Read Batak Angkola BAENON NI ANGKA RASUL 7 Bible Online

BAENON NI ANGKA RASUL 7 - Batak Angkola bible

BAENON NI ANGKA RASUL 7

¹Disapai Malim Godang i ma tu si Stefanus, “Tutu dehe sude na nidok ni halahi i?” ning ia.

²Dialusi si Stefanus ma, “Hamu ale angka dongan bope angka amanami! Tangihon hamu ma jolo na hudok on! Dompak so bungkas ompunta si Abraham tu Haran, hatiha di Mesopotamia dope ia, ro ma Debata na marmulia i tusia

³mandok, ‘Tinggalkon ma luat hagodanganmu dohot koum sisolkotmu. Kehe ma ho tu luat sipatuduhononKu tu ho’.

⁴Jadi ditadingkon si Abraham ma Luat Kasdim, bungkas ma ia tu Haran. Jadi dung jumolo amang ni si Abraham, dipabungkas Debata muse ma si Abraham tu luat on, i ma na niingananmunu saonnari ale angka dongan bope hamu amanami.

⁵Anggo di hatiha i, hum saotik pe nada adong dope luat on na nilehen ni Debata di si Abraham gabe nampunania; santompap pe nada adong dilehen disia. Tapi marjanji do Debata paboa na angkon lehenonNia do i tu si Abraham gabe nampunania dohot pomparannia. Nada adong dope dakdanak ni si Abraham hatiha i.

⁶Tapi songon on ma pandok ni Debata tusia, ‘Songon paisolat ma pomparanmu di luat ni halak na asing. Parhatobanon ni halak luat i ma halahi jana parkancitanna opat ratus taon honokna.

⁷Tapi ro ma Au manguhumi halak na mamparhatobankon halahi i, jana morot ma halahi sian luat i jana sombaon ni halahi ma Au di inganan on.’

⁸Dung didok Debata songon i, dipudun Debata ma janji i markite-hite sunat. Jadi hara ni i, dung sorang si Ishak anak ni si Abraham disunat ma ia dung marumur salapan ari. Si Ishak pe disunat ia ma anaknia, i ma si Jakob. Si Jakob pe disunat ia muse ma dakdanaknia na dua bolas i, i ma na gabe ompu parsadaan ni halak Israel.

⁹Tapi mangiburu do angka ompunta i tu si Josep, jabat digadis halahi ia gabe hatoban tu tano Mesir. Tapi Debata do dongannia,

¹⁰jana na paluahon ia sian sude parkancitannia. Dilehen ma tusia asi ni roha dohot bisuk di na kehe ia mangadop tu jolo ni raja ni Mesir i; diangkat raja i ma ia gabe kapala di tano Mesir, dohot di bagas godang ni raja i.

¹¹Jadi masa ma haleon potir di sude luat na di tano Mesir i dohot di Kanaan, gabe markancit situtu ma halak sudena. Nada dapotan sipanganon be angka ompunta i.

¹²Jadi dung dibege si Jakob adong do eme di tano Mesir, disuru ia ma angka dakdanaknia, i ma angka ompunta i kehe tusi parjolo situtu.

¹³Di na kehe halahi paduanolihon, disi ma dipatandahon si Josep dirina tu angka kahanggina i. I dope anso diboto raja ni Mesir i taringot tu kahanggi ni si Josep.

¹⁴Dung i disuru alap si Josep ma amangnia si Jakob dohot sude horongnia anso bungkas tu tano Mesir — pitu pulu lima halak ma halahi sudena.

¹⁵Jadi bungkas ma si Jakob tu tano Mesir jana disi ma marujung ngolunia dohot angka ompunta i.

¹⁶Anggo holi-holi ni halahi dioban do muse tu Sikem jana dikuburkon ma di kuburan na nitobusan ni si Abraham dohot hepeng sian angka anak ni si Hemor na di Sikem i.

¹⁷Dung marayak dapot ma hatihana patuluson ni Debata janjiNia i tu si Abraham, madung mur martamba bahat bangsonta i di Mesir.

¹⁸Ujungna mamarenta ma sada raja na asing na so mananda si Josep.

¹⁹Jadi diakal-akali raja i ma halak hita i, diparkanciti ia ma angka ompunta i. Dipaksa ia ma ambungkononkon angka dakdanak ni halak hita na baru sorang anso ulang mur mabahat halahi.

