Read Batak Angkola BAENON NI ANGKA RASUL 3 Bible Online

BAENON NI ANGKA RASUL 3 - Batak Angkola bible

BAENON NI ANGKA RASUL 3

¹Sanoli rap kehe ma si Petrus dohot si Johannes tu Bagas Ni Debata pukul tolu andospotang, i ma hatiha ni na martangiang.

²Di pintu na margoar “Pintu Na Jeges”, adong ma sada bayo na pangpang hian sian mulai sorang. Ganop ari do bayo on dioban halak tusi mangido-ido sidoka tu angka jolma na marroan tu Bagas Ni Debata.

³Dung diida ia ro si Petrus dohot si Johannes giot masuk tu Bagas Ni Debata i, dipangido ia ma sanga na aha sian halahi silehenonna disia.

⁴Dipamanat halahi ma bayo i, gabe ninna si Petrus ma tusia, “Ligi ma jolo tu hami!”

⁵Diparrohahon ia ma antong tu halahi, arop ma rohania dapotan sanga aha ia sian halahi.

⁶Tapi didok si Petrus ma tusia, “Anggo perak dohot sere nada adong di au. Tapi sanga aha na adong di au, hulehen pe di ho. Mangasahon goar ni Jesus Kristus na sian Nasaret i, mardalan ma ho!” ning ia.

⁷Dung i ditogu si Petrus ma tangan siamun ni bayo na pangpangon i laho pajongjong ia. Manigor margogo ma pat ni bayo i dohot mataniari ni patna i.

⁸Dung i mangambur ma ia jongjong jana mamungka ma ia mardalan pahae-pahulu. Dung i masuk ma ia tu Bagas Ni Debata rap dohot halahi, mardalan ma ia mangambur-ambur mamuji-muji Debata.

⁹Sude halak na disi i marnida ia mardalan mamuji-muji Debata.

¹⁰Dung i diingot halahi ma, ia do hape pangido-ido sidoka na sai juguk di “Pintu Na Jeges”, na di Bagas Ni Debata i. Homang jana longang ma roha ni halahi marnida na tarjadi i tusia.

¹¹Hara ni na torus dipaihut-ihut bayo i si Petrus dohot si Johannes, jadi sude ma halak na bahat na tarhomang i marroan mangarongomi halahi di emper na margoar “Emper Salomo”.

¹²Di na niida ni si Petrus halak na bahat i, didok ia ma tu halahi, “Hamu ale halak Israel, biasi pola homang rohamunu? Adong he ninna rohamunu hara ni na adong kuaso di hami sanga hara ni haburjuonnami gabe tarbaen bayo on mardalan?

¹³Debata na nisomba ni si Abraham, si Ishak, si Jakob dohot angka ompunta i, i ma Debata na dung pasangapkon NaposoNia, i ma na margoar Jesus, na nipasahatmunu jana na nitulakmunu di adopan ni si Latus di na giot dipalua si Latus Ia.

¹⁴Ditulak hamunu do Na Badia jana Na Tigor i, jana dipangido hamunu do anso dipalua sibunu jolma i.

¹⁵Dibunu hamu ma Ia, haru pe nian Ia do haroroan ni ngolu ni sude jolma. Jana madung dipangolu Debata Ia mangulahi sian hamatean. Hami sandiri ma manyaksihon i.

¹⁶Haporsayaan di goar ni Jesus madung mangalehen gogo tu jolma na niligi jana na nitandamunu on; jana haporsayaan i ma na mangalehen hamalumon tu bayo on di adopanmunu sudena.

¹⁷Hamu ale angka dongan! Saonnari madung huboto hara ni na so diboto hamunu do umbaen na dibaen hamu songon i, laing songon i ma nang angka pamimpinmunu.

¹⁸Jana hara ni i ma umbaen na laing tarjadi sanga aha na dung dipabotohon Debata markite-hite angka panurirangNia, paboa na angkon manaon parkancitan do hape Kristus i.

¹⁹Hara ni i, pauba hamunu ma rohamunu sian angka dosamunu jana mulak ma hamu tu Debata, anso disesa Ia sude angka dosamunu i.

²⁰Muda songon i, laing diparo Tuhan ma hatiha hajopan, jana anso disuru ma tu hamu Jesus i songon na dung ditontuhon hian gabe Kristus di hamu.

²¹Laing di banua ginjang do Ia lopus dipaimbaru Debata sasudena songon na nidok ni Debata markite-hite angka panurirangNia na badia di hatiha na robi.

²²Angke jungada do didok si Musa, ‘Suruhonon ni Tuhan Debatamunu do tu hamu sada panurirang sian bangsomunu sandiri songon parsuruNia di au.[3] Angkon tangihononmunu do sude na nidok ni panurirang i tu hamu.

²³Sanga ise na so manangihon na nidok ni panurirang i, angkon dipasiding do ia sian bangso ni Debata jana dibunu.’

²⁴Sudena angka panurirang na dung jungada pabolkaskon barita na sian Debata, mamungka sian Panurirang Samuel dohot angka panurirang na asing di pudi ni si Samuel, dipaboa halahi do taringot tu na masa sisaonnari on.

²⁵Di hamu do angka janji ni Debata na nipabolkas ni angka panurirang i. Di bagasan parjanjian na nibaen ni Debata tu angka ompungmunu pe didok Debata do tu si Abraham songon on, ‘PasupasuonKu ma sude bangso na di tano on markite-hite pomparanmu.’

²⁶I do umbaen na nipili ni Debata NaposoNia, jana hamu do na parjolo didapotkon Ia anso dipasupasu Ia hamu, dohot paubahon rohamunu sudena sian ngolumunu na jahat i.”