Read Batak Angkola BAENON NI ANGKA RASUL 4 Bible Online

BAENON NI ANGKA RASUL 4 - Batak Angkola bible

BAENON NI ANGKA RASUL 4

¹Taran mangkobari dope si Petrus dohot si Johannes tu halak na bahat i, ompot ma ro angka malim dohot kapala ni panjago ni Bagas Ni Debata dohot angka halak Saduse mandapotkon si Petrus dohot si Johannes.

²Muruk ma halahi hara ni na nidok ni Petrus dohot si Johannes tu halak na bahat i paboa na adong do hangongot di bagasan Kristus.

³Dung i ditangkup halahi ma rasul sidua halak i dipamasuk halahi ma tu hurungan lopus manyogot; dibaen madung potang ari.

⁴Tapi anggo angka na dung umbege pangajaran ni angka rasul i, bahat do na porsaya. Gabe martamba ma bilangan ni halahi jabat adong hira-hira lima ribu halak.

⁵Ancogotna i marlagut ma angka pamimpin ni halak Jahudi, angka hatobangon, dohot angka Siboto Surat di Jerusalem.

⁶Dohot ma disi Malim Godang Hannas, dohot si Kayafas, si Johannes, si Aleksander dohot sudena na masuk horong ni Malim Godang i.

⁷Dioban ma si Petrus dohot si Johannes mangadop tu halahi, dung i disapai halahi ma, “Markite-hite kuaso sanga markite-hite goar ni ise dehe dibaen hamu na songon i?” ninna halahi.

⁸Dialusi si Petrus na nigohan ni Tondi Parbadia i ma, “Hamu angka tuan pamimpin ni bangso on, dohot angka hatobangon!

⁹Muda angkon dipareso ma hami, hara ni pambaenan na denggan tu halak na marnyae, jana angkon patorangkon markite-hite kuaso ni ise bayo i dipamalum,

¹⁰antong botoon ni hamu sude ma, dohot sude bangso Israel, bahaso di bagasan goar ni Jesus Kristus, halak Nasaret i do bayo on torkis di adopanmunu. Madung diparsilangkon hamu Jesus i, tapi hape madung dipangolu Debata Ia sian halak na mate.

¹¹Jesus i ma: ‘Batu na niambungkon ni angka tukang bagas — i ma hamu sandiri — , hepengani i do na gabe batu parsuhi.’

¹²Hum markite-hite Jesus sajo do jolma dipalua. Harana sian sude jolma na satano on, nada adong sahalak pe na dung manjagit kuaso sian Debata laho paluahon hita.”

¹³Homang ma roha ni angka na marlagut i marnida habaranion ni si Petrus dohot si Johannes, jana diboto halahi muse hape halak na somal do rasul na dua i na so pola marsikola. Dung i diboto halahi ma, hape angka na mangihutkon Jesus do rasul na dua i.

¹⁴Jadi nada tardokkon halahi be sanga aha, angke laing disi do bayo na nipamalum i jongjong rap dohot si Petrus dohot si Johannes.

¹⁵Jadi disuru halahi ma anso haruar rasul na dua i sian bagas parrapotan i, dung i martahi ma halahi.

¹⁶Didok halahi ma, “Aha noma sibaenonta tu halahi? Madung diboto sude pangisi ni Jerusalem on hahomangan na so jungada masa on, halahi do mambaen i. Jana nada tarsoadahon hita i.

¹⁷Tapi anso ulang mur rarat be barita i tu halak na bahat, taondam jana taancam ma halahi na so tola be mangkatai halahi sanga na tu ise pe anggo mamake Goar i.”

¹⁸Dung i dipiohon halahi ma rasul na dua i masuk mangulahi, jana dipaksa ma halahi na so tola be mandokkon sanga mangajari mamake goar ni Jesus.

¹⁹Tapi dialusi si Petrus dohot si Johannes ma, “Timbang hamu ma jolo sanga dia na tigor di roha ni Debata: mangoloi angka parentamunu do sanga mangoloi parenta ni Debata.

²⁰Harana nada tarhasipkon hami taringot tu angka na dung hami ida dohot na hami bege sandiri.”

²¹Nada adong dapot angka na marrapot i sada dalan pe laho manguhumi si Petrus dohot si Johannes. Jadi diondam halahi ma rasul na dua i, dung i dipalua ma halahi na dua, angke sudena halak na bahat i gabe mamuji-muji Debata do hara ni na masa i.

²²Boti pe hara ni bayo na manjagit hamalumon na so jungada masa i, na dung marumur lobi opat pulu taon.

²³Dung malua si Petrus dohot si Johannes, mulak ma halahi mandapotkon angka donganna, dibaritahon halahi ma sude na nidok ni angka kapala ni malim dohot angka hatobangon tu halahi.

²⁴Dung dibege dongan ni halahi na masa i, rap martangiang ma halahi saroha tu Debata, ninna halahi ma, “O Tuhan, Ho do na manjadihon langit dohot tano dohot laut dohot sude pangisina.

²⁵Jana hara ni Tondi Parbadia markite-hite naposoMu si Daud; ompunami; madung didok Ho, ‘Biasi sai gaor angka bangso, jana biasi sai dipikiri angka bangso partahian na so marguna?

²⁶Markobas do angka raja ni tano on laho marporang, jana satahi angka pamimpin laho mangalo Tuhan jana Na NimiahanNia.’

²⁷Tutu do songon i. Angke marlagut do si Herodes dohot si Pontius Pilatus rap dohot halak na so mananda Tuhan bope halak Israel di kota on. Marlagut do halahi laho mangalo Jesus NaposoMu Na Badia i, na NimiahanMi,

²⁸giot patuluskon sasude na dung ditontuhon Ho hian markite-hite kuaso dohot hagiotMu.

²⁹Saonnari ligi ma ale Tuhan pangondam ni halahi tu hami. Paloas ma hami Tuhan angka naposoMon pararatkon baritaMi so pola mardongan biar.

³⁰Pahortang ma tanganMu mambaen hamalumon, jana baen ma angka tanda hahomangan markite-hite goar ni Jesus, NaposoMu Na Badia i.”

³¹Dung sidung na martangiang i, humutur ma bagas inganan ni halahi i. Digohi Tondi Parbadia ma halahi sude, mamungka ma halahi puluk sajo manjamitahon barita na sian Debata.

³²Sudena halahi na dung porsaya i, saroha jana satondi do ngolu ni halahi. Nada adong sian halahi na mangetong sinadonganna gabe nampunania sandiri. Sudena na adong di halahi, rap mamake do halahi.

³³Mardongan kuaso na godang, disaksihon angka rasul i ma na dung mangolu Jesus mangulahi. Jadi bahat sajo do pasupasu ni Debata di halahi.

³⁴Jadi umpe sahalak sian halahi na marhahurangan. Harana sanga ise sian halahi na adong tanona sanga bagasna digadis halahi do i; lalu dioban halahi ma hepengna i

³⁵jana dipasahat halahi ma i tu angka rasul i. Dung i dibagi-bagihon ma hepeng i tu halak na mangkaporluhon.

³⁶Laing songon i ma dibaen si Josep, na nigoaran ni angka rasul i si Barnabas (astuanna Si Pangapoi). Marga Levi do i na sorang di Pulo Siprus.

³⁷Digadis ia ma kobunnia, dung i dioban ia ma hepengna i jana dipasahat ia ma i tu angka rasul i.