Read Batak Angkola BAENON NI ANGKA RASUL 23 Bible Online

BAENON NI ANGKA RASUL 23 - Batak Angkola bible

BAENON NI ANGKA RASUL 23

¹Diligi si Paulus ma jolo anggota ni pangadilan i, lalu didok ia ma, “Hamu angka kahanggingku! Lopus saonnari na so adong dope huhilala marsala au tu Debata di bagasan taroktokku taringot tu pardalan ni ngolungku.”

²Di na nidok ni si Paulus songon i, disuru Malim Godang Ananias ma halak na jongjong di lambung ni si Paulus i manampeleng pamangan ni si Paulus.

³Dung i didokkon si Paulus ma mandok ia, “Tampelengon ni Debata ma ho, ale tembok na nihapuran! Umbaen na juguk pe ho dison, na giot manguhumi au do mangihutkon Tona i, tapi madung dilaosi ho Tona i markite-hite na nisurumu manampeleng au.”

⁴Jadi didok angka na jongjong na disi i ma, “Dilayasi ho dehe Malim Godang ni Debata?”

⁵Dialusi si Paulus ma, “Na so huboto do ia Malim Godang. Tutu do i adong tarsurat, ‘Ulang palayas pamimpin ni bangsomu.’ ”

⁶Dipamanat si Paulus ma, hape adong do deba anggota ni pangadilan i halak Saduse, jana na deba nari angka halak Parise. Jadi gabe didok ia ma tu pangadilan i, “Hamu ale angka dongan! Halak Parise do au, jana pomparan ni halak Parise. Gabe niuhuman do au dison hara ni na porsaya au angkon mulak mangolu do halak na dung mate i mangulahi,” ning ia.

⁷Jadi dung didok ia songon i gabe mamungka ma martongkari angka halak Parise dohot halak Saduse i, lopus gabe mardua pihak rapot i. (

⁸Harana anggo mangihutkon pandapot ni halak Saduse i, sada halak na dung mate nada bisa be i mulak mangolu, surusuruan pe nada adong i jana tondi pe nada adong; hape anggo halak Parise, porsaya do halahi tu na dua i.)

⁹Jadi gabe gaor sajo ma halahi. Adong ma deba guru na sian pihak ni Parise jongjong mangalo marsitutu. Didok halahi ma, “Anggo mangihutkon pandapotnami nada adong sala ni bayo on! Arongku na adong do ro tondi sanga surusuruan mangkatai dohot ia!”

¹⁰Songon i ma jebuna na martongkari i, jabat mabiar komandan i betak sai diparsuakkon halahi lalu si Paulus. Jadi disuru ia ma pasukannia i mambuat si Paulus sian tonga-tonga ni halahi, dioban ma ia tu markas.

¹¹Borngin na mangihut i ro ma Tuhan jongjong di lambung ni si Paulus mandok, “Papos ma rohamu! Madung dilehen ho hasaksian taringot tu Au di Jerusalem. Angkon laing saksihononmu ma songon i di Rom muse.”

¹²Manyogotna i, adong ma halak Jahudi marlagut mambaen kompolotan. Disumpahon halahi ma na so ra halahi mangan sanga minum anggo so jolo dibunu halahi si Paulus.

¹³Adong do lobi opat pulu halak na mambaen kompolotan i.

¹⁴Didapotkon halahi ma angka kapala ni malim dohot angka hatobangon ni halak Jahudi, didok halahi ma, “Madung rap marsumpa hami na so ra hami mangan sanga minum bagi aha, anggo so jolo hami bunu si Paulus.

¹⁵Antong hamu angka dongan dohot angka anggota ni Mahkamah Ugamo i, baen hamu ma surat tu komandan ni tentara Rom i mangido anso dioban ia si Paulus mangulahi mangadop tu hamu. Jadi tarsongon na giot paresoonmunu ma parkaronia i tumangkas mangulahi. Tapi anggo hami madung rade laho mamunu ia dompak so lalu dope tuson.”

¹⁶Tapi tarboto ma tu babere ni si Paulus sangkap ni na sakompolotan i. Jadi kehe ma ia tu markas paboahon i tu si Paulus.

