⁹Adong do opat halak borunia na dung manjagit gogo sian Debata laho manjamitahon barita na sian Debata.

¹⁰Dung adong sanga na sadia honok hami disi ro ma sahalak panurirang sian Judea na margoar si Agabus.

¹¹Ro ma ia mandapotkon hami, lalu dibuat ia ma bobat ni si Paulus. Dirahuti ia ma patnia, songon i muse tangannia sandiri dohot bobat i jana didok ia ma, “On ma na nidok ni Tondi Parbadia: Rahuton ma nampuna bobat on di Jerusalem, songon on ma baenon ni halak Jahudi jana pasahatonna ma ia tu angka bangso na asing na so Jahudi,” ning ia.

¹²Dung hami bege songon i, sude ma hami dohot angka dongan na maringanan di Kaisarea i mangidohon dohot gomos tu si Paulus anso ulang kehe be ia tu Jerusalem.

¹³Tapi dialusi ia ma, “Aha ma he gunana martangisan hamu songon on, hum mangarsahi ate-atengku do i. Angke nada hum nirahutan au rade, tapi na rade do au mate di Jerusalem humopkop goar ni Tuhan Jesus.”

¹⁴Umpe ditangihon si Paulus na hami dokkon i, gabe sip noma hami. “Sai roha ni Tuhan i sajo ma na tulus,” ning hami noma.

¹⁵Dung adong sadia honok hami disi, hami hobasi ma angka barangnami, kehe ma hami tu Jerusalem.

¹⁶Adong do deba dongan na sian Kaisarea i rap kehe dohot hami laho pataruhon hami tu bagas ni si Manason,[22] harana di bagasnia ma hami giot marborngin. (Halak Siprus do si Manason on na dung lolot gabe siihutkon Jesus.)

¹⁷Dung lalu hami di Jerusalem, jop do roha ni angka dongan na disi manjagit hami.

¹⁸Ancogotna i kehe ma hami dohot si Paulus manopot si Jakobus; laing disi muse ma sude angka pangituai ni parlagutan i.

¹⁹Jadi dung marsijalangan dohot halahi, dipajojor si Paulus ma tu halahi sandok na nibaen ni Debata markite-hite ia di tonga-tonga ni bangso na asing na so Jahudi.

²⁰Dung dibege halahi na nipajojor ni si Paulus i, gabe sude ma halahi mamuji Debata. Dung i didok halahi ma tu si Paulus, “Dongannami si Paulus! Angkon botoonmu do na dung marribu-ribu do halak Jahudi na porsaya. Burju-burju do halahi sudena mangoloi Tona i.

²¹Hape saonnari tarbege do tu halahi, na niajaranmu sude halak Jahudi na mangaranto di tonga-tonga ni bangso na asing, anso dihalupahon halahi angka parenta ni Debata na nipasahat ni si Musa i. Disosoi ho halahi anso ulang pola disunat angka dakdanak ni halahi sanga pe mangoloi adat hasomalan ni halak Jahudi.

²²Saonnari tontu botoon ni halak Jahudi na dung porsaya i ma na dung dison ho. Jadi bia noma saonnari?

²³Anggo na dumenggan, oloi ma na hami dok. Adong do opat halak dison na mambaen janji tu Tuhan.

²⁴Sugari rap kehe ma hamu mambaen upacara paias diri jana ho ma manggarar na porlu tu halahi, anso tola halahi marpangkas. Jadi muda songon i dibaen hamu, tangkas ma botoon ni halak sudena paboa na so tutu do na nibege ni halahi taringot tu ho, angke ho sandiri pe antong dipatulus ho do sanga aha na niparentahon ni Debata markite-hite si Musa.

²⁵Tapi anggo taringot tu angka bangso na asing na so Jahudi na dung gabe porsaya tu Jesus, madung hami tongos surat paboahon haputusannami tu halahi, na so tola halahi mangankon sipanganon na dung dipelehon tu gana-ganaan, nada tola mangan mudar, sanga mangan binatang na mate dipingkok, jana nada tola mambaen pangalaho na rogon,” ning halahi.

²⁶Jadi kehe ma si Paulus dohot si opat halak i mambaen upacara paias diri ancogotna i. Dung i kehe ma halahi masuk tu Bagas Ni Debata laho paboahon sanga na piga ari nari anso salose upacara na paias diri i dohot haul sipasahaton hara ni halahi be.

²⁷Jadi giot abis ma sipitu ari i, adong ma deba halak Jahudi na sian Luat Asia marnida si Paulus di Bagas Ni Debata. Digaori halahi ma roha ni halak na bahat i, dung i ditangkup ma si Paulus

²⁸jana marsurak-surak ma halahi, “Jo hamu halak Israel, tolong hamu jolo! On ma da halakna na pahae pahulu mangajari halak sudena taringot tu poda na maralo tu bangso Israel, na maralo tu angka na niparentahon ni Debata markite-hite si Musa songon i laho mangalo Bagas Ni Debata on. Tamba ni i dioban ia muse dope tuson angka bangso na asing na so Jahudi masuk tu Bagas Ni Debata on mambaen hodar inganan na badia on!” ninna halahi. (

²⁹Hum hara ni na niida ni halahi do si Tropimus halak Epesus i rap dohot si Paulus di pasar; ning roha ni halahi na dung nioban ni si Paulus ia masuk tu bagasan Bagas Ni Debata i.)

³⁰Jadi gabe gaor ma sude na sakota i, marsilojongkon lojongna ma halahi songon i marrongom. Ditangkup halahi ma si Paulus jana disarat halahi ma tu ruar ni Bagas Ni Debata i. Santongkin i manigor ditutup ma pintu ni Bagas Ni Debata.

³¹Jadi di na giot bunuon ni angka sibaen gaor i si Paulus adong ma halak na paboahon tu komandan ni tentara Rom na disi, na dung gaor sude Jerusalem.

³²Manigor ro ma komandan i mangalap angka perwira dohot angka parajurit, diompoti halahi ma manigor tu inganan ni halak na gaor i. Dung diida halak na bahat i na ro komandan i dohot pasukanna i, dipaso halahi ma mambalbali si Paulus.

³³Didapotkon komandan i ma si Paulus, ditangkup ma ia jana disuru komandan i ma halak mangarante si Paulus. Dung i disapai komandan i ma sanga ise si Paulus jana sanga aha na nibaennia.

³⁴Deba sian halak na bahat i mangalusi songon on, deba mandok songon i. Hara ni gaorna, gabe nada diboto komandan i be sanga aha satutuna na masa i. Jadi diparentahon ia ma anso dioban manigor si Paulus tu markas.

³⁵Dung lalu ia dioban halahi tu tanggana i, songon i ma pangamuk ni angka na mambaen gaor i, gabe songon na niusung noma paroban ni si Paulus.

³⁶Dipaihut-ihut halahi ma sian pudi marsurahi, “Bunu i!” ninna halahi.

³⁷Jadi di na laho masuk tu markas i, didok si Paulus ma tu komandan i, “Tola do au mandok hata saotik tu komandan i?” ning ia. Didok komandan i ma, “Malo do ho marhata Junani lakna?”

³⁸“Anggo songon i nada halak Mesir na mamberontak na salpu i ho, na lalu maroban opat ribu halak panggaori i tu halongonan?” ning ia.

³⁹Dialusi si Paulus ma, “Halak Jahudi do au; penduduk ni Tarsus kota na tarbarita di Kilikia. Tolong ma, paloas au jolo mandok hata tu angka halak on,” ning ia.

⁴⁰Jadi dung dipaloas komandan i si Paulus mandok hata, jongjong ma ia di tangga i, dihiap ia ma dohot tangannia. Gabe sip ma sude halak na disi i. Dung i mandok hata ma ia di hata Ibrani. Didok ia ma,