Read Batak Angkola 1 KORINTUS 15 Bible Online

1 KORINTUS 15 - Batak Angkola bible

1 KORINTUS 15

¹Hamu ale angka dongan! Saonnari giotku, ingot hamu ma mangulahi Jamita Na Denggan na sian Debata na hujamitahon i najolo tu hamu. Madung dijagit hamu i, jana marojahan tu Jamita Na Denggan i do haporsayaanmunu.

²Muda togu do hamu marojahan tu na hujamitahon i, paluaon ni Jamita Na Denggan i ma hamu; asing ma rupani anggo na sayang boti sajo hamu di na porsaya i.

³Harana madung hupasahat tu hamu na umporlu, i ma sian na dung hujagit, na dung mate do Kristus hara ni angka dosanta mangihutkon na tarsurat di Buku Na Badia i.

⁴Madung ditanom Ia, jana mangulahi Ia dipangolu di ari patoluhon. I pe na dung tarsurat hian do i di Buku Na Badia i.

⁵Jadi dipataridahon Ia ma diriNa tu si Kepas, dohot tu siseanNia na dua bolas i.

⁶Dung i dipatidahon Ia muse dope Ia tu lobi lima ratus halak di sada hatiha. Bahatan na mangolu dope halahi saonnari, hum deba dope na jumolo.

⁷Dung i dipatidahon Kristus i muse dope Ia tu si Jakobus, jana tu sudena angka rasul i.

⁸Na parpudi situtu, dipatidahon Ia diriNia tu au muse — tu au na songon dakdanak na sorang taran so ro dope hatihana![12]

⁹Harana au ma lumayas sian sude rasul, jana nada patut au nian margoar rasul, dibaen madung huparkanciti parlagutan ni Debata.

¹⁰Tapi hara ni asi ni roha ni Debata, madung gabe songon au na adong saonnari on, au. Jana nada parcuma na niampunan ni Debata au. Hape gabe lumoja dope au markarejo sian sude rasul na asing i. Tapi i pe sudena, nada hara ni usahongku i; usaho ni Debata na mangakaholongi au do i jana na markarejo rap dohot au.

¹¹Hara ni i bope au sanga pe halahi laing i do jamitanami jana laing i do dihaporsayai hamu.

¹²Tapi muda i do na hami jamitahon, i ma Kristus na dung nipangolu i mangulahi sian hamatean, biasi laing adong dope deba sian hamu na mandok, anggo jolma na mate, nada pangoluon be mangulahi?

¹³Anggo tutu do halak na mate i na so pangoluon be mangulahi, antong Kristus pe nada tutu muse mangolu mangulahi sian hamatean.

¹⁴Jana sugari na so tutu mulak mangolu Kristus sian hamatean gabe nada adong gunana be hami manjamitahon sanga aha, jana inda adong muse gunana porsaya hamu.

¹⁵Lumobi sian i tardapot muse dope hami songon saksi pargabus taringot tu Debata, angke madung hami jamitahon paboa na dung dipangolu Debata mangulahi Kristus sian hamatean, hape inda tutu dipangolu Debata Ia mangulahi — muda na tutu ma i na so dipangolu Debata mangulahi halak na mate i!

¹⁶Angke muda inda dipangolu mangulahi halak na mate i, Kristus pe nada tutu dipangolu mangulahi sian hamatean.

¹⁷Jana muda nada dipangolu Kristus i, sayang boti ma haporsayaanmunu i; jana di bagasan dosamunu dope hamu mangolu.

¹⁸Dung i mago muse ma angka na mate di bagasan Kristus i.

¹⁹Anggo hum di ngolunta dompak di portibi on sajo do pangkirimon ni rohanta tu Kristus[13] gabe hita ma halak na lumebak sian sude jolma na di tano on!

²⁰Hape anggo satutuna madung dipangolu mangulahi Kristus sian hamatean, songon siangkaan sian angka halak na dung mate. Jana on ma jaminanna, paboa na pangoluon do mangulahi angka jolma na dung marmatean i.

²¹Angke hara ni sada halak do masuk hamatean i tu portibi on, laing songon i muse ma na mulak mangolu i sian hamatean, dipasahat tu jolma manusia markite-hite sada halak muse.

²²Songon parmate ni sasudena jolma manusia hara ni na sapangalaho dohot si Adam, laing songon i ma pangoluon sudena, hara ni na dung sapangalaho dohot Kristus.

²³Tapi marguru tu aturanna be do nipangolu halahi: Na parjolo Kristus; dung i angka na dung nampuna ni Kristus di hatiha haroroNia.

²⁴Dung i ro ma hasisidungna. Taluhonon ni Kristus ma disi sudena pangarajaion, sude kuaso dohot hagogoon; lalu pasahatonNia ma kuaso ni harajaanNia tu Debata Amanta i.

²⁵Mamarenta ma Kristus lopus sude musuNia i tunduk tuSia baenon ni Debata.

²⁶Anggo musu na parpudi patunduhonNia, i ma hamatean.

²⁷“Madung dipatunduk Debata tuSia sasudena na adong.” Anggo na nidokna di bagasan pandohan “sasudena na adong” madung torang na so dohot di bagasan ni i Debata sandiri na patundukkon sasudena i tu Kristus.

²⁸Tapi dung dipatunduk sasudena tu toru ni pangarajaion ni Kristus, Ia sandiri pe, i ma Anak Ni Debata i patunduhonNia ma diriNia sandiri tu Debata na dung mambaen tunduk sasudena tuSia. Jadi Debata sandiri noma mamarenta sasudena.

²⁹Anggo so pangoluon do mangulahi halak na mate i, biasi pola nipandidihon halak tu jolma na mate? Aha pola sipainteon sian angka na mate i? Muda na tutu ma na so pangoluon be jolma na mate i, aha ma he gunana nipandidihon halak salaho tu jolma na mate.

