Read Batak Angkola BAENON NI ANGKA RASUL 5 Bible Online

BAENON NI ANGKA RASUL 5 - Batak Angkola bible

BAENON NI ANGKA RASUL 5

¹Tapi adong ma sada bayo na margoar si Ananias. Madung digadis ia dohot dadaborunia na margoar si Sapira, saladang tano ni halahi.

²Deba sian hepengna i dibunihon ia ma di halahi sandiri jana lobina i ma dipasahat ia tu angka rasul i. Diboto dadaborunia i do na songon i dibaen ia.

³Tapi didok si Petrus ma tusia, “Ale Ananias, biasi dehe dipadiar ho Sibolis mangarajai rohamu, jabat margabus ho tu Tondi Parbadia, jana sip-sip ho manabunihon di ho sandiri deba sian hepeng tuhor ni tano i?

⁴Nada he tanomu hian do i dompak so digadis ho? Dung digadis ho pe tano i, laing ho do nampuna hepengna i. Antong biasi tubu di bagasan rohamu mambaen songon i? Nada jolma na nigabusanmu. Tapi Debata do!”

⁵Disi dibege si Ananias hata i, tinggang ma ia lalu mate. Gabe mabiar ma sudena halak na umbege na masa i.

⁶Jadi marroan ma angka doli-doli mambalut bangke ni si Ananias i, dioban halahi ma tu balian laho manguburkonsa.

⁷Dung adong hira-hira tolu jom, masuk muse ma dadaborunia i. Nada diboto ia dope sanga aha na masa i.

⁸Disapai si Petrus ma tusia, “Paboa ma jolo antong tu au: Tutu dehe saon arga ni tano na nigadismi dohot halaklahimi?” Ning dadaboru ni si Ananias ma, “Tutu do sai argana.”

⁹Dung i didok si Petrus ma tusia, “Biasi dehe satahi hamu giot manguji Tondi Ni Tuhan i? Ligi ma indi, ma mulak halahi na mananom halaklahimi. Obanon ni halahi muse ma ho tu balian.”

¹⁰Laing manigor santongkin i tinggang ma dadaboru ni si Ananias i lalu mate di jolo ni si Petrus. Jadi di na masuk angka doli-doli i, ma mate ia didapot halahi. Dung i ditaruhon halahi muse ma ia tu balian, jana ditanom halahi di lambung ni halaklahinia i.

¹¹Jadi mabiar situtu ma sude parlagutan dohot sude halak na mambege na masa i.

¹²Hara ni pangkobasion ni angka rasul i, gabe bahat do hahomangan dohot na so unjung masa tarjadi di tonga-tonga ni halak na bahat i. Saroha ma angka na porsaya i marlagut di Emper Salomo.

¹³Jana nada adong halak na asing na puluk ro marlagut dohot halahi, tapi sangap do diida na torop i halahi.

¹⁴Jana mur honok mur bahat do na porsaya tu Tuhan i — halaklahi bope dadaboru.

¹⁵Jana diparobani halak i do angka na marnyae, dibaen ma halahi di podoman sanga di lage, jana dioban ma halahi tu dalan, anso dais nada apala halinu ni si Petrus tu halahi muda mamolus si Petrus disi.

¹⁶Salaku mudur-udur noma halak marroan sian angka kota na humaliang Jerusalem. Diparobani halahi be ma na marnyae ni halahi dohot angka na hona tondi na jahat. Dung i dipamalum do halahi sude.

¹⁷Ujungna ro ma Malim Godang i dohot sudena dongannia, i ma golongan ni angka Saduse, mangamuk ma halahi hara ni na mangiburu.

¹⁸Ditangkup halahi ma angka rasul i, manigor dihurungkon tu hurungan na di kota.

¹⁹Tapi bornginna i ro ma sahalak surusuruan ni Tuhan mambuka angka pintu ni hurungan i, dioban ia ma angka rasul i tu ruar. Didok surusuruan i ma tu angka rasul i,

²⁰“Kehe ma hamu tu Bagas Ni Debata, jana disi ma hamu jongjong laho mamaritahon sude hata hangoluan i tu halak na bahat.”

²¹Dioloi halahi ma hata i. Sogot dope manyogot i kehe ma halahi tu Bagas Ni Debata, mangajari ma halahi disi. Jadi ro ma Malim Godang i dohot angka donganna i, dibaen halahi ma rapot pangurus ni ugamo rap dohot hatobangon ni halak Jahudi. Dung i disuru alap halahi ma rasul i sian hurungan.

