Read Batak Angkola 1 KORINTUS 10 Bible Online

1 KORINTUS 10 - Batak Angkola bible

1 KORINTUS 10

¹Hamu ale angka dongan! Angkon tangkas do ingotonmunu sanga aha na tarjadi tu angka ompunta di na mangihutkon si Musa halahi. Dilinggomi ombun halahi sude, jana horas do halahi sude manaripari Laut Na Rara i.

²Anso gabe dohot mangihutkon si Musa, angkon dipandidihon do halahi sude di bagasan ombun dohot di bagasan laut i.

³Rap sipanganon partondion do dipangan halahi,

⁴jana rap siinumon partondion do diinum halahi. Rap minum sian dolok batu partondion do halahi, i ma batu partondion na mandongani halahi; Kristus sandiri do anggo batu partondion i.

⁵Tapi haru songon i pe nada sonang roha ni Debata mida umbahatan sian halahi jana hara ni i ma umbaen na marragean bangke ni halahi di halongonan i.

⁶Gabe tiruan do i sude di hita, laho paingotkon hita anso ulang sai tahagioti be angka pangalaho na jat songon na nibaen ni halahi i.

⁷Boti muse anso ulang tasomba gana-ganaan songon na nibaen ni deba sian halahi, songon na tarsurat, “Jadi juguk ma bangso i mangan dohot minum, dung i jongjong ma halahi jana manortori.”

⁸Nada tola hita marpangalaho na so ture songon na nibaen ni deba sian halahi. Angke hara ni na mambaen songon i, gabe mate dua pulu tolu ribu halak di bagasan sadari.

⁹Ulang ma tauji Tuhan[10] songon na nibaen ni halahi narobi, gabe marmatean halahi diturbingi ulok na marbisa.

¹⁰Ulang ma hamu mungut-ungut songon na nikarejohon ni na deba sian halahi, gabe mago ma halahi dibaen sipangago i.

¹¹Masa pe sudena i, na gabe tiruan do i tu angka halak na asing. Jana nisuratkon do sudena i anso gabe parningotan di hita. Angke di hatiha parpudi noma hita mangolu.

¹²Sanga ise na mangetong dirina togu jongjong, dijagohon ia ma anso ulang sanga tinggang ia.

¹³Sanga aha pe cobaan na nibolusmunu, cobaan na somal dialami jolma dope i. Tapi anggo Debata burju do marningot janjiNa. Nada pola dipadiar Ia hamu dicoba lobi sian na tolap gogomunu. Muda hatiha ro cobaan tu hamu, lehenonNia do dalan di hamu anso tahan hamu manaon cobaan i.

¹⁴Hara ni i hamu ale angka dongan, padao hamu ma rohamunu sian na marsomba gana-ganaan.

¹⁵Songon tu halak na marroha do au na mandok hata on tu hamu. Hamu sandiri ma nian manimbang pandohankon.

¹⁶Nada he panginuman hatarimakasion do on, na marhite i tadok tarimakasi, i ma na patuduhon na dung sada do hita hara ni mudar ni Kristus i? Jana nada he roti na tabagi-bagi i do na patuduhon hasadaonta di bagasan pamatang ni Kristus i?

¹⁷Dibaen hum sada sajo do roti i, jana rap mangan sian roti na sada i do hita sude, jadi songon na gabe sada pamatang ma hita na bahat on.

¹⁸Ligi hamu ma jolo halak Jahudi i. Anggo halak na manghaulkon sipanganon na nihaulkon di ginjang ni parhaulan i, halak na mardomu do i dohot inganan i.

¹⁹Aha na hudok disi? Adong dehe arti ni gana-ganaan sanga arti ni sipanganon na nihaulkon tu gana-ganaan i?

²⁰Inda adong i! Na hudok, anggo na nihaulkon tu gana-ganaan i, nada tu Debata i dihaulkon, tapi tu angka setan do. Jana nada giot au anggo mardomu hamu dohot setan.

²¹Nada tola hamu minum sian anggur ni Tuhan, diinum hamu muse sian panginuman anggur ni tondi na jahat i. Nada tola hamu mangan di meja ni Tuhan dohot muse di meja ni tondi na jahat.

²²Anso mangiburu dehe lakna Tuhan baenonta? Gumogo dehe hita lakna sian Tuhan?

²³Ninna halak, “Tola do baenonta sanga na aha giotta.” Tutu do i! Tapi nada sude giotta i marguna. “Tola do baenonta sanga na aha giotta” — tapi nada sude na tahagioti i padenggankon ngolunta.

²⁴Ulang ma adong hum na pareso tu dirina sajo. Ganop be ma manggogo patupa haporluan ni dongan na asing.

²⁵Tola do sude panganonmunu sanga juhut aha na digadis di pajak daging. Ulang pola jolo tangkasi hamu, haru adong pe panggora di bagasan rohamunu.

²⁶Angke tarsurat do di Buku Na Badia i, “Tuhan do nampuna tano on dohot sude isina.”

²⁷Muda diontang halak na so Kristen ho mangan, jana dioloi ho ontang-ontangnia i, papangani ma sanga aha na nipasahat i tu ho. Ulang pola sapa-sapai sanga sian dia haroro ni sipanganon i, anso ulang pola adong panggora ni rohamunu.

²⁸Tapi muda adong mandok tu hamu, “Anggo sipanganon on, na dung nihaulkon do on tu gana-ganaan,” ulang pangan hamu sipanganon i be hara ni haporluan ni halahi bope hara ni sora ni taroktok.

²⁹Nada taroktokmunu na hudok, tapi taroktok ni halahi do na hudok. Aropku adong do deba na marsapa, “Na bia dehe, biasi pola angkon marguru tu taroktok ni halak na asing iba?

³⁰Anggo nidok do tarimakasi tu Debata laho mangan sipanganon iba, biasi pola angkon mangincahi halak tu iba hara ni panganon i, hape hudok do tarimakasi tu Debata hara ni sipanganon i?”

³¹Sanga aha pe na nibaenmunu — mangan sanga minum hamu — pasangapkon Debata ma baen hamu sudena i.

³²Denggan ma baen hamu ngolumunu anso ulang jabat mardosa halak na asing hara ni hamu; sanga di halak Jahudi, sanga pe di halak na so Jahudi sanga pe di parlagutan ni Debata.

³³Songon ngolungkon ma parngoluonmunu. Sai huparayak do pasonang roha ni sudena halak di bagasan sasude na hukarejohon, so pola giot mambuat untung di au sandiri. Anggo tujuanku hum on do; anso tarpalua nian halahi sudena.