Read Batak Angkola PILIPPI 1 Bible Online

PILIPPI 1 - Batak Angkola bible

PILIPPI 1

¹Sian si Paulus dohot si Timoteus, angka naposo ni Kristus Jesus, tu sude dongan sahaporsayaan di bagasan Kristus Jesus na di Pilippi, rap dohot di angka pamimpin dohot pangoloi. Hami na dua, si Paulus dohot si Timoteus naposo ni Kristus Jesus.

²Asi ni roha ma di hamu dohot hasonangan sian Debata Amanta, dohot sian Tuhan Jesus Kristus.

³Ganop taringot rohangku tu hamu, tongtong do mandok tarimakasi au tu Debata.

⁴Jana ganop hutangiangkon hamu sudena, sai di bagasan jop ni roha do au na martangiang i.

⁵Mandok tarimakasi do au tu Debata angke sian ari parjolo lopus tu saonnari, sai diurupi hamu do au pararatkon Jamita Na Denggan na sian Debata.

⁶Debata sandiri do na mamungka karejo na denggan i di tonga-tongamunu. Jana pos do rohangku toruskononNia karejo i lopus tu ari haroro ni Kristus Jesus mangulahi.

⁷Sai tongtong do di bagasan rohangku hamu sude. I do tutu tamana muda pe songon i pangkilalaanku taringot tu hamu. Angke na rap maruli do hamu sudena dohot au di silehen-lehen na nipasahat ni Debata di au; bope saonnari dompak tarhurung au sanga pe hatiha di ruar au laho mambela dohot mampartahankon Jamita Na Denggan i.

⁸Sai lungun sajo do rohangku tu hamu angka dongan, mardongan pangkilalaan holong ni roha na solkot sian Jesus Kristus sandiri. Debata ma saksina, paboa na tutu na hudok i.

⁹On do tangiangku salaho tu hamu: Anso nian mur mabagas holong ni rohamunu mardongan parbinotoan na sintong bope dohot panatapan na tumbuk,

¹⁰anso malo hamu mamili na dumenggan. Muda songon i do hamu, ias ma ngolumunu sian tihas dohot tilako sanga aha pe di haroro ni ari ni Kristus mangulahi.

¹¹Angka pambaenan na denggan noma mardapot-dapot sian ngolumunu, hum sian Jesus Kristus sajo do na tarbaen pataridahon suha na songon i; gabe nipasangap jana nipuji-puji ma Debata.

¹²Giotku diboto hamu ma nian, anggo angka pangalaho na masa tu au, i do mambaen mur rarat Jamita Na Denggan i.

¹³Gabe sude ma angka pangawal ni bagas godang dohot angka halak na asing na dison umbotoan, tarhurung pe au hara ni na gabe sahalak naposo do au di Kristus i.

¹⁴Jana dung di bagasan hurungan on au, gabe bahatan ma angka dongan sahaporsayaan gabe mur marpos ni roha tu Tuhan, mambaen halahi gabe mur puluk manjamitahon hata ni Debata so pola mardongan biar.

¹⁵Tutu do nian adong deba sian halahi na manjamitahon Kristus hara ni na mangiburu bope hara ni na marsalisi, tapi anggo deba hara ni burju ni roha do manjamitahon Kristus i.

¹⁶Anggo halahi hara ni holong ni rohana tu Debata do dibaen halahi songon i, mampartahankon Jamita Na Denggan i.

¹⁷Tapi anggo halak na asing, nada denggan maksud ni halahi manjamitahon Kristus i; na patongon tu hagiotna do halahi na marjamita i. Ning roha ni halahi, mur tamba susa ma au di hurungan hara ni halahi.

¹⁸Tapi aha ma pola i! Harana sanga na bia pe, denggan sanga na jat maksud ni halahi na manjamitahon i, laing Kristus do na nijamitahon i, jop do rohangku disi. Jana tongtong do songon i pangkilalaanku,

¹⁹angke huboto do, hara ni angka tangiangmunu i dohot hara ni pangurupi ni Tondi Ni Jesus Kristus angkon malua do au.

²⁰Hum on ma i na sai hupangidohon dohot na huaropkon: Ulang nian gabe so tulus sidung karejongku. Sai diarop rohangku do tongtong lumobi saonnari anso mur puluk au sian sudena roha bope pamatangku — sanga mangolu sanga na mate pe au — laing nipasangap ma Kristus.

²¹Harana anggo di au na mangolu on, mangolu di Kristus do, ia na mate au labongku do.

²²Tapi muda angkon mangolu do au di tano on, angkon karejohononku ma karejo na marparbatu. Gabe nada huboto be sanga na dia sipilionku.

²³Angke rap mandasdas do pangalaho na dua i tu au. Lungun sajo do nian rohangku manadingkon portibi on anso rap iba dohot Kristus, angke i do na dumenggan;

²⁴tapi hara ni na pasari-sari hamu gabe dumenggan dope au laing mangolu di tano on.

²⁵Pos do rohangku di na songon i. Hara ni i do umbaen na huboto, na laing dison dope au. Angkon laing rap do au dohot hamu sudena, anso tartolongi au hamu mur margogo jana mur masonang di bagasan haporsayaanmunu tu Tuhan i.

²⁶Hara ni i, muda dung lalu au di tonga-tongamunu, mur bahat ma pamujianmunu di bagasan Kristus Jesus hara ni au.

²⁷Antong parangehon hamu ma parange na tama tu Jamita Na Denggan na sian Kristus, anso muda ro au mangaligi hamu, sanga sian na dao hubege taringot tu hamu, bahaso na togu do hamu jongjong di bagasan sada tondi jana saroha laho marporang humopkop haporsayaan di Jamita Na Denggan i.

²⁸Angkon puluk do hamu tongtong; ulang mabiar hamu mida angka alomunu. I ma tandana di halahi, paboa na angkon talu halahi jana hamu ma na monang. Angke Debata sandiri do na mambaen hamu gabe monang.

²⁹Angke nada hum dalan mangkaporsayai Kristus na nilehen ni Debata tu hamu, tapi dohot do dalan tu parkancitan hara ni Kristus.

³⁰Saonnari dohot muse ma hamu rap dohot au di sada paraloan; i ma paraloan na dung niidamunu na salpu i huparalohon jana na laing huparalohon lopus tu sadari on songon na nibegemunu saonnari.