Read Batak Angkola BAENON NI ANGKA RASUL 6 Bible Online

BAENON NI ANGKA RASUL 6 - Batak Angkola bible

BAENON NI ANGKA RASUL 6

¹Di hatiha i, dung mur martamba angka sisean, ro ma ungut-ungut ni halak Jahudi na marhata Junani tu angka na marhata Ibrani, hara ni pambagian ni pangurupion tu angka na mabalu ni halahi na hurang tigor.

²Jadi hara ni i, dipalagut rasul na dua bolas i ma sudena angka sisean i, jana mandok hata ma rasul i tu halahi, “Nada denggan muda mantak hami manjamitahon hata ni Debata, hara ni na paturehon soal sipanganon.

³Hara ni i, hamu ale angka dongan, pili hamu ma sian tonga-tongamunu sandiri pitu halak na tangkas burju jana na nigohan ni Tondi boti na bisuk, anso hami pabangkit halahi tu karejo na songon i.

⁴Anggo hami, giot mangkaburjuhon pikirannami di bagasan tangiang dohot manjamitahon hata i.”

⁵Rap manjagit ma halahi sude di na nidok ni angka rasul i. Dung i dipili halahi ma si Stefanus, sada halak na porsaya situtu tu Jesus jana na nirajaan ni Tondi Parbadia. Laing tarpili ma disi si Pilipus, si Prokorus, si Nikanor, si Timon, si Parmenas dohot si Nikolaus na sian Antiokia i; nada nian halak Jahudi ia tapi madung marbalik ia tu ugamo Jahudi.

⁶Dung i dipajongjong ma halahi di jolo ni angka rasul i, dung i martangiang ma angka rasul i jana diampehon ma tanganna tu halahi.

⁷Jadi mur rarat ma hata ni Debata, martamba ma bilangan ni angka sisean di Jerusalem, angka malim pe bahat do na gabe porsaya.

⁸Tapi anggo si Stefanus na gok asi ni roha dohot hagogoon, mambaen angka tanda-tanda dohot hahomangan na godang do di tonga-tonga ni halak na bahat i.

⁹Tapi laing adong do halak Jahudi na mangalo hatania: I ma angka anggota ni bagas paribadatan na margoar Libertini, tarmasuk ma i angka halak sian Kirene dohot sian Aleksandria. Marsoal-soal ma halahi dohot halak Jahudi na sian Kilikia dohot Asia taringot tu si Stefanus,

¹⁰Tapi nada tarsoadahon halahi sanga aha na nidok ni si Stefanus i, harana madung dilehen Tondi Parbadia disia hamaloan mandok hata.

¹¹Jadi hara ni i dijajang halahi ma halak anso ra mandok, “Madung hami bege diincahi ia si Musa dohot Debata!”

¹²Songon i ma panjajang-jajang ni halahi di jolma i dohot angka hatobangon ni halak Jahudi, songon i dohot angka Siboto Surat i.

¹³Jana dioban halahi muse ma angka saksi na mangalehen hatorangan na so tutu taringot tu si Stefanus. Didok angka saksi i ma, “Hum na mangincahi do bayo on tu Bagas Ni Debata na badia i jana laing diincahi ia do angka Tona Ni Debata na nipasahat ni si Musa i.

¹⁴Hami bege do didokkon ia, na giot rumpakkonon ni Jesus halak Nasaret i adat na denggan na nilehen ni si Musa tu hita!”

¹⁵Marsiligi ma sude halak na disi i tu si Stefanus. Jana tarida ma disi bohi ni si Stefanus songon bohi ni surusuruan.