Read Batak Angkola 1 KORINTUS 11 Bible Online

1 KORINTUS 11 - Batak Angkola bible

1 KORINTUS 11

¹Ihutkon hamu ma tiruan na hubaen songon pangihutkonku di tiruan ni Kristus.

²Hupuji do hamu angke sai diingot hamu do au jana sai diihutkon hamu do parsiajaran na huajarkon i tu hamu.

³Tapi adong dope sada nari pangalaho na giot paboaonku di hamu; Kristus do anggo Ulu ni sude na margoar halaklahi; na gabe ulu ni dadaboru i, i ma halaklahina jana gabe Ulu Ni Kristus, i ma Debata.

⁴Muda martangiang sanga manyurirangi sada halaklahi; hape markupia ia, na pabile Kristus do i.

⁵Jana muda adong dadaboru na martangiang, sanga manyurirangi ia, hape inda marbasaen ulunia, na pabilehon ulunia i do i. Gabe tarsongon na marcukur ma ia muda songon i.

⁶Angke muda so ra dadaboru marbasaen, gumonan do nipangkas obukna i. Tapi muda marcukur sanga nigusting obukna i, gabe halayasonnia do i. Antong, gumonan do marbasaen dadaboru.

⁷Anggo halaklahi indangkon pola sai markupia, angke rupa dohot hamuliaan ni Debata do na nigambarkon ni halaklahi, dadaboru gabe hamuliaan ni halaklahi.

⁸Inda sian dadaboru halaklahi i dijadihon, dadaboru do na nijadihon sian halaklahi.

⁹Nada tu haporluan ni dadaboru muse umbaen na dijadihon halaklahi i, tapi dadaboru i do na dijadihon tu haporluan ni halaklahi.

¹⁰Hara ni i, angkon adong do tanda ni kuaso di ulu ni dadaboru hara ni surusuruan i.

¹¹Tapi haru songon i pe di bagasan ngolunta songon halak Kristen, nada jongjong sandiri dadaboru so pola marpartalian tu halaklahi, jana halaklahi pe nada jongjong sandiri so marpartalian tu dadaboru.

¹²Angke, haru pe dadaboru na parjoloi dijadihon sian halaklahi, tapi anggo dung i sian dadaboru do sorang halaklahi; jana sasude na adong, sian Debata do asalna.

¹³Hamu sandiri ma jolo manimbang na hudok on: Denggan dehe ninna rohamunu dadaboru martangiang tu Debata haru so marbasaen ulunia?

¹⁴Nada he dipatuduhon bako ni jolma i do tu hamu, paboa hailaan do di sada halaklahi muda ginjang obukna?

¹⁵Tapi anggo dadaboru, panutupi ni uluna do dilehen obukna i, jana hasangapanna do muda ginjang obukna.

¹⁶Jadi muda adong barang ise na giot manangkang, nada hasomalannami sanga angka parlagutan ni Debata mambaen na songon i.

¹⁷Taringot tu na giot dokkononku, nada hupuji hamu. Marlagut pe hamu, nada adong gunana tapi mur jatjat do.

¹⁸Na parjolo, muda marlagut hamu, hubege baritana di bagasan na marlagut-lagut i hamu adong na marsalisi sian hamu. Jana tutu do songon i aropku.

¹⁹Madung sapatutna masa parsalisian di hamu, anso tarida sanoli on sanga ise Kristen na tahan uji.

²⁰Tapi anggo satutuna nada na mambaen Parjamuan ni Tuhan hamu muda marlagut hamu.

²¹Harana hatiha mangan hamu, marsiadu do hamu mambuat sipanganon i, jabat adong na so dapotan hape na deba marlobian.

²²Biasi songon i? Inda he adong bagasmunu; di bagasmunu be ma mangan minum hamu! Adong he na giot palayaskon parlagutan ni Debata do hamu jana pailahon angka dongan na pogos? Angkon bia do dokkononku tu hamu? Pujionku dope hamu? Anggo taringot tusi, nada pujionku hamu.

²³Angke na huajarkon i tu hamu, na hujagit sian Tuhan i sandiri do i: Di borngin i dompak dihianati Tuhanta Jesus, dibuat Ia ma roti,

²⁴jana dung didokkon Ia tarimakasi tu Debata hara ni roti i, diponggoli Ia ma roti i dohot tanganNia, lalu didok Ia ma, “On ma pamatangKu na nipasahat di hamu. Baen hamu ma on laho marningot Au,” ning ia.

²⁵Laing songon i ma dung abis mangan, dibuat Ia muse ma panginuman ni anggur lalu didok Ia ma, “Parjanjian Na Imbaru do anggur on, na ditontuhon ni mudarKu. Ganop diinum hamu on, baen hamu ma on marningot Au.”

²⁶Angke sanga na piga noli dipangan hamu roti on jana diinum hamu anggur on, jamitahononmunu ma hamamate ni Tuhan i lopus ro Ia.

²⁷Jadi hara ni i, sanga ise na mangan roti ni Tuhan sanga manginum anggurNia di dalan na so patut, mardosa do ia tu pamatang bope tu mudar ni Tuhan i.

²⁸Jadi angkon marsipareso dirina ma jolo, dung i pe anso tola ia mangan roti dohot minum anggur i.

²⁹Angke, barang ise na mangan dohot minum, tapi nada diokui na pamatang ni Tuhan do i, na parohon uhuman do i tu pamatangna sandiri.

³⁰I do umbaen na bahat sian hamu na marnyae jana gale jana adong muse na dung mate.

³¹Tapi muda jolo tapareso dirinta, nada pola uhumon ni Debata hita.

³²Tapi muda diuhumi Tuhan hita, ajaronNia ma hita, anso ulang hona uhum be hita rap dohot portibi on.

³³Hara ni i hamu ale angka dongan, muda marlagut hamu giot mangan, angkon marsipaintean do hamu.

³⁴Muda adong na male, jolo mangan ia di bagasnia. Ulang jabat marlagut hamu, hum anso manjagit uhuman ni Debata tu hamu sandiri. Taringot tu angka pangalaho na asing, dung ro pe au anso hupatorang tu hamu.