³⁰Jana hami pe aha ma gunana hami paadop-adop parmaraan i tongtong?

³¹Hamu ale angka dongan! Ganop ari do manaon parkancitan au hara ni moga ni rohangku mida ngolumunu na porsaya hamu tu Kristus Jesus Tuhanta i.

³²Anggo hum hara ni na somal masa di jolma sajo do pola ma marsiranggut au mangalo angka binatang panyoro di Epesus on, aha ma labongku sian i? Anggo so pangoluon do halak na mate i mangulahi, antong dumenggan ma: “Mangan minum hita jana marsonang-sonang, harana laing na mate do hita ancogot.”

³³Ulang jabat tarpaoto-oto hamu! Muda dipardongan hamu halak na jahat, gabe jahat muse do parangemunu na denggan i.

³⁴Torang ma rohamunu jana ulang be mambaen dosa hamu. Adong dope sian hamu halak na so tangkas mananda Debata. Hudok pe songon i, anso maila do hamu di dirimunu.

³⁵Betak adong manyapai, “Bia ma he jolma na mate i dipangolu mangulahi? Pamatang na bia ma dilehen tu halahi mangulahi?”

³⁶O ale na oto! Muda disabur hamu eme di tano, nada ra tubu same i anggo so jolo mate.

³⁷Jana na giot sisaburonmu — same ni gandum sanga sian na asing pe — nada pamatang ni suan-suanan na giot tubu, tapi hum batuna sajo do.

³⁸Debata sandiri do muse na mangalehen rumang ni suan-suanan i marguru tu dengganna di parnidaanNia. Dilehen Debata do rumang ni suan-suanan i ganop be tu sude ragam ni same i.

³⁹Nada adong na sarupa rumang ni pamatang ni sandok na marhosa. Adong do rumang ni pamatang ni jolma, asing muse rumang ni pamatang ni angka binatang; pamatang ni angka unggas pe asing muse do i sian ihan.

⁴⁰Laing songon i do angka barang-barang na adong di langit dohot angka na di tano on. Marsioban hajegesonna be do angka na di langit i, angka barang na di tano on pe laing songon i do.

⁴¹Marasing do hajegeson ni mataniari sian hajegeson ni bulan. Salangkan angka bintang i pe paasing-asing be do hajegesonna.

⁴²Songon i ma pangalahona sanoli on taringot tu angka na mate mangulahi dipangolu. Anggo pamatang na nitanom i, pamatang na ra busuk do i. Tapi anggo pamatang na mulak mangolu i, pamatang na so marhaujungan do i.

⁴³Na nitanom di bagasan halayason, mulak mangolu ma i di bagasan hasangapan. Na nitanom di bagasan hagaleon mulak mangolu ma i di bagasan hagogoan.

⁴⁴Pamatang tano on do na nitanom i, tapi na dipangolu pamatang partondion do. Adong do pamatang na sian tano on, adong muse pamatang partondion.

⁴⁵Tarsurat do i songon on, “Si Adam, jolma na parjolo i gabe halak na mangolu,” tapi si Adam na parpudi i do gabe Tondi na mangalehen ngolu.

⁴⁶Na marrumang pamatang do anggo na parjolo ro, nada na marrumang partondion. Parpudi ro do anggo na marrumang partondion i.

⁴⁷Sian tano do dijadihon anggo si Adam na parjolo i, tapi anggo si Adam na paduahon sian banua ginjang do i.

⁴⁸Anggo angka jolma portibi on, songon si Adam na parjolo-jolo i do i na nijadihon sian tano, tapi angka jolma banua ginjang i, sarupa tu na ro sian banua ginjang i do i.

⁴⁹Songon dia hita saonnari na songon si Adam na nijadihon sian tano i, anggo sanoli on gabe songon na ro sian banua ginjang i muse ma hita.

⁵⁰Na hudok disi hamu angka dongan, on do: Anggo pamatang na dijadihon sian sibuk dohot sian mudar, nada tarbaen gabe parsidohot di Harajaan Ni Debata; pamatang na ra mate pe nada tarbaen gabe pamatang na manongtong.

⁵¹Ligi da, hupaboa ma sada rahasia di hamu: Nada jabat mate hita sude tapi nipauba ma hita sudena.

⁵²Di bagasan sangkidop mata do i sudena tarjadi, di na nipalu sarune na parpudi situtu. Angke dung tarbege sora ni sarune i, pangoluon ma mangulahi angka jolma na mate i marpamatang na manongtong jana paubaon ma hita sudena.

⁵³Pamatangta na ra mate on angkon mamake pamatang na so ra mate noma, jana pamatang na sian portibi on angkon mamake pamatang na sian banua ginjang noma.

⁵⁴Muda dung dipake pamatang na ra mate do pamatang na so ra mate i jana pamatang na sian portibi on mamake pamatang na sian banua ginjang i, baru ma anso tarjadi disi na tarsurat di bagasan Buku Na Badia i na mandok, “Madung dipangabis hamatean; madung dapot hamonangan!”

⁵⁵“Jo, hamatean, di dia do hamonanganmi? Jo, hamatean, di dia he corotmi?”

⁵⁶Anggo corot ni hamatean i, i ma dosa jana kuaso ni dosa i, i ma Tona i.

⁵⁷Tapi tarimakasi ma di Debata, dilehen Ia do antong hamonangan di hita markite-hite Jesus Kristus Tuhanta i!

⁵⁸Hara ni i hamu ale angka dongan na nihaholongan, sai togu ma hamu jana hot. Marsitutu ma markarejo di Tuhan, angke diboto hamu do, sude na nikarejohonmunu di Tuhan, nada sayang boti sudena i.