Read Batak Angkola 1 KORINTUS 7 Bible Online

1 KORINTUS 7 - Batak Angkola bible

1 KORINTUS 7

¹Saonnari taringotanku ma angka na nipaboamunu di suratmunu i tu au. Muda nada mambuat boru sada halaklahi, denggan do i.[4]

²Tapi anso ulang targoda di angka pangalaho na markarosuan, dumenggan do ganop halaklahi adong be dadaboruna, bope dadaboru adong be halaklahina sandiri.

³Angkon gohan ni halaklahi do na tama songon ama-ama maradopkon dadaboruna, jana dadaboru pe angkon gohanna do na tama songon ina tu halaklahina; marsilehenan be ma na tama maradopkon na asing.

⁴Nada roha-roha ni dadaboru i be di dirina sandiri, halaklahinia noma na markuaso tusia. Songon i muse halaklahi i, nada markuaso be ia di dirinia sandiri; daborunia i noma na markuaso disia.

⁵Ulang ma marsipadaoan halak na saripe, muda so sian tumbuk ni tahi sanga sadia lolotna, anso bisa hamu rap martangiang. Dung i mardomu ma hamu mangulahi, anso unang diuji Sibolis hamu, harana nada tahan hamu marpuaso.

⁶Nada gabe parenta, muda hudok pe songon i, tapi songon sipaingot do.

⁷Anggo satutuna nian, gumonan do didok rohangku sugari songon au on sudena halak. Tapi bia ma baenon, paasing-asing be do silehen-lehen na nijagit sian Debata. Deba songon on do hasurungan na nijagitna, hape na asing nada songon i.

⁸Tu angka halak na so marripe bope tu angka na dung mabalu, songon on ma sipaingotku: Gumonan ma hamu indangkon marbagas songon au on.

⁹Tapi anggo inda tartahan hamu pangidoan ni sibukmunu, marbagas ma hamu. Harana dumenggan do hamu marbagas timbang sai gurgur hagiot ni sibukmunu.

¹⁰Tu halak na marripe, songon on ma hudok: (Satutuna nada au na mangalehen parenta on, Tuhan i do.) Muda dung marbagas sada dadaboru, ulang be ditadingkon ia halaklahinia i.

¹¹Tapi muda dung ditadingkon ia, angkon laing hot ma ia nada marhalaklahi, muda inda songon i mulak ma ia mangulahi tu halaklahinia i. Jana sada ama nada tola manyirangkon dadaboruna.

¹²Tu angka na asing i, songon on ma sipaingotku: — anggo on sipaingotku sandiri do, nada sian Tuhan i — muda dialap sada bayo na Kristen sada boru na so porsaya tu Kristus, hape ra do daborunia i rap dohot ia, nada tola sirangkonon ni bayo i daborunia i.

¹³Muda adong pe sada boru Kristen marbagas tu sada bayo na so porsaya tu Kristus, hape ra do bayo i mamake ia, nada tola tadingkonon ni daboru i halaklahina i.

¹⁴Harana gabe diparbadiai do halaklahi na so porsaya i markite-hite dadaborunia i, jana dadaboru na so porsaya i pe diparbadiai markite-hite halaklahinia. Sugari nada songon i, gabe ramun do angka dakdanakmunu, tapi anggo saonnari na badia do halahi.

¹⁵Tapi muda giot sirang na so porsaya i sian daborunia i, sanga halaklahina na Kristen, sirang ma ia tusi. Anggo di pangalaho na songon on, bebas do hamu, harana ulang so dame hamu, i do hagiot ni Debata.

¹⁶Songon sada ina hamu na porsaya tu Tuhan — bia ma he parbinotoanmunu manontuhon paboa na so tarpalua hamu halaklahimunu? Laing songon i ma angka ama na Kristen, bia ma he parbinotoanmunu manontuhon paboa na so tarpalua hamu dadaborumunu?

¹⁷Marsiatur ngoluna be ma nian sugari hombar tu panogu-nogu ni Tuhan songon na dung ditontuhon Debata hian tu ganop be, di na mamungka dipio Debata mangkaporsayai Ia. I do aturan na huajarkon di ganop parlagutan.

¹⁸Muda dung marsunat hian sada-sada halak di na mamungka ia porsaya tu Debata, indangkon pola be diakalkon ia mangagohon tihas ni sunat i. Songon i muse muda adong sada-sada halak na so marsunat dope di na mamungka porsaya ia tu Debata indangkon pola dipangido ia anso marsunat ia.

¹⁹Rap na so marguna do na mangoloi aturan ni sunat dohot na so mangoloi. Mangoloi parenta ni Debata do na porlu.

²⁰Sanga bia hian iba di na mamungka porsaya tu Debata, laing songon i ma iba tongtong.

