Read Batak Angkola 1 KORINTUS 13 Bible Online

1 KORINTUS 13 - Batak Angkola bible

1 KORINTUS 13

¹Sugari tarbaen iba mangkobari di angka hata ni jolma, dohot di hata ni surusuruan, hape inda nihaholongan angka dongan na asing, tudos ma iba songon doal na maruolol sanga songon canang na mangkuling-kuling.

²Sugari malo au manyurirangi, jana huboto sude na buni dohot sude parbinotoan, jana adong di au haporsayaan jabat tarpaorot au angka dolok, tapi nada adong di au holong ni roha, songon na soada do au.

³Sugari sude pe sinadonganniba dilehen tu halak na pogos, jana sugari pe nipadiar pamatangniba hona tutung,[11] tapi anggo so nihaholongan do halak na asing, nada adong guna ni i sudena.

⁴Sobar do holong ni roha i jana burju. Nada mangiburu anggo holong ni roha i, inda marhata manggang, nada ginjang rohana.

⁵Nada jais holong ni roha i, jana nada manjalahi labo tu dirina sandiri. Nada parmuruk i jana nada disimpan ia hasalaan ni halak na asing.

⁶Nada sonang holong ni roha i muda masa hageduhan, hum mida na sintong do marjop ni roha holong i.

⁷Sanga aha pe na ro, tahan do holong ni roha i jana dihaporsayaisa do sude; anggo holong ni roha i nada unjung mago pangkirimonna jana sai sobar do i manaon sasudena.

⁸Nada ra luntur holong ni roha i. Anggo hamaloon laho manyurirangi, di sada hatiha abis do i dibaritahon. Taringot tu hamaloon laho mangkobari di hata na marragam-ragam na so niastuan i, di sada hatiha mago do i. Taringot tu hamaloon laho mangastui sasude, sada hatiha mago do i.

⁹Angke hurang singkop dope parbinotoanta bope panyurirangonta.

¹⁰Sanoli on muda dung ro na sanggam i, gabe mago ma disi na so sanggam i.

¹¹Dompak menek au, songon pangkatai ni dakdanak na menek do pangkataingku, songon dakdanak na menek pangkilalaanku, jana marpikir au songon parpikir ni dakdanak na menek. Saonnari madung magodang au; ma hutinggalkon pangalaho sihadakdanahanku.

¹²Sanga aha na taida saonnari, tarsongon halinu na hurang torang do i di sormin. Tapi anggo saulahon idaonta ma tangkas pangalaho na satutuna. Saonnari hurang tangkas dope parbinotoan na adong di au, tapi anggo saulahon botoonniba ma tangkas, songon tangkas ni parbinoto ni Debata di au.

¹³Jadi tinggal ma na tolu on: Haporsayaan, arop ni roha, dohot holong ni roha; tapi na gumodang sian na tolu i, holong ni roha do.