Read Batak Angkola BAENON NI ANGKA RASUL 27 Bible Online

BAENON NI ANGKA RASUL 27 - Batak Angkola bible

BAENON NI ANGKA RASUL 27

¹Dung dipaputus angkon marlayar ma hami tu Italia, dipasahat halahi ma si Paulus dohot deba nari tahanan na asing tu tangan ni si Julius, i ma perwira ni tentara Rom na nigoaran “Resimen Ni Kesar”.

²Di Adramitium ma hami manaek kapal, i ma kapal na giot mamolus sian angka kota labuan na di Luat Asia. Adong ma disi sada halak Makedonia na ro sian Tessalonika, na margoar si Aristarkus, rap muse ma hami marlayar dohot ia.

³Ancogotna i lalu ma hami di Sidon. Denggan sajo do roha ni perwira Julius i tu si Paulus. Dipaloas ia do si Paulus kehe mandapotkon angka donganna anso tarlehen halahi sanga aha na porlu disia.

⁴Sian i, hami patorus ma na marlayar i. Jadi hara ni haroro ni alogo na maralo tu pardalan ni kapal i, gabe songon na manopi-nopi ma pardalan ni kapal i sian lambung ni pulo Siprus anso holip sian alogo i saotik.

⁵Dung i hami bolus ma laut na bidang tontang ni Kilikia dohot Pampilia lopus lalu tu Mira na di Luat Likia.

⁶Dapot perwira i ma disi sada kapal na ro sian Aleksandria na giot kehe marlayar tu Italia. Gabe tu kapal i ma hami dipindahon ia.

⁷Adong do piga-piga ari angkon maradu lambat pardalan ni kapalnami i jana songon i ma lojana lopus lalu hami tu Knidus. Jadi hara ni na laing jatjat dope haroro ni alogo i, gabe nada tarbaen hami be torus marlayar tu tujuannami hian. Gabe torus ma hami tu Selatan ni pulo Kreta, mamolus sian Tanjung Salmone anso holip hami sian alogo i.

⁸Maol sajo do hami layari topi-topi ni pulo i lopus lalu hami tu sada inganan na margoar Labuan Na Jogi, nada pola sadia dao be i sian Lasea.

⁹Jadi hatiha i, ma salpu Ari Pesta Pardamean[23] Ni Halak Jahudi. Satutuna madung salpu hatiha na denggan di hami, nada tarbaen sonang be na marlayar on. Jadi gabe dipaingot si Paulus ma halahi,

¹⁰“Hamu ale angka dongan! Anggo ninna rohangku marmara godang do hita muda tapatorus na marlayar on, gabe rugi do hita bahat sajo, nada hum barang-barang muatan ni kapal on dohot kapal on sandiri, tapi dohot do hosanta on,” ning ia.

¹¹Tapi porsayaan do perwira i tu juru mudi dohot tu kapiten ni kapal i ulang pado tu na nidok ni si Paulus i.

¹²Tutu hurang denggan ma nian angka kapal maradian disi lumobi di musim ngali. Jadi gabe satahi ma angka parkapal i torus marlayar manadingkon pulo i anso sanga nian lalu tu Peniks anso disi ma lopus abis musim ngali. Anggo Peniks, i ma sada kota labuan di pulo Kreta na mangadop tu Barat Daya dohot tu Barat Laut.

¹³Songon na purpur dope hatiha i haroro ni alogo sian sabola Selatan. Ninna roha ni parkapal i, na dung denggan ma tarbaen marlayar mangulahi. Jadi dibuat halahi ma sao i, dipatorus halahi ma marlayar manopi-nopi pulo Kreta.

¹⁴Nada sadia honok ro ma alogo na gogo — i ma alogo na somal digoari halak alogo Timur Laut — na marhalingsungsung sian darat,

¹⁵gabe ditondong ma kapalnami i. Jadi hara ni na so tolap kapal i torus mangalo angin i gabe so sajo noma hami. Hami padiar noma mayup-ayup boti kapal i dioban alogo i.

¹⁶Jadi hatiha mamolus hami sabola Selatan ni pulo Kauda na menek i songon na onding ma hami santongkin. Disi pe anso tarrajai hami sikoci ni kapal i dung jolo loja hami dibaensa.

¹⁷Dung dipanaekkon sikoci i tu kapal, dipagomos ma kapal i, dirahut ma dohot tali humaliang kapal i. Jadi hara ni na mabiar hami tardampar kapal i tu pasir hara ni pejet ni laut di Laut Libia, nipaijur noma layar anso mardalan songon i sajo kapal i marguru tu paroban ni alogo i.

¹⁸Torus do anggo alogo i marsitutu. Jadi ancogotna i mamungka ma niparambungkon angka barang-barang muatan ni kapal i tu laut.

¹⁹Di ari na mangihut i diparambungkon parkapal i muse ma angka parkokas ni kapal i tu laut dohot tangan ni halahi sandiri.