²¹Adong dehe hatoban ho hatiha dipio Debata? Nada pola bia i. Tapi muda adong do di ho hatiha na denggan anso bebas, ulang parsayang hatiha i.[5]

²²Harana muda adong sada hatoban na porsaya tu Tuhan, i ma na gabe halak na dipalua jana Tuhan nampunasa. Laing songon i do halak na malua na dipio ni Kristus, i do na gabe naposoNia.

²³Na nitobus ni Debata do hamu jana madung lunas do dibaen Ia. Hara ni i, ulang be pasahat hamu dirimunu gabe hatoban ni jolma.

²⁴Antong, sanga songon dia pe hamu di na mamungka hamu porsaya tu Debata, gumonan ma laing songon i ngolumunu rap dohot Debata.

²⁵Saonnari taringot tu angka na so marripe noma. Anggo taringot tusi nada adong dope hujagit angka parenta sian Tuhan. Tapi haru songon i pe, songon halak na manjagit asi ni roha ni Tuhan na patut sihaposan, giot lehenonku do sipaingotku.

²⁶Marnida ragam ni hasusaan na ro di hatiha on, anggo ning rohangku gumonan do sugari laing songon na adong sisaonnari on ngolu ni halak.

²⁷Adong dehe tarihot ho tu sada dadaboru? Ulang ma jalahi dalan parsirangan! Adong dehe ho na so tarihot tu sada dadaboru? Unang ma jalahi sada dadaboru.

²⁸Tapi nada mardosa muda dialap hamu boru. Laing songon i ma muda marbagas dadaboru, artina nada mardosa ia disi. Hum on do, angkon adopan ni halak na marbagas i ma bahat hasusaan. Anggo hagiotku malua ma nian hamu sian angka hasusaan i.

²⁹Tapi on do na hudok, hamu ale angka dongan: Otik noma hatiha di hita. Mamungka saonnari, sanga ise na marripe, songon na so marripe ma dibaen ia ngoluna;

³⁰halak na tangis, songon na so marsak ma rohana; halak na martata songon na so marjop ni roha ma ia; halak na manobusi, songon na so marnampuna;

³¹jana sanga ise na paurus-urus angka pangalaho na di tano on, songon na so karejo di angka na songon i ma nian ngoluna. Angke anggo portibi na adong saonnari on, salpu do i sude!

³²Giotku nian, malua ma hamu sian hasusaan. Halaklahi na so marripe, tarpasada ia ma rohania tu angka pangalaho na marpardomuan tu Tuhan, angke sai giot pasonangonnia ma roha ni Tuhan.

³³Tapi anggo halaklahi na marripe, bahat ma sipikiranna taringot tu na di tano on, harana sai giot pasonangkon roha ni daborunia i ma ia;

³⁴jadi gabe mardua roha ma ia. Dadaboru na so marbagas, sanga bujing-bujing, taringot tu Tuhan do bahat pikiranna, harana giotnia ulang so Debata nian nampuna sude ngolunia. Tapi anggo dadaboru na marsaripe, dipasada do rohana tu angka na di tano on, harana sai giot pasonangonnia do roha ni halaklahinia.

³⁵Husurat pe songon i sudena, laho padenggankon hamu sandiri do, nada adong rohangku mangalarang on, sanga mangalarang i. Anggo giotku disi, anso tigor dohot na tama sajo sibaenonmunu, boti anso tarpasada hamu rohamunu tu Tuhan.

³⁶Muda dihilala roha ni sada halak nada dibaen ia na sapatutna tu tunanganna, muda so tartahan ia be hagiotnia jana porlu ma dihilala ia marbagas ia dohot si bujing-bujingnia i, dibaen ia ma na nihilalania denggan.[6] Nada mardosa ia muda marbagas halahi.

³⁷Tapi muda adong na mamutuskon di bagasan rohana na so marbagas be ia dohot tunanganna i,[7] jana nada hara ni na tarpaksa haputusannia i, denggan do na nibaennia songon i, muda tuk do gogonia mambaen songon i.

³⁸Jadi, denggan do pangalaho ni na marripe[8] tapi laing dumenggan dope pangalaho ni na so marripe[9] i.

³⁹Muda adong sada dadaboru na marbagas, salolot mangolu halaklahina i tarihot ma ia tusi. Tapi muda dung jumolo halaklahina i, tola do ia marbagas mangulahi tu halaklahi por ni rohania; asal ma parsaripeon ni halak Kristen parsaripeon i.

⁴⁰Tapi laing maruntungan dope ia muda inda marbagas mangulahi. Pandapotku sandiri do anggo i, tapi huhilala adong do Tondi Ni Debata di au.