Read Batak Angkola PILIPPI 3 Bible Online

PILIPPI 3 - Batak Angkola bible

PILIPPI 3

¹Tamba ni i ale dongan, marjop ni roha ma hamu di bagasan Tuhan i. Nada pola alang rohangku mandok mangulahi na dung hudok i di suratku dompak so i; angke na padenggankon do i tu haluaanmunu.

²Jagohon hamu ma dirimunu maradopkon angka anjing i, jagohon hamu ma dirimunu maradopkon angka panyunat na so tutu.

³Hape hita do angka na dung manjagit sunat na tutu, nada halahi. Hombar tu panogu-noguon ni Tondi Ni Debata sandiri do tasomba Debata, jana mandok tarimakasi do hita hara ni na dung mardomu i hita dohot Jesus Kristus. Nada marguru tu angka upacara na tarida hita.

⁴Nian tarbaen au do marguru tu angka upacara i. Angke sugari adong halak na mandok di bagasan rohana tarbaen ia marguru tu angka upacara i ia, mur au ma.

⁵Marumur salapan ari, ma disunat au. Halak Israel do au, sian Marga Benyamin; halak Ibrani asli do au. Salaho tu na mangoloi angka Tona ni ugamo Jahudi, au ma sahalak anggota ni golongan Parise.

⁶Songon i ma situtu ni rohangku jabat do huparkanciti parlagutan i. Muda nitimbang sian angka Tona ni ugamo Jahudi, au ma sada halak na burju na so adong hurangna.

⁷Tapi hara ni Kristus, sasudena na huetong parlaboan najolo, anggo saonnari gabe hararugi noma i.

⁸Nada hum i dope, huetong do sasudena i gabe angka na parugi-rugihon au sajo. Ummarga do na adong di au saonnari on: I ma na mananda Jesus Kristus Tuhanki. Hara ni Kristus, gabe hupalua do sasudena. Songon rompak-rompak noma i sude huhilala, anso laing dapