Read Batak Angkola 1 KORINTUS 14 Bible Online

1 KORINTUS 14 - Batak Angkola bible

1 KORINTUS 14

¹Parayak hamu ma mambaen holong ni roha jana tambori hamu ma angka silehen-lehen ni Tondi, tarlobi anso manyurirangi hamu.

²Sanga ise na mangkobari di hata na so niastuan, nada tu jolma ia mangkobari; tu Debata do ia mangkobari. Nada diastui halak sanga aha na nidokna i, angke Tondi Parbadia do na mambaen ia mandokkon angka pangalaho na binoto ni Debata.

³Tapi sanga ise na manyurirangi, tu jolma do ia mangkobari laho patoguhon roha ni halahi, pajopkon roha dohot mangapoi halahi.

⁴Sanga ise na mangkobari di hata na so niastuan, hum dirinia sajo do na nipatogunia, hape anggo halak na manyurirangi, i do na mangurupi parlagutan i anso mur tu majuna.

⁵Denggan sajo do sugari nian malo hamu sude mangkobari di hata na so niastuan. Tapi na dumenggan, sugari nian malo ma hamu sude manyurirangi. Angke gumodang do halak na manyurirangi ulang pado halak na mangkobari di angka hata na so niastuan; asing ma rupani muda adong halak na mangkobari di hata na marragam na so niastuan, tapi laing malo muse ia patorangkon sanga aha na nidoknia i, anso sudena parlagutan i dapotan parsaulian.

⁶Sugari ro au mandapotkon hamu jana mangkobari au di hata na so niastuan, aha ma he guna ni i! Asing ma, muda hupajojor tu hamu sangkap ni Debata, sanga parbinotoon, sanga panyurirangan, sanga pangajaran sanga hupaboa tu hamu aha na huboto taringot tu Debata, sanga hupaboa taringot tu angka pangalaho na nibaen ni Debata maradopkon jolma manusia, sanga huajari hamu.

⁷Laing songon alat musik na so marhosa i, isara ni suling dohot hasapi, anggo so torang do mardomu sorana i dibaen na mamalu i, dia ma he diboto halak sanga na ende aha na nibaenna i?

⁸Tudosan na asing sada nari: Muda sarat na dipalu do sarune, ise ma na ra markobas kehe laho marporang?

⁹Laing songon i do hamaloanmunu laho mangkobari di hata na marragam na so niastuan i. Anggo hata na so tangkas do dipardokkoni hamu hara ni hamaloanmunu i, nada adong sahalak pe na mangastui sanga aha na nidokmunu i, sayang boti do angka hata na nipardokkonanmunu i.

¹⁰Bahat do ragam-ragam ni hata ni halak di portibi on, tapi umpe sada sian angka hata i na so marastuan.

¹¹Tapi muda inda huastui hata na nidok ni sada-sada halak, gabe halak na asing ma di au jolma na mamake hata i; songon i muse ma au tusia.

¹²Taringot tu hamu sandiri, huboto do na por rohamunu maruli angka hasurungan sian Tondi i. Tapi anggo na dumenggan, angkon marusaho do hamu laho mamake hamaloon i, mangurupi parlagutan i tu hamajuon.

¹³Hara ni i ma, sanga ise na mangkobari di hata na so niastuan, angkon pangidoonnia ma sian Debata anso laing dilehen muse disia gogo laho patorangkon sanga aha na nipardokkonannia i.

¹⁴Angke sugari martangiang iba di hata na so niastuan, martangiang do nian tondiniba, tapi nada markarejo.

¹⁵Antong, bia noma? On noma sibaenonniba: Martangiang ma iba dohot tondiniba, tapi martangiang muse ma iba dohot rohaniba. Marende ma iba dohot tondiniba, tapi laing giot marende muse ma iba dohot rohaniba.

¹⁶Harana muda mandok tarimakasi hamu tu Debata dohot tondimunu sajo, songon di ma he tarbaen halak na bahat i mandok, “Amen”, dung sidung ho mandok tarimakasi, anggo so diboto ia, sanga aha na nidokmi?

¹⁷Haru denggan sajo pe tangiang tarimakasimi tu Tuhan, tapi nada adong sanga aha pe guna ni tangiang i anggo tu halak na asing.

¹⁸Tarimakasi do hudok tu Debata, angke malo do au mangkobari di hata na marragam-ragam na so niastuan. Ummalo dope au sian hamu.

¹⁹Tapi anggo di angka parlagutan, gumonan dope limangkababa hata hudok asal ma diastui halak, ulang pado mandok hata na so niastuan maribu-ribu pandohan. Jopan do rohangku songon i anso tarajari au halak.

