Read Batak Angkola BAENON NI ANGKA RASUL 28 Bible Online

BAENON NI ANGKA RASUL 28 - Batak Angkola bible

BAENON NI ANGKA RASUL 28

¹Dung horas hami sude lalu di darat, disi pe anso hami boto, pulo Malta do hape goar ni pulo i.

²Burju-burju do halak pulo i maradopkon hami. Denggan do dijagit halahi hami jana manigor dipagara halahi do api di hami, angke mamungka ma ro muse udan boti hara ni ngali ni ari.

³Dipalagut si Paulus ma hayu-hayu, dibaen ia ma i tu api i. Jadi taran mambaen songon i si Paulus, ruar ma sada ulok hara ni milas ni api i. Diturbing ma tangannia.

⁴Jadi dung diida halak pulo i laing gantung ulok i di tangannia, marsidokkon hatana ma halahi sama halahi, “Tontu sibunu jolma do bayo on, harana haru pe na dung malua ia sian parmaraan na di laut i, nada dipaloas Dewi Hasintongan i ia mangolu,” ninna halahi.

⁵Tapi dihirpaskon si Paulus ma ulok i tu api i, umpe hancit dilala ia.

⁶Ninna roha ni halahi marbosar ma tangan ni si Paulus i santongkin nari, sanga manigor tompu ma ia mate. Hape dung honok dipainte-inte nada adong sanga aha na ompot tarjadi tusia, gabe muba muse ma pikiran ni halahi. Didok halahi ma, debata si Paulus.

⁷Nada pola sadia dao sian inganan i adong do tano ni si Publius, i ma raja di luat i. Denggan sajo do rohania manjagit hami gabe tamunia jabat tolu ari.

⁸Hatiha i topet do marnyae amangnia. Marun boti baro bunion. Jadi kehe ma si Paulus mangaligi na marnyae i, martangiang ma ia lalu dipayakkon ia tangannia tu uluna i, gabe malum ma nyae i.

⁹Jadi hara ni i, marroan ma sude halak na marnyae di pulo i mandapotkon si Paulus jana dipamalum ia ma halahi.

¹⁰Bahat do dipatupa halahi silehen-lehen di hami, jana dioban halahi ma tu kapal sudena na porlu di hami laho kehe hami marlayar.

¹¹Dung adong tolu bulan honokna disi, kehe ma hami sian pulo i, hami tompang ma sada kapal na ro sian Aleksandria, na maradian di pulo i salolot musim ngali. Dioskuri do goar ni kapal i.

¹²Marlabu ma hami di kota labuan Sirakusa, disi ma hami tolu ari.

¹³Sian i marlayar ma hami lalu tu kota Regium, jadi dung salpu sada ari ro ma angin sian Selatan jana lalu ma hami di ari paduahon tu Putioli.

¹⁴Disi ma dapot hami angka dongan na mangido anso maradian hami disi pitu ari; dung i kehe ma hami tu Rom.

¹⁵Tarboto ma tu angka dongan na porsaya tu Jesus na di Rom; gabe marroan ma halahi lalu tu Pasar Apius dohot tu Pasanggarahan Na Tolu mangalo-alo hami. Dung marsuo halahi dohot si Paulus di Rom, didok ia ma tarimakasi tu Debata jana sabam ma rohania.

¹⁶Dung lalu di Rom, dipatola do si Paulus maringanan sandiri, tapi laing adong do sahalak parajurit manjagoi ia.

¹⁷Dung tolu ari dipiohon si Paulus ma angka bagian hatobangon ni halak Jahudi na disi. Jadi dung marlagut halahi, mandok hata ma ia tu halahi, “Hamu ale angka dongan! Nada adong salangku maradopkon bangsonta, sanga na mangalanggar adat hasomalan na tajagit sian angka ompunta sijolo-jolo tubu. Tapi haru songon i pe, ditangkup do au di Jerusalem jana dipasahat tu halak Rom.

¹⁸Jadi dung dipareso parkarongki, giot paluaon ma au, harana antong nada adong sada hasalaan pe na hubaen na patut mate niuhuman au.

¹⁹Tapi hara ni na sai dialo halak Jahudi, gabe tarpaksa ma hupangido anso di jolo ni Kesar ni Rom on parkarongki diadili. Hubaen pe songon i, nada hara ni na adong pangaduanku maradopkon bangsongku sandiri.

²⁰Hara ni i ma da hamu ale angka dongan, umbaen na hupiohon hamu anso mangkobar-hobari au dohot hamu; harana, tarrante pe au hara ni arop ni roha ni halak Israel i do,” ning ia.

²¹Dung i didok halahi ma tusia, “Nada adong dope surat bagi aha hami jagit sian Judea taringot tu ho. Jana nada adong dope sada dongan na ro sian adu maroban barita taringot tu ho sanga na paboahon barita na jat taringot tu ho.

²²Tapi hami pe, giot begeonnami do nian taringot tu haporsayaanmunu, harana madung sude hami umbege na so tumbuk do di halak poda na nitiopmu,” ninna halahi.

²³Jadi ditontuhon halahi ma sada ari parsuoan ni halahi dohot si Paulus. Bahat do halak marroan tu inganan ni si Paulus di ari i. Sian manyogot lalu tu potang dipajojor jana dijamitahon si Paulus ma tu halahi barita taringot tu Harajaan Ni Debata. Didokkoni si Paulus ma angka ayat sian Buku Ni si Musa bope Buku Ni angka Panurirang anso dihaporsayai halahi nian Jesus.

²⁴Adong do nian deba na porsaya tu na nidok ni si Paulus i, tapi deba nada ra porsaya.

²⁵Jadi morot be ma halahi sian inganan i marsioban pandapotna be, dung jolo didok si Paulus songon on, “Tutu ma na nidok ni Tondi Parbadia markite-hite Panurirang Jesaya tu angka ompumunu i!

²⁶Didok Tondi i do songon on, ‘Kehe ma paboa tu bangso on: Torus do nian marbinege hamu, tapi umpe mangarti; torus do nian hamu mangaligi, tapi umpe marnida.

²⁷Angke madung jogal roha ni bangso on, disumpol halahi do pinggolna jana dipapitpit matana. Angke sugari nada songon i, tontu marnida do mata ni halahi, marbinege do pinggolna, mangarti muse do roha ni halahi, jana mulak do halahi tu Au, disi ma Hupamalum halahi.’ ”

²⁸Ujungna didok si Paulus, “Angkon botoonmunu do, saonnari madung dipalalu do barita haluaan na sian Debata tu angka bangso na asing na so Jahudi. Ra do halahi mangihutkon i!” [

²⁹Dung didok si Paulus songon i, markehean ma halak Jahudi i sian inganan i martongkari sama-sama halahi.]

³⁰Dua taon honokna si Paulus di Rom di sada bagas na niongkosnia sandiri. Tongtong do jop rohania manjagit halak, sanga na ise pe na ro mandapotkon ia.

³¹Jana nada pola adong biarnia paboahon Harajaan Ni Debata tu halahi, songon i taringot tu Tuhan Jesus Kristus. Bebas do si Paulus mambaen songon i, nada pola adong na mangambat-ambati ia.