Read Batak Angkola 1 KORINTUS 2 Bible Online

1 KORINTUS 2 - Batak Angkola bible

1 KORINTUS 2

¹Hamu ale angka dongan! Di na ro au mandapotkon hamu jana di na hujamitahon tu hamu taringot tu sangkap ni Debata na so binoto ni portibi on dope,[2] nada hupake malo-malo ni jolma mangkobari tu hamu. Jana nada hupake parbinotoan ni portibi on.

²Harana madung putus hian di rohangku, salolot rap au dohot hamu, nada pajojoronku bagi aha tu hamu asing sian Jesus Kristus; lumobi ma i taringot tu hamamateNia di parsilang i.

³Dompak rap au dohot hamu, gale jana humitir do au hara ni na mabiar.

⁴Nada markite-hite habisuhon na paposkon hupalalu hatangku dohot jamitangku tapi markite-hite dalan na patandahon kuaso na sian Tondi i do.

⁵Hubaen pe songon i, anso ulang marojahan tu hamaloan ni jolma do haporsayaanmunu, tapi anso marojahan tu kuaso ni Debata.

⁶Haru pe songon i, anggo tu halak na dung togu haporsayaanna, laing huhobarkon do nian taringot tu hamaloan. Tapi nada hamaloan ni portibi on sanga hamaloan ni angka na markuaso di portibi on. Harana mago do kuaso ni halahi i.

⁷Hamaloan ni Debata do anggo na hupajojor i. Nada diboto portibi on hamaloan i, tapi madung dipasingkop Debata hian i baen hasonanganta dompak so dijadihon Debata dope portibi on.

⁸Sahalak pe nada adong umboto sangkap na nibaen ni Debata i. Angke sugari na dung diboto halahi i, nada jabat parsilangkonon ni halahi Tuhan na sumangap i.

⁹Tapi songon na nidok ni surat di Buku Na Badia i do, “Anggo di angka halak na manghaholongi Debata, madung dipasingkop Debata hian angka na so unjung diida mata, sanga dibege jolma, jana na so jungada muse dope tubu di bagasan roha ni jolma.”

¹⁰Hape madung dipaboa Debata tu hita sangkapNia i markite-hite TondiNia. Didodo Tondi i do sasude, lopus tu angka na buni na dibagasan Debata.

¹¹Angke anggo na umboto sanga aha na di bagasan roha ni sada-sada halak, laing tondinia i sandiri do. Laing songon i do Debata. Anggo na umboto sanga aha na di bagasan roha ni Debata, Tondi Ni Debata sandiri do!

¹²Jana nada dilehen tu hita tondi ni portibi on, tapi Tondi na sian Debata do, anso taboto sudena na nibasa-basahon ni Debata tu hita.

¹³Laing i do na hami hatahon, nada markite-hite hata na niajarkon ni habisuhon ni jolma tapi markite-hite hata na niajarkon ni Tondi. Hami pajojor do angka pangalaho partondion tu angka na maruli Tondi.[3]

¹⁴Halak na so maruli Tondi Ni Debata, nada tarjagitsa di bagasan rohana sanga aha na nipatorang ni Tondi i. Harana songon haotoan do angka na songon i di halahi. Nada haastuan halahi angka pangalaho na songon i, angke angkon sian partondion do i tarastui.

¹⁵Sanga ise na maruli Tondi Ni Debata, i do na mangastui arti ni sasudena i tapi anggo ia sandiri nada tardodo sanga ise pe.

¹⁶Harana, “Ise ma he na umboto roha ni Tuhan, sanga ise ma he na mamodai Ia?” Tapi di hita do roha ni Kristus i.