²⁰Di hatiha i ma sorang si Musa; tama do ia di adopan ni Debata. Tolu bulan lolotna sai di bagas ni amangna dope ia dipature-ture,

²¹jadi dung diambungkon ia, dibuat boru ni raja Mesir ma ia jana dipagodang-godang boru ni raja Mesir i ma ia songon anakna sandiri.

²²Sudena parbinotoan ni halak Mesir diajarkon do tusia jana gabe halak na marsahala situtu do ia muda mandok hata dohot mambaen sanga na aha.

²³Di na marumur si Musa opat pulu taon, tubu ma di bagasan rohania giot mangaligi sanga tarbia bangsonia Israel i.

²⁴Dung i diida ia ma sahalak na nisiksa ni halak Mesir; diondihon ia ma na hona siksa i, dibunu ia halak Mesir i.

²⁵Ning rohania diastui bangsonia i ma na dung dipake Debata do ia laho paluahon halahi. Hape nada diastui halahi dope.

²⁶Ancogotna i diida ia muse ma marbadai dua halak Israel, dicubo ia muse ma padamehon halahi. Didok ia ma, ‘Hamu dongan, na markahamaranggi do da hamu. Biasi marbadai hamu?’ ning ia.

²⁷Tapi dionjarkon na mamukul donganna i ma si Musa tu topi, didok ia ma, ‘Ise dehe lakna mambaen ho gabe pamimpin dohot panguhum di hami?

²⁸Adong he na giot bunuonmu muse do au songon halak Mesir na nibunumi natuari?’ ning ia.

²⁹Dung dibege si Musa na nidok ni bayo i, lari ma ia sian Mesir lalu tu Midian jana disi noma ia maringanan. Dua ma anaknia na sorang disi.

³⁰Jadi dung opat pulu taon, ro ma sada surusuruan mandapotkon si Musa di halongonan na di Dolok Sinai, di bagasan api na marjilam-jilam di tadatada i.

³¹Homang-homang ma si Musa midasa, gabe dipadonok ia ma laho manangkasi sanga na aha i. Jadi dibege ia ma sora ni Tuhan mandok,

³²‘Au do Debata ni angka ompungmu; Debata ni si Abraham, si Ishak dohot si Jakob.’ Humitir ma si Musa hara ni biarna, nada puluk be ia mangaligina.

³³Dung i didok Tuhan i muse ma, ‘Buka ma solop na nipakemi, harana tano na badia do inganan hajongjonganmi.

³⁴Madung Huida jana Huparrohahon hapaeton ni parkancitan na nitaon ni bangsongKi di tano Mesir. Madung Hubege holos ni halahi jana mijur ma Au laho paluahon halahi. Beta ma saonnari! SuruonKu ma ho mangulahi tu tano Mesir.’

³⁵Si Musa on ma na nitulak ni halahi, di na nidok ni halahi, ‘Ise he na mambaen ho gabe pamimpin dohot panguhum di hami?’ Hapengani ia do muse na nisuru ni Debata gabe pamimpin dohot na paluahon, markite-hite pangurupi ni surusuruan na ro mandapotkon ia di tadatada i.

³⁶Si Musa i ma na manguluhon halak Israel haruar sian Mesir jana na mambaen angka hahomangan dohot angka na so jungada masa di Mesir, di Laut Na Rara dohot di parhorsihan i opat pulu taon honokna.

³⁷Laing si Musa on do na mandok tu halak Israel, ‘Lehenon ni Debata ma tu hamu sada panurirang na nipiliNia sian tonga-tongamunu sandiri, songon panodoNia di au.’

³⁸Laing si Musa do na gabe panonga-nongai sian bangso Israel di parkorsihan i, maradopkon surusuruan na mangkatai tusia di Dolok Sinai bope tu ompunta i. Ia do na manjagit hata hangoluan sian Debata sipabolkason tu hita.

³⁹Hape haru songon i pe, laing nada ra angka ompunta i mangoloi ia. Ditulak halahi do ia jana giot mulak halahi tu Mesir mangulahi.

⁴⁰Ninna halahi do tu si Harun, ‘Baen ma angka gana-ganaan di hami anso i ma manguluhon hami. Harana nada hami boto be anggo taringot tu si Musa na maroban hami haruar sian Mesir i, sanga na bia ia!’