²⁰Hamu ale angka dongan! Ulang ma songon dakdanak parrohaonmunu. Taringot tu hajahatan, sugari laing tong ma hamu songon dakdanak na menek. Tapi anggo diparrohaon, gabe songon halak na dung impas godang ma hamu.

²¹Tarsurat do di Buku Na Badia i, songon on: “Didok Tuhan do, ‘Manghatai ma Au tu bangso on markite-hite pamangan ni halak na asing, i ma halak na mangkobari di bagasan hata na asing. Tapi haru songon i pe laing so ditangihon halahi do Au, ninna Tuhan i.’ ”

²²Jadi silehen-lehen laho mangkobari di angka hata na so niastuan, songon tanda do i di angka halak na so porsaya, nada dohot di angka na porsaya. Jana hasurungan laho manyurirangi, tanda do i tu angka na porsaya, nada tu angka halak na so porsaya.

²³Jadi muda marlagut hamu, marsidok hatana be ma na marlagut i di hata na so niastuan, hape ro muse ma deba halak na asing, sanga angka halak na so Kristen, tontu na rintik do hamu sudena ninna roha ni halahi!

²⁴Tapi sugari sude hamu manyurirangi masuk muse ma sahalak na so Kristen sanga halak na asing, jadi sude angka na nipajojormunu i patandahon angka dosania ma i jana mambaen ia gabe mangoku angka dosania i.

²⁵Sanga aha na buni di bagasan rohania, dipatandahon ma i, gabe dipatoruk ia ma dirinia marsomba tu Debata. Okuonnia ma na tutu do Debata di tonga-tongamunu.

²⁶Antong hamu ale angka dongan, aha ma he astuan ni i sudena? Muda marlagut hamu laho marsomba tu Tuhan: Adong ma na marende, adong na mangajari, adong na paboahon sanga na aha sian Debata, adong na mangkobari di hata na so niastuan, jana adong na patorangkon sanga aha na nidokna i. Tapi sasudena i, angkon mangajari dohot padenggankon do tu sudena i nibaen.

²⁷Muda adong na giot mangkobari di hata na so niastuan, sabahat-bahatna ma dua sanga tolu halak margonti-gonti, jana angkon adong ma na patorangkon sanga aha na nipajojor ni na mangkobari i.

²⁸Anggo so adong do na patorangkon hata i, angkon sip ma angka na mangkobari di hata na so niastuan i, di parlagutan i. Tuk ma di bagasan roha halahi mangkatai dohot Debata.

²⁹Taringot tu angka panurirang, denggan do dua sanga tolu halak mangkobari, jana laing manangi-nangi ma anggo na asing i manimbang sanga aha na nidoknia i.

³⁰Tapi sugari adong dope ro barita sian Debata tu sada halak na asing na juguk di parlagutan i, maradian ma jolo halak na mandok hata i.

³¹Jadi songon i ma dalanna anso tarbaen hamu pasada-sada manyurirangi; anso sude tarbaen marsiajar jana sudena dapotan hagogoan.

³²Dibaen anggo tondi ni panurirang mangoloi do tu panurirang i.

³³Na mangkagioti na taratur do anggo Debata; nada na mangkagioti hagaoron. Angke nada dihagioti Debata anggo hagaoron, tapi hasonangan i do.

³⁴Songon na masa di sude parlagutan ni halak na badia, angkon hohom do angka dadaboru di bagasan parlagutan. Nada tola halahi manghatai, tapi angkon unduk do halahi songon na nidok ni Tona i.

³⁵Muda giot adong botoon ni halahi, tu halaklahi ni halahi ma i disapai halahi di bagasna, harana na so umboto sopan do sada dadaboru na mangkobari di bagasan parpunguan ni parlagutan.

³⁶Sian hamu dehe lakna ro pandohan ni Debata? Sanga hum tu hamu sajo lakna pandohan i dipaboa?

³⁷Betak sai adong halak na mangkilala dirina maruli silehen-lehen laho manyurirangi sanga maruli ia di silehen-lehen na asing sian Tondi i, angkon tangkas ma botoon ni halakna i, parenta ni Tuhan do sanga aha na husuratkon on.

³⁸Tapi betak sai adong na so manjagit on, ulang pola pardulihon hamu halakna i.

³⁹Hara ni i hamu ale angka dongan, parayak hamu ma na manyurirangi i, tapi ulang gabe antahi hamu halak na giot mangkobari di angka hata na so niastuan.

⁴⁰Tapi angkon marsopan jana maraturan do i nibaen sudena.