Read Batak Angkola BAENON NI ANGKA RASUL 9 Bible Online

BAENON NI ANGKA RASUL 9 - Batak Angkola bible

BAENON NI ANGKA RASUL 9

¹Tapi anggo si Saulus laing hosom dope rohania jana sai giot bunuonnia do angka anak sisean ni Tuhan. Kehe do ia tu Malim Godang,

²mangido surat kuaso anso tola ia kehe tu angka bagas paribadatan ni halak Jahudi di Damaskus laho manangkupi angka halak na mangihutkon dalan ni Tuhan na dapot ia, halaklahi bope dadaboru, anso dioban ia halahi tu Jerusalem.

³Di tonga dalan i laho tu Damaskus marayak kota i, ompot ma ro sada sinondang na mamincar sian langit humaliang si Saulus.

⁴Gabe tungkap ma ia tu tano i jana dibege ia ma sada sora na mandok tusia, “Saulus, Saulus! Biasi diparkanciti ho Au?”

⁵“Ise dehe Ho Tuan?” ning si Saulus manyapai. Mangalusi ma sora i, “Au ma da Jesus, na niparkancitanmi.

⁶Tapi jongjong ma ho, masuk ma ho tu kota i. Disi ma nipaboa tu ho sanga aha sibaenonmu.”

⁷Anggo angka dongan ni si Saulus i nada malo be mangkuling hara ni biarna; angke dibege halahi do antong sora i, hape nada adong diida halahi sanga ise pe.

⁸Dung i jongjong ma si Saulus, diungkap ia ma matania hape nada diida ia be bagi aha. Ditogu-togu halahi noma ia lalu tu Damaskus.

⁹Tolu ari honokna na so marnida i ia jana na tolu ari i umpe adong dipangan sanga diinum ia bagi aha.

¹⁰Adong do di Damaskus sada halak anak sisean, na margoar si Ananias. Di bagasan sada parnidaan, diida ia ma Tuhan i mandok hata tusia, “Ananias!” ninna. “Dison do au Tuhan,” ning si Ananias mangalusi.

¹¹Dung i didok Tuhan i ma, “Aha dope, kehe ma ho saonnari. Dapotkon ma bagas ni si Judas na di Dalan Lidang i. Sapai ma disi na margoar si Saulus halak Tarsus. Hatiha martangiang do bayo i,

¹²jana madung diida ia di bagasan sada parnidaan ro sada bayo na margoar si Ananias mandapotkon ia laho mamayakkon tanganna tu ulunia anso marnida ia mangulahi.”

¹³Dialusi si Ananias ma, “Bahat do hubege hata ni halak Tuhan, taringot tu bayo i, tarlobi taringot tu angka parkancitan na nibaennia maradopkon halakMu na badia i di Jerusalem.

¹⁴Jana saonnari ro do ia maroban surat isin sian angka sintua ni malim laho manangkupi sanga ise na porsaya tu Ho.”

¹⁵Tapi didok Tuhan i ma tu si Ananias, “Kehe ma ho! Harana na dung Hupili do ia mangoloi Au, anso dijamitahon ia taringot tu goarKu tu sude angka bangso na asing dohot tu angka raja, songon i dohot tu halak Israel muse.

¹⁶Jana patuduhononKu do tusia angka sitaonon na giot taononnia hara ni Au.”

¹⁷Si Ananias pe antong kehe ma tu bagas i jana dipayakkon ia ma tangannia tu si Saulus. Didok ia ma, “Ale Saulus, kahanggingku, Tuhan Jesus na niidami di tonga dalan laho tuson ho, Ia do na marsuru au mandapotkon ho anso marnida ho mangulahi jana digohi Tondi Parbadia.”

¹⁸Di na santongkin i manigor adong ma songon sisik ni ihan madabu sian mata ni si Saulus jana gabe marnida ma ia mangulahi. Jongjong ma ia lalu dipandidihon.

¹⁹Jadi dung mangan ia, mulak ma gogonia. Laing di Damaskus ma si Saulus rap dohot angka anak sisean i piga-piga ari nari.

²⁰Torus masuk ma ia tu angka bagas paribadatan, jana dipungka ia ma manjamitahon paboa Jesus i do Anak Ni Debata.

²¹Homang ma sude halak pabege-bege si Saulus. Didok halahi ma, “Nada he on do ibana na di Jerusalem i, na mamunu sude halak na mamio goar ni Jesus? Na niharohonnia pe tuson na giot manangkup halahi do anso obanonnia tu angka sintua ni malim!”

²²Tapi mur tamba do sahala ni si Saulus. Homang do roha ni angka halak Jahudi na di Damaskus hara ni na nipapatarnia bahaso Jesus do Kristus i.