⁴¹Jadi dibaen halahi ma hatiha i sada patung ni anak ni lombu, dung i dipelehon halahi ma haul tu patung i jana marpesta ma halahi pasangapkon barang na nibaen ni tangan ni halahi sandiri.

⁴²Dung i ditadingkon Debata ma halahi jana dipadiar Debata ma halahi manyombai angka bintang na di langit i. Hombar do i tu na tarsurat di buku ni angka panurirang. Songon na tarsurat, ‘Ale hamu halak Israel! Jungada dehe dilehen hamu di Au haul na nitutung sanga haul na nisambol salolot na opat pulu taon di halongonan?

⁴³Bandar ni si Molokh do na nipaoban-obanmunu i rap dohot gana-ganaan ni bintang ni debatamunu na margoar Refan; i ma gana-ganaan na nibaenmunu gabe sisombaon. Hara ni i, angkon Huambungkon hamu lopus tu bariba an di Luat Babel.’

⁴⁴Bandar Hasaksian adong do di tonga-tonga ni jolma ompunta na di halongonan i. Hombar tu parenta ni Debata tu si Musa do dipature, jana mangihutkon gambaran na nipatidahon ni Debata tu si Musa.

⁴⁵Dung i sai dipaoban-oban angka ompunta i ma undung-undung i di na kehe halahi dohot si Josua mangarampas luatta on sian tangan ni angka bangso na niayak ni Debata di jolo ni halahi. Laing disi ma undung-undung i lopus tu hatiha ni si Daud.

⁴⁶Jop do roha ni Debata dibaen si Daud. Dipangidohon ia do tu Tuhan anso dipatola ia pajongjongkon sada bagas di Debata ni si Jakob.[4]

⁴⁷Hape si Salomo do na pajongjong bagas i di Debata.

⁴⁸Tapi nada maringanan Na Gumincat i di bagas na nibaen ni tangan ni jolma, songon na nidok ni panurirang i,

⁴⁹‘Langit do habangsa sijuguhanKu jana tano on sidegean ni patKu. Bagas aha ma he na giot pajongjongonmu di Au? Di dia ma he inganan na giot paradiananKu?

⁵⁰Nada he Au sandiri do na manjadihon sasudena i?’

⁵¹O hamu na jogal rungkung, bope na marroha dohot na marpinggol songon halak na so mananda Debata! Tongtong do dialo hamu Tondi Parbadia, songon ompumunu i, laing songon i do hamu muse.

⁵²Adong dehe panurirang na so diparkanciti ni angka ompungmunu i? Dibunu halahi do angka suruan ni Debata na mambaen boa-boa narobi, paboa na angkon ro ma Partigor i. Jana saonnari dihianati jana dibunu hamu do Naposo Ni Debata i.

⁵³Boti pe, madung dipalalu angka surusuruan tu hamu ale angka dongan angka parenta ni Debata, hapengani nada ra hamu mangihutkonsa!”

⁵⁴Jadi dung dibege angka na ro tu rapot ugamo i na nipajojor ni si Stefanus i, gabe hancit ma roha ni halahi jana patungaripon ma halahi tusia.

⁵⁵Tapi ditatap si Stefanus na nigohan ni Tondi Parbadia i ma tu langit. Diida ia ma hasangapan ni Debata dohot Jesus na jongjong di siamun ni Debata.

⁵⁶“Ligi pe da, mungkap do huida langit i jana jongjong Anak Ni Jolma i di siamun ni Debata!”

⁵⁷Disumpol angka halak na marrapot i ma pinggolna be, marsurahi ma halahi jana tompu ma halahi rap mangarongomi si Stefanus.

⁵⁸Disarat halahi ma ia tu balian ni kota i, jana didangguri dohot batu. Dipatiopkon halak na manyaksihon i ma pakean ni halahi tu sada doli-doli na margoar si Saulus.

⁵⁹Di na nidangguran ni halahi si Stefanus, pio-pio ma ia ning ia ma, “Ale Tuhan Jesus, jagit ma tondingku!”

⁶⁰Marsinggang ma ia, dipagogo ia ma sorania mandok, “Ulang ma dijujur dosa on tu halahi, ale Tuhan!” ning ia. Dung didok ia songon i, marujung ma ngolunia. Si Saulus pe moga ma dihilala ia hara ni na mamunu jolma i.