Read Batak Angkola 1 KORINTUS 4 Bible Online

1 KORINTUS 4 - Batak Angkola bible

1 KORINTUS 4

¹Etong hamu ma hami angka pangoloi ni Kristus, na manjagit tanggung jawab laho manjamitahon angka sangkap ni Debata na so diboto portibi on dope.

²Anggo na dipangido sian halak na gabe pangoloi i ma, angkon sihaposan do ia.

³Anggo di au nada marimbar sanga na aha dipikiri hamu taringot tu au, bope pikiran ni halak na asing. Salangkan pikiranku taringot tu au sandiri, nada pola soal i huhilala.

⁴Sanga taringot tu bagi aha pe, nada adong huhilala salangku, tapi inda na mamastihon au paboa na tutu na so adong hasalaanku. Tuhan i sandiri ma manontuhon sanga na marsala au sanga nada.

⁵Antong, anggo so dapot dope hatihana, ulang ma matibutu tontuhon hamu marsala sada-sada halak sanga nada. Painte hamu ma lopus tu haroro ni Tuhan i. BukaonNia do sude angka rahasia na buni di na golap. RungkaranNia ma sudena rahasia na buni na di bagasan roha ni jolma. Di hatiha i pe anso jagiton ni halak ganop pujian na patut jagitonna sian Debata.

⁶Hamu ale angka dongan! Hara ni hamu, gabe tu si Apollos dohot tu au ma huhonahon i. Maksudna, anso sian tudosan na hami baen i, marsiajar hamu sian umpama na mandok, “Ulang ma dipikiri hamu taringot tu hamu lobi sian na tarsurat i.” Jadi muda songon i nada adong be sian hamu na ra marmoga-moga, hape halak na asing dilayasi.

⁷Ise dehe na mambaen hamu marhasurungan sian na asing? Nada he na nijagitmunu do sude sian Debata? Antong biasi ma he manggodang diri hamu songon dia ma na adong di hamu songon na so nilehen i di hamu?

⁸Nada adong be na hurang di hamu! Madung mamora hamu! Ma gabe raja hamu! Hape hami inda. Denggan ma i, muda tutu do raja hamu, anso tarbaen hami rap dohot hamu mamarenta.

⁹Harana anggo mangihutkon pandapotku, dilehen Debata do di hami angka rasul inganan na tumoruk, dos songon halak na niuhum tu hamatean, angke madung gabe sitontonan hami diportibi on, dijolo ni jolma dohot angka surusuruan.

¹⁰Gabe angka na oto do hami hara ni Kristus jana hamu angka na malo dibagasan Kristus! Hami angka na gale, hamu na gogo! Hami diincahi, anggo hamu dipapuji-puji!

¹¹Lopus tu hatiha on, tangkuraparon do hami jana manguas; pakean pe hum na lohot di pamatang on ma; diparkanciti halak do hami; so adong inganannami;

¹²angkon loja do hami markarejo anso adong panganonnami. Muda diburai hami, pasupasu do hami baen balosna; muda diloncingi hami, sobar do hami;

¹³muda dipalayas-layas halak hami lambok do hatanami mangalusi i. Nada tuk hami songon rompak-rompak ni portibi on; lopus tu hatiha on, laing dietong do hami songon na hodar ni portibi on.

¹⁴Hubaen pe surat on tu hamu, nada na giot pailahon hamu, tapi na paingotkon hamu do au songon angka dakdanakku sandiri.

¹⁵Songon halak Kristen hamu, didok rohangku madung adong sampulu ribu halak gurumunu, tapi nada adong na gabe ama di hamu. Hum au do na gabe ama di hamu sude, harana Jamita Na Denggan taringot tu Kristus Jesus i do na huoban di hamu.

¹⁶Hara ni i gomos ma hupangido tu hamu, au ma tiru hamu.

¹⁷Ihut tusi madung husuru si Timoteus mandapotkon hamu. Songon halak siihutkon Kristus, songon anakku sandiri do ia na huhaholongi. Anak haposan do i. Paboaonnia ma tu hamu sanga na bia ngolu na hudalankon dung porsaya au tu Kristus, i ma pardalan ni ngolu na huajarkon di ganop parlagutan sanga na di dia pe.

¹⁸Madung adong deba sian hamu na marmoga-moga; harana ninna roha ni halahi, nada tulus be au mandapotkon hamu.

¹⁹Tapi angkon laing ro do au mandapotkon hamu, nada pola honok be muda dipaloas Tuhan. Jadi muda ro au, disi ma idaonku sanga aha do antong na tarpatupa angka na manggodang diri i; ulang hum mandok hata sajo halahi.

²⁰Harana muda Debata do mamarenta ngolu ni sada-sada halak, angkon tanda do i sian hagogoon ni ngolu ni halahi, nada sian hata-hatana.

²¹Jadi pili hamu ma sanga dia do giotmunu! Angkon maroban loncing-loncing dehe au ro mangajari hamu sanga mardongan halambohon dohot holong ni roha do?