Read Batak Angkola 1 KORINTUS 6 Bible Online

1 KORINTUS 6 - Batak Angkola bible

1 KORINTUS 6

¹Biasi adong sian hamu na puluk mandapotkon panguhum na so porsaya tu Tuhan mangaduhon donganna sahaporsayaan muda marbadai hamu dohot donganmunu i? Biasi inda dipangido ia anso angka halak na badia manyalosehon parkaro i?

²Adong he na so diboto hamu do angkon uhuman ni angka halak na badia do portibi on? Jadi anggo uhumanmunu do portibi on, na so tarsalosehon hamu be angka parkaro na songon i menekna?

³Na so diboto hamu do, haru surusuruan pe hita do manguhumi halahi saulahon. Mur ma angka parkaro na mardomu tu ngolu siganop ari on!

⁴Antong muda masa angka parkaro na songon i, aduhononmunu dope tu angka jolma na so marjohoman bagi aha di parlagutan i?

⁵Paila-ilahon ma hamu songon i! Sai adong do sada-sada halak sian tonga-tongamunu na malo manyalosehon parsalisian ni angka donganta Kristen!

⁶Tapi hape kehe do dongan na sada mandapotkon na so Kristen mangaduhon parkarona maradopkon donganna Kristen!

⁷Ulang be nidok kehe marparkaro tu halak na so Kristen; hum parsalisian di tonga-tongamunu pe madung gabe hataluan i di hamu. Gumonan ma taon hamu pambaenan na jat i sanga dirugihon hamu!

⁸Hape hamu sandiri dope na mambaen na so tigor tu halak na asing. Rugi do halak dibaen hamu. Jana tu dongan Kristen muse do songon i dibaen hamu!

⁹Nada he diboto hamu do, anggo angka halak na so tigor nada dapotan bagian di Harajaan Ni Debata? Ulang ma hamu lilu! Halak na markarosuan, sioloi gana-ganaan, si pangalangkup, si pangalukluhi, si pandalus-dalus,

¹⁰angka panangko, na mangkaut tu diri dohot parmabuk, angka na sai ra manilakoi halak, dohot angka na mambuat sian halak na so bagianna — sude halak sisongon i nada dapotan bagian di Harajaan Ni Debata.

¹¹Songon i hian do deba sian hamu najolo. Tapi anggo saonnari madung dipaias hamu sian dosa, madung diparbadiai, jana madung dipatigor hamu di bagasan goar ni Tuhan Jesus Kristus dohot di bagasan Tondi Ni Debatanta.

¹²Adong do deba na mandok, “Sanga aha pe tola do baenonniba.” Tapi anggo di au nada sude marguna. Jadi haru pe tola au mambaen sanga na aha, nada ra au padiarkon diringku dirajai sanga na aha pe.

¹³Adong muse do deba na mandok, anggo sipanganon tu butuha do i, jana butuha i pe tu panganon do i diparade. Hape dua-duana i giot soadahonon ni Debata do. Nada tola pakeon pamatang ni jolma i tu na so ture, tapi hum tu angka pangalaho na porlu di Tuhan do. Jana Tuhan i pe dibaen Ia do angka pangalaho na porlu tu pamatang i.

¹⁴Madung dipangolu Debata Tuhan Jesus sian hamatean, songon i muse ma pangoluon ni Debata hita markite-hite kuasoNia.

¹⁵Diboto hamu do, anggo pamatangmunu i anggota ni pamatang ni Kristus do i. Antong, tola ma he buatonku sada anggota ni pamatang ni Kristus i, gabe hubaen anggota ni pamatang ni panggampang? Nada songon i!

¹⁶Aropku inda diboto hamu dope, sanga ise na marhamainan dohot sada halak panggampang, na dung gabe sada do ia dohot panggampang i! Harana tarsurat do, “Gabe sada ma na dua halak i.”

¹⁷Tapi anggo halak na pasada dirina dohot Tuhan, gabe sada ma Tondi Ni Tuhan i dohot tondi ni halakna i.

¹⁸Padao hamu ma dirimunu sian hahodaron. Angke sude dosa na asing i na nibaen ni jolma, di ruar ni pamatangna do i tarjadi. Tapi anggo halak na marhamainan, na mambaen dosa tu pamatangna sandiri do i!

¹⁹Sanga nada he diboto hamu, pamatangmunu do inganan ni Tondi Parbadia i? Sian Debata do pamatangmunu, jana nada hamu nampuna dirimunu.

²⁰Madung ditobus Debata hamu jana lunas digarari Ia. Hara ni i, denggan ma pake hamu pamatangmunu i anso marsangap Debata.