²⁰Adong do sanga na piga ari nada hami ida mataniari dohot bintang, jana alogo i pe laing torus do marngongos. Jadi nada adong be arop ni rohanami malua.

²¹Sanga na piga ari i honokna na so mangan halahi. Jadi jongjong ma si Paulus di tonga-tonga ni halahi mandok hata, “Hamu ale angka dongan! Sugari diihutkon hamu hian ma sipaingotku, ulang sian Kreta hita marlayar, nada pola songon on segona dohot harugianna.

²²Tapi saonnari pe gomos ma hupangido tu hita sude anso laing godang rohanta. Sahalak pe nada adong na jabat mate sian hita; hum kapal on sajo ma i na mago.

²³Harana napotangin madung disuru Debata na husomba i surusuruanNia tu au, Debata i do nampuna au.

²⁴Didok surusuruan i do tu au songon on, ‘Ulang ho mabiar Paulus! Angke tulus do ho mangadop tu Kesar i. Jana hara ni denggan ni roha ni Debata maradopkon ho, gabe malua do sude donganmu sakapal hara ni ho,’ ninna.

²⁵Jadi hara ni i hamu ale angka dongan, angkon godang ma rohanta! Angke pos do rohangku di Debata, angkon tulus do sudena na nidokNia i tu au.

²⁶Tapi anggo hita angkon tardampar ma tu topi ni sada pulo,” ning si Paulus.

²⁷Di borngin paopat bolaskon mumbang-umbang ma hami di Laut Aderia. Hira-hira tonga borngin taraso ma tu parkapal i na marayak lalu kapal i tu darat.

²⁸Jadi dibonomkon halahi ma batu na nitambat tu bagasan laut i laho mandodo sanga na sadia bagas laut i. Hape nada tuk opat pulu meter bagasna inganan i. Nada sadia honok disuhat halahi ma mangulahi jana diboto halahi ma na so tuk be tolu pulu meter bagasna.

²⁹Mabiar ma halahi ulang jabat tombom kapal i tu karang, gabe dipaijur halahi ma opat sao sian pudi ni kapal i. Hurang tibu noma dilala halahi anso torang ari.

³⁰Tapi marusaho do angka parkapal i giot gilo. Dipaijur halahi sekoci, jana dipaula halahi ma songon na giot madabu sian kapal i.

³¹Hara ni i, ninna si Paulus ma mandok tu perwira dohot angka soridadu i, “Muda nada tinggal halahi di kapal on, nada tarbaen hamu malua.”

³²Dung i digotap angka soridadu i ma tali ni sekoci i jana madabu ma i tu laut.

³³Jadi painte so torang ari disosohon si Paulus ma anso mangan jolo halahi sude. Didok si Paulus ma, “Ma opat bolas ari honokna marsitutu be hamu na painte-intehon sajo, nada mangan bagi aha.

³⁴Hupangido mangan ma hamu jolo bope hum saotik. Denggan do i anso margogo hamu mangulahi. Harana angkon laing malua do hamu sude jana nada pola hurangan hamu sanga aha,” ninna si Paulus.

³⁵Jadi dung didok si Paulus songon i dibuat ia ma roti, didok ia ma tarimakasi tu Tuhan di jolo ni halahi sude. Dung i dibagi-bagihon ia ma roti i, lalu dipangan ia.

³⁶Jadi togar ma halahi sude mangulahi jana dohot ma halahi rap mangan.

³⁷Adong do dua ratus pitu pulu onom[24] halak sude halahi na sakapal i.

³⁸Dung butong mangan halahi sude, diambungkon halahi ma gandum muatan ni kapal i tu laut anso murnayang kapal i.

³⁹Dung torang ari, adong ma diida parkapal i darat, tapi nada diboto halahi sanga na darat ni dia i. Diida halahi muse ma sada Solok dohot topina i. Jadi didok roha ni halahi tusi ma nipadarat kapal i muda tarbaen.

⁴⁰Jadi digotap halahi ma tali sao i jana dipadiar ma bonom di laut i angka sao i. Ihut tusi laing diharkari halahi ma tali pangarahut ni amudi. Dipasang halahi muse ma layar di jolo anso mardalan tu jolo kapal i diombus alogo i lopus lalu tu topi.

⁴¹Hape mantul ma kapal i tu pasir. Tombom ma kapal i sian jolo, nada targulotkon be, sian pudi pe maropuk ma hara ni panondong ni ombak na gogo-gogo i.

⁴²Tubu ma tu roha ni angka tentara na di kapal i laho mamunu sude angka tahanan na disi harana mabiar halahi betak sai adong na marlange tu darat lalu kehe gilo.

⁴³Tapi diantahi perwira i do maksud ni tentara i hara ni na giot paluahon si Paulus ia. Disuru ia ma marlange sude mangambur sanga na ise na malo marlange anso dilangei halahi manigor tu darat;

⁴⁴mandapoti ma anggo na deba nari maniop papan-papan sanga hoping-hoping ni kapal i. Jadi songon i ma dalanna gabe horas hami sude lalu tu darat.