Read Batak Angkola 1 KORINTUS 1 Bible Online

1 KORINTUS 1 - Batak Angkola bible

1 KORINTUS 1

¹Sian si Paulus, hara ni hagiot ni Debata dipio gabe rasul ni Kristus Jesus, dohot sian si Sostenes donganta;

²tu parlagutan ni Debata na di Korintus, i ma angka na diparbadiai di bagasan Kristus Jesus jana na nipiohon gabe angka halak na badia, dohot tu sude halak di sude ingananna, na mamiohon goar ni Tuhanta Jesus Kristus, i ma Tuhan ni halahi dohot Tuhanta.

³Asi ni roha dohot hasonangan na sian Debata Amanta dohot sian Tuhan Jesus Kristus ma na mandongani hamu.

⁴Sai tongtong do au mandok tarimakasi tu Debata hara ni hamu, dibaen madung dijagit hamu basa-basa na sian Debata markite-hite Jesus Kristus.

⁵Gabe mamora do hamu taringot tu sudena pangalaho, dung Kristus nampuna hamu. Parbinotoanmunu pe madung bagas situtu taringot tu sude pangalaho jana malo muse do hamu mangajarkon parbinotoan i.

⁶I ma tandana paboa na dung tangkas barita taringot tu Kristus mangarajai rohamunu,

⁷gabe nada adong be na hurang pasupasu di hamu, di na nipainte-intemunu Tuhanta Jesus Kristus ro jana idaon ni halak sudena.

⁸Patoguon ni Kristus do rohamunu lopus tu ujungna, jadi muda ro Ia mangulahi, nada adong be na martihas di hamu.

⁹Pos do roha di Debata, nada adong sihagangguhonon diSia. Ia do Debata na mamio hamu gabe sada dohot AnakNa i, i ma Jesus Kristus Tuhanta i.

¹⁰Hamu ale angka dongan! Mangasahon goar ni Tuhanta Jesus Kristus hupangido anso saroha hamu sudena di sude pangkataionmunu, anso ulang masa parbolat-bolatan di hamu. Angkon laing sada do hamu di pikiran dohot di angka haputusanmunu.

¹¹Harana madung lalu baritana sian pangisi ni bagas ni si Koloe na adong parsalisian di tonga-tongamunu.

¹²Na hudok disi, on do: Adong sian hamu na mandok, “Anggo au marpihak tu si Paulus do,” adong muse na mandok, “Au marpihak tu si Apollos do,” na asing mandok, “Au marpihak tu si Kepas do.” Na deba nari mandok, “Anggo au marpihak tu Kristus.”

¹³Adong dehe lakna tarbagi-bagi Kristus i?[1] Adong dehe lakna diparsilangkon si Paulus hara ni hamu, sanga nipandidihon hamu di bagasan goar ni si Paulus?

¹⁴Tuani ma inda adong na hudidihon sian hamu asing sian si Krispus dohot si Gayus.

¹⁵Ulang adong sahalak pe na jabat mandok na hudidihon sanga ise anso gabe mamihak tu au. (

¹⁶Olo tehe! Si Stefanus pe nian dohot dongan sabagasnia laing au do mandidihon halahi. Tapi anggo asing sian i, sapanjang na huingot nada adong be na hupandidihon.)

¹⁷Nada na giot mandidihon umbaen na nisuru ni Kristus au, tapi na giot manjamitahon Jamita Na Denggan na sian Debata do. Jana i pe nada tola baenonku hara ni malo-malongku mangkatai, anso ulang sayang boti kuaso ni hamamate ni Kristus i di parsilang i.

¹⁸Harana anggo di halak na hona uhum ni Debata, songon haotoan do barita taringot tu hamamate ni Kristus di parsilang i. Tapi anggo di hita na nipalua ni Debata, kuaso ni Debata do barita i.

¹⁹Angke didok Debata do di Buku Na Badia i, “SursaranKu ma parbinotoan ni angka na pistar, jana agohononKu ma habisuhon ni angka na malo.”

²⁰Di dia dehe angka na bisuk i? Di dia dehe angka Siboto Surat i? Di dia dehe angka pangalo na sian portibi on? Nada he madung dibaen Debata habisuhon ni portibi on gabe hatoon?

²¹Harana sanga na bia pe malo ni jolma, nada tartandasa Debata markite-hite hamaloanna i sandiri. Tapi hape, hara ni hamaloan ni Debata, gabe jop ma rohaNia paluahon angka na porsaya tuSia markite-hite jamita na nietong ni portibi on songon haotoan.

²²Dipangido halak Jahudi do hahomangan gabe songon tanda, jana halak Junani manjalahisa di parbinotoan ni portibi on.

²³Hape anggo hita hum taringot tu Kristus na mate di parsilang i do tajamitahon. Hancit do roha ni halak Jahudi dibaen barita i. Jana angka bangso na asing na so Jahudi, dietong halahi do haotoan jamita i.

²⁴Tapi anggo di halak na dung nipiohon ni Debata — halak Jahudi sanga na so Jahudi — anggo jamita i hum Kristus do jana Kristus i ma hagogoan ni Debata dohot hamaloan ni Debata.

²⁵Harana pangalaho na niida songon haotoan ni Debata, dao ummalo dope i sian hamaloan ni jolma; jana na niida songon hagalean di Debata, dao gumogo dope i sian hagogoan ni jolma.

²⁶Hamu ale angka dongan! Ligi hamu ma jolo sanga na tarbia pangalahomunu di na nipiohon ni Debata hamu. Hum saotik do sian hamu na malo, sanga na markuaso sanga na marpangkat na gincat mangihutkon panatapan ni jolma.

²⁷Angke sangajo do dipili Debata angka na oto didok portibi on, anso gabe maila angka halak na pistar i. Jana dipili Debata muse do angka na gale ninna portibi on, anso maila angka halak na gogo.

²⁸Dipili Debata do angka na nietong ni portibi on, toruk, na bile dohot na nietong ni portibi on sisoada, anso disego-sego Debata angka na nipasangap ni portibi on.

²⁹Antong anggo songon i, nada adong sahalak pe na tarbaen manggodang diri anggo di jolo ni Debata.

³⁰Hara ni na nibaen ni Debata sandiri do umbaen na gabe mardomu hamu dohot Kristus Jesus. Na nilehen ni Debata do Kristus tu hita, anso marguru tu Kristus hamaloanta. Angke Kristus do na padenggankon hita mangulahi dohot Debata. Laing Kristus do na papitahon hita anso gabe bangso na polin hita di Debata. Kristus muse do na paluahon hita.

³¹Jadi hara ni i do, tarsurat di Buku Na Badia i, “Sanga ise na giot mamuji diri, angkon hara ni pambaenan ni Debata ma ia mamuji diri.”