Read Batak Angkola 1 KORINTUS 5 Bible Online

1 KORINTUS 5 - Batak Angkola bible

1 KORINTUS 5

¹Satutuna madung lalu tu au paboahon na adong deba sian hamu marpangalaho na so ture; adong sian hamu na pardadaboruhon na nialap ni amangna. Hape halak na so mananda Tuhan pe nada ra mambaen na songon i!

²Haru ma songon i, hape laing pagodang-godang diri dope hamu. Angkon marsak ma hamu nian, jana paorotonmunu ma halak na marpangalaho sisongon i sian tonga-tongamunu.

³Haru padao-dao pe pamatangta anggo tondingku di tonga-tongamunu do au huhilala. Jadi songon na di tonga-tongamunu do au saonnari laho mambaen haputusan,

⁴“Mangasahon goar ni Tuhan Jesus Kristus hudok ma di hamu, angkon niuhum do halak na songon i hodar ni pangalahona!” Jadi muda marlagut hamu jana di tonga-tongamunu au markite-hite tondingku, mangasahon kuaso ni Tuhanta Jesus Kristus,

⁵angkon pasahatonmunu do halak na songon i tu Sibolis anso disegohon pamatangna i jana di na songon i paluaon ma tondina di na ro mangulahi Tuhan i.

⁶Nada denggan anggo na manggodang diri i hamu! Ning rohangku diboto hamu do pandohan on, “Saotik pe ragi i, gabe kombang do sude adonan i!”

⁷Jolo ambungkon hamu ma ragi na lolot i, i ma dosa i anso gabe songon adonan ni topung na imbaru boti na ias hamu sian ragi ni dosa na honok i. Harana madung mamungka Ari Pesta Paskah di hita; Kristus na gabe songon biri-biri Paskah di hita, madung dihaulkon.

⁸Jadi tapestahon ma Paskanta i dohot roti na so marragi, i ma roti na manggambarkon hapolinon bope sasudena na tumbuk di roha ni Debata. Ulang ma tapestahon Paskah i mardongan roti na marragi na honok, i ma dosa dohot hajahatan.

⁹Di suratku na salpu i madung hudok tu hamu anso ulang mardongan hamu tu halak parhamainan.

¹⁰Na humaksud nada halak parhamainan sanga na songkal, sanga panipu, sanga na manyomba gana-ganaan na so mananda Debata saotik pe. Nada i na hudok; harana muda padaoonmunu noma halahi, tontu angkon morot noma hamu sian portibi on.

¹¹Anggo na humaksud songon on do: Ulang pardongan hamu halak na mangoku dirina Kristen hape rorang halahi, sanga songkal, sanga pe sioloi gana-ganaan sanga na sai ra pabusuk-busuk dongan, sanga parmabuk sanga pe panangko. Hum sajuguhan pe mangan dohot halak sisongon i, ulang!

¹²Anggo manguhumi halak na so Kristen, inda karejongku i. Debata sandiri ma mangadili halahi. Tapi angka anggota ni parlagutan, inda he hak ni parlagutan i sandiri do laho manguhumi angka sisongon i? Di Buku Na Badia i tarsurat do songon on, “Paorot hamu ma angka parjahat i sian tonga-tongamunu.”