¹⁷Manigor dipiohon si Paulus ma sahalak perwira, didok ia ma, “Boan hamu ma jolo bayo on tu komandan i; adong na giot sipaboaonnia tu komandan i.”

¹⁸Dioban perwira i ma doli-doli i tu komandan i, didok ia, “Na nipiohon ni si Paulus, tahananta i do au jana dipangido ia anso huoban doli-doli on tu jolomu; adong na giot sipaboaonnia,” ning perwira i.

¹⁹Ditogu komandan i ma tangan ni doli-doli i, kehe ma halahi na dua tu topi-topi, disapai ia ma disi, “Aha do na giot sipaboaonmi tu au?”

²⁰Dialusi doli-doli i ma, “Madung martahi halak Jahudi laho mangido tu tuan i anso dioban si Paulus ancogot mangadop tu Mahkamah Ugamo, tarsongon na giot paresohon parkaronia i tumangkas.

²¹Tapi ulang ma dioloi tuan i pangidoan ni halahi i, angke adong do lobi opat pulu halak na dung martabuni laho mangadang ia di dalan i. Na dung marsumpa do halahi sude na so mangan sanga minum anggo so jolo dibunu halahi si Paulus. Jadi saonnari pe madung rade halahi; na hum paintehon alus sian tuan i sajo noma halahi.”

²²Didok komandan i ma, “Ulang jabat dipaboa ho sanga na tu ise na dung nipaboamu pangalaho on tu au,” ning ia, lalu disuru ia ma mulak doli-doli i.

²³Dung i dipio komandan i ma dua halak perwira, didok ia ma tu halahi, “Pasingkop hamu dua ratus halak parajurit rap dohot pitu pulu halak tentara parkudo dohot dua ratus halak tentara sitiop hujur anso kehe borngin on pukul sambilan tu Kaisarea.

²⁴Laing pasingkop hamu ma kudo tenggeton ni si Paulus jana tangkas ma jagohon hamu ia lopus horas lalu tu Gubernur Peliks.”

²⁵Dung i dibaen komandan i ma surat songon on,

²⁶“Na niparsangapan Gubernur Peliks. Tabe ma di hamu sian au Klaudius Lisias!

²⁷Na nitangkup ni halak Jahudi do bayo on jana sugari sura nada ro au maroban pasukan laho paluahon ia, saotik nari noma anso dibunu halahi ia; angke warga negara Rom do ia hubege.

²⁸Jadi anso huboto sanga aha satutuna salania na nituhas ni halak Jahudi gabe huoban ma ia tu Mahkamah Ugamo ni halahi.

²⁹Disi huboto ma bahaso hum hara ni parsasilisian taringot tu Tona ni halahi do, dibaen na niaduhon ia, tapi nada adong dapot hasalaannia na patut mate ia uhumon sanga hurungkonon.

³⁰Madung dipabotohon tu au, na adong tahi ni halak Jahudi laho mamunu ia. I do umbaen na hupasahat ia manigor tu Gubernur i. Jana madung husuru angka na manuhas ia pasahat pangaduan ni halahi tu tuan i.”

³¹Jadi dipatulus angka tentara i ma tugas ni halahi i. Dialap halahi ma si Paulus jana dioban halahi ma ia laing borngin i tu Antipatris.

³²Ancogotna i tentara parkudo i sajo noma dipadiar halahi torus kehe rap dohot si Paulus. Anggo halahi mulak noma tu markas.

³³Dung lalu tentara na markudo i di Kaisarea, dipasahat halahi ma surat i tu Gubernur i, jana dipasahat halahi muse ma dohot si Paulus tusia.

³⁴Dung disise Gubernur i surat i, disapai ia ma si Paulus sanga halak dia ia. Jadi dung diboto ia na marasal sian Kilikia si Paulus,

³⁵didok ia ma, “Antong denggan ma i! Hupareso pe parkaromon, muda dung lalu tuson angka na mangaduhon ho,” ning ia. Dung i diparentahon Gubernur i ma anso dipamasuk si Paulus tu tahanan na di bagas ni si Herodes.