²³Dung adong sadia honok, marpokat ma halak Jahudi laho mamunu si Saulus.

²⁴Tapi tarboto ma tusia na nitahihon ni halahi i. Dipainte-inte halahi ma arian na borngin di dalan haroroan tu kota i laho mamunu ia.

²⁵Hape ditantan angka anak siseannia i ma si Saulus borngin-borngin di bagasan karanjang sian dingding tembok ni kota i.

²⁶Kehe ma si Saulus tu Jerusalem, jana diusahahon ia ma anso mardomu ia tu angka anak sisean na disi. Tapi mabiar be dope halahi angke nada porsaya dope halahi paboa na dung tutu situtu ia gabe anak sisean.

²⁷Dung i didapotkon si Barnabas ma si Saulus jana dioban ia ma si Saulus mandapotkon angka rasul i. Dicaritohon si Barnabas ma tu halahi sanga na tarbia pangalahona diida si Saulus Tuhan i di tonga dalan, dohot pangkobariNa tusia. Laing dipajojor si Barnabas dope disi na dung puluk si Saulus mangajari di Damaskus di bagasan goar ni Jesus.

²⁸Jadi gabe rap ma si Saulus dohot halahi, jana nada adong biarnia marjamita di Jerusalem mangasahon goar ni Tuhan i.

²⁹Mangkobari ma ia jana marsoal jawab dohot halak Jahudi na marhata Junani, tapi diakalkon halahi do laho mamunu ia.

³⁰Tapi dung tarboto songon i tu angka na asing na dung porsaya i, dioban halahi ma si Saulus tu Kaisarea, sian i ma disuru halahi ia tu Tarsus.

³¹Jadi sonang ma angka parlagutan na di Judea, na di Galilea dohot na di Samaria. Boti hara ni pangurupi ni Tondi Parbadia gabe mur martamba ma angka parlagutan i, angke sai mabiar do halahi tu Tuhan di ngolu ni halahi.

³²Kehe ma si Petrus manopoti angka parlagutan. Di sada ari, ditopot ia ma angka ruas na di Lida.

³³Marsuo ma ia disi dohot sada bayo na margoar si Eneas, na sai payak di podomanna hara ni na pangpangon ma pola salapan taon honokna.

³⁴Didok si Petrus ma tu bayo i, “Jesus Kristus do pamalumkon ho, Eneas! Jongjong ma ho, hobasi ma podomanmi,” ning ia. Di na santongkin i manigor jongjong ma si Eneas.

³⁵Sude halak Lida dohot halak Saron na midaan si Eneas, gabe porsaya ma halahi sude tu Tuhan.

³⁶Di Jope adong muse do sada anak boru na margoar si Tabita, na porsaya do ia tu Jesus. (Si Dorkas do goarnia di hata Junani, astuanna ursa.) Sai didatdati ia do mambaen na denggan jana sai diurupi ia do angka halak na pogos.

³⁷Jadi marnyae ma ia hatiha i, lalu mate. Dung nididi bangkenia i, dipayakkon ma di bilik na di loteng ni bagas i.

³⁸Nada pola sadia dao dope Jope sian Lida. Jadi dung dibege angka sisean ni Jesus na di Jope, na topet do si Petrus di Lida, disuruhon halahi ma dua halak mandapotkon si Petrus marhite pangidoan, “Patibu ma ro tu inganannami.”

³⁹Manigor jongjong ma si Petrus mangihutkon halahi. Jadi dung lalu disi, dioban ma ia tu bilik na di ginjang i. Martangisan ma sude angka ina na mabalu mangarongomi si Petrus, dipatidahon halahi ma tusia angka baju dohot juba na nijait ni si Dorkas di halahi dompak mangolu ia.

⁴⁰Disuru si Petrus ma halahi sude anso haruar, jana singgang ma ia martangiang. Dung i dipaadop ia ma tu bangke ni si Dorkas jana didok ia ma, “Tabita, ngot ma ho!” Jadi dipabolnang ia ma matania jana dung diida ia si Petrus, juguk ma ia.

⁴¹Ditangkup si Petrus ma tanganna i manogu ia laho jongjong. Dung i dipiohon si Petrus ma angka na porsaya i rap dohot angka ina na mabalu i, dipasahat ia ma si Dorkas na mulak mangolu i tu halahi.

⁴²Sar ma barita i di kota Jope, bahat muse ma halak gabe porsaya tu Tuhan.

⁴³Laing disi ma si Petrus sanga na piga-piga ari nari, di bagas ni tukang kulit na margoar si Simon.