²²Tapi dung lalu angka suruan i di hurungan, hape nada dapot halahi be disi angka rasul i. Jadi mulak boti ma halahi, dipaboa halahi ma songon i tu rapot i.

²³Ninna halahi ma, “Di na lalu hami di hurungan i, markunci do dapot hami angka pintu ni hurungan i jana disi do angka panjago i jongjong di jolo ni pintu i. Tapi di na hami buka pintu i, hape umpe sahalak dapot hami disi.”

²⁴Jadi dung dibege kapala ni panjago ni Bagas Ni Debata dohot angka kapala ni malim na nipaboa i tu halahi, puntol ma pikiran ni halahi hara ni angka rasul i boti mabiar betak sai adong na masa.

²⁵Tapi ro ma sada halak paboahon tu halahi, “Boto ma, halak na nihurungkonmunu i, madung mangajari halahi saonnari tu halak na bahat di Bagas Ni Debata!”

²⁶Dung i kehe ma kapala ni panjago ni Bagas Ni Debata rap dohot angka pangawalnia mangalap angka rasul i mangulahi. Tapi nada pola mangasahon gogo halahi angke mabiar do halahi mida halak na bahat, betak sai lalu halahi didanggur halak na bahat i dohot batu.

²⁷Dioban ma angka rasul i mangadop tu rapot i. Disapai Malim Godang i ma halahi.

²⁸Ning ia ma, “Nada he hami antahi do hamu, anso ulang be diajarkon hamu taringot tu Goar i. Tapi ligi hamunu ma sanga aha na dung nibaenmunu i! Madung digohi hamu Jerusalem on sude dohot pangajaranmunu, jana giot paporsankononmunu ma mudar ni Bayo i tu hami.”

²⁹Dialusi si Petrus dohot rasul na asing i ma, “Angkon Debata do ihutkononta, nada jolma.

³⁰Anggo Jesus na niparsilangkonmunu i, madung dipangolu Debata ni ompunta i sian hamatean.

³¹Jana madung dipabangkit Debata Ia markite tangan siamunNia gabe Pamimpin dohot Sipalua; anso marhamubaan ni roha dohot manjagit hasesaan ni dosa Israel i.

³²Hami ma saksi ni i sude — hami dohot Tondi Parbadia na nilehen ni Debata tu angka na mangoloi parentaNia.”

³³Jadi dung dibege halahi na songon i muruk sajo ma halahi, jana martahi ma halahi laho mamatehon angka rasul i.

³⁴Tapi adong ma sahalak Parise sian parrapotan i, na margoar si Gamaliel, Siboto Surat na niparsangapi ni halak na bahat. Jongjong ma ia jana dipangido ia ma anso nioban angka rasul i santongkin tu ruar.

³⁵Dung i didok ia ma tu rapot ni ugamo i, “Hamu angka dongan, halak Israel! Denggan ma timbangi hamu sanga aha na giot baenonta tu halak on.

³⁶Harana ro do najolo si Teudas na mangetong dirina halak na godang, jabat opat ratus halak mangihutkon ia. Hape dibunu do ia jana marserak ma angka na mangihutkon ia, mago boti ma dohot na nihalojahonnia i.

³⁷Jadi dung i, di na masa sensus, ro muse ma si Judas, halak Galilea i. Bahat do halak diela-ela ia giot mambaen hagaoran, hape hona bunu do jana marserak do sude na mangihutkon ia.

³⁸Jadi saonnari taringot tu na masa on, songon on ma sidohononku: Ulang ma hahua hamu halak on, tapadiar ma songon i. Harana anggo na sian jolma do pangajaran dohot na nikarejohon ni halahi, angkon gabe mago sandiri do pangajaran dohot na nikarejohon ni halahi i.

³⁹Tapi muda sian Debata do mula ni i, nada tartaluhon hamunu i. Betak na tardapot muse do hamu angka dongan, na mangalo tu Debata.” Dijagit rapot i ma hata ni si Gamaliel i.

⁴⁰Dung i dipiohon ma angka rasul i, diloncing jana dilarang ma halahi mangajarkon taringot tu Jesus mangulahi. I pe anso dipalua halahi.

⁴¹Morot ma halahi sian rapot ugamo i mardongan jop ni roha, harana na dung dietong roha ni halahi do patut marlayas hara ni Jesus.

⁴²Jana torus do halahi ganop ari mangajari di Bagas Ni Debata dohot di angka bagas ni halak, mamaritahon Jamita Na Denggan taringot tu Jesus Kristus.