Read Batak Angkola 1 KORINTUS 12 Bible Online

1 KORINTUS 12 - Batak Angkola bible

1 KORINTUS 12

¹Taringot tu angka silehen-lehen ni Tondi ma saonnari. Giotku nian ulang so tangkas diboto hamu sasintongna taringot tusi.

²Ingot hamu ma dompak so ditanda hamu dope Tuhan, tarela-ela do hamu mangoloi gana-ganaan na ngungu.

³Hara ni i hupabotohon ma tu hamu anggo halak na dipimpin ni Tondi Parbadia nada tardok halahi, “Sai hona bura ma Jesus!” Laing songon i muse nada adong sahalak pe na malo mandok, “Jesus do Tuhan!” anggo inda digohi Tondi Parbadia halakna i.

⁴Marragam rupa do silehen-lehen sian asi ni roha ni Debata, tapi Tondi na sasada i do mangalehen i.

⁵Marragam rupa do karejo laho mangoloi Tuhan i, tapi Tuhan na sasada i do na nioloan i!

⁶Marrupa-rupa do dalanna mangkarejohon karejo ni Debata, tapi anggo na mangalehen gogo tusi di ganop halak, laing Debata na sada i do.

⁷Laho patumbukkon na hasaya di hita sude, markarejo do Tondi Parbadia di ganop hita tapi asing be dalanna.

⁸Tu na sada dilehen Tondi i do hamaloon mandok hata di bagasan habisuhon, jana tu na asing, dilehen Tondi i do hamaloon mandok hata di bagasan parbinotoan.

⁹Laing Tondi na sada i muse do mangalehen tu na asing haporsayaan, hape tu na asing dilehen Tondi i do kuaso laho pamalum halak.

¹⁰Tu na sada dilehensa kuaso mambaen hahomangan jana tu na asing dilehen muse hasurungan laho manyurirangi. Tu na asing muse dilehen Tondi i do gogo laho patandahon parasingan ni silehen-lehen ni gogo na sian Tondi Parbadia dohot na so sian Tondi Parbadia. Adong do i na nilehen gogo laho mangkobari dohot hata na marragam-ragam boti na so niastuan, jana adong muse do na nilehen gogo laho patorangkon angka hata na marragam i.

¹¹Tondi na sada i sajo do mangkarejohon i sudena; dilehen do hasurungan tu sada-sada be marguru tu giot ni Tondi i sandiri.

¹²Songon pamatang ni jolma do Kristus i; sada do pamatang i, tapi marbagian-bagian do i. Haru pe bahat bagian-bagian i, laing sada pamatang do sude angka bagian-bagianna i.

¹³Angke markite-hite sada Tondi, nipandidihon do hita sude gabe sada pamatang, bope halak Jahudi bope halak Junani, bope naposo bope halak na malua. Songon i muse, nipainum do hita dohot Tondi na sada i.

¹⁴Harana pamatang i sandiri pe, nada hum sian sada bagian sajo, tapi bahat do bagian-bagianna.

¹⁵Muda didok pat i, “Nada tangan au, jadi nada masuk au tu pamatang,” astuan ni i, nada tutu pat i na so bagian ni pamatang i.

¹⁶Jana muda didok pinggol, “Nada masuk tu bagian ni pamatang au, harana inda mata au,” nada gabe so masuk tu bagian ni pamatang pinggol i.

¹⁷Sugari antong, hum mata sajo sude pamatang i, bia ma baenon ni pamatang i manangihon? Sanga sugari sude pamatang i gabe pinggol sajo, bia ma baenon ni pamatang i manganggo?

¹⁸Taligi ma, Debata do na mangatur parpayak ni angka bagian-bagian i di pamatang i. Diingananna be do dibaen Debata sudena i marguru tu parsumanna mangihutkon parnidaan ni Debata.

¹⁹Sugari hum sabagian sajo, dia dope sigoaron pamatang?

²⁰Bahat do tutu angka bagian-bagian i tapi anggo pamatang sada sajo do i.

²¹Jadi hara ni i, nada tardok mata tu tangan, “Inda porlu ho di au!” sanga ulu i mandok tu pat, “Inda porlu ho di au!”

²²Tapi angka bagian na layas didok rohanta, hape apala i do na umporlu di hita;

²³jana angka bagian na nidok ni rohanta na so pola mararga, hape apala i ma na ummarga tabaen. Angka bagian na so jeges idaon, hape gabe tusi do na umbahat taparrohahon.

²⁴Angka bagian na dung jeges idaon, inda porlu taparrohahon. Na dung disusun Debata do pamatangta i sadenggan-dengganna anso ummarga tabaen angka bagian na so porlu mararga.

²⁵Jadi muda songon i, nada marbagi-bagi be pamatang i; marsipasari-sarian do i na sada tu na asing.

²⁶Muda markancit sabagian, gabe markancit muse do sude angka bagian na asing; muda dapotan pujian sabagian sude angka bagian na asing i dohot do marjop ni roha.

²⁷Hamu sudena rap pamatang ni Kristus do hamu, jana pasada-sada hamu bagian ni pamatang i do.

²⁸Laing songon i do di bagasan parlagutan i, madung ditontuhon Debata do inganan ni angka dongan i: Parjolo angka rasul; paduahon angka panurirang; patoluhon angka guru, dung i baru ma angka na mambaen tanda hahomangan, dung i angka na manjagit kuaso laho pamalum halak, sanga laho mangurupi halak na asing, sanga mamimpin, sanga mangkobari di bagasan hata na marragam rupa na so niastuan.

²⁹Nada sude halahi rasul, sanga panurirang, sanga pe guru. Nada sude adong kuasona laho mambaen hahomangan,

³⁰sanga laho pamalumkon halak, sanga mangkobari di bagasan hata na marragam-ragam na so niastuan, sanga laho patorangkon angka hata i.

³¹Antong, mur ruminggas ma hamu manjalahi angka silehen-lehen sian asi ni roha ni Debata. Tapi hupaboa dope di hamu sada nari dalan na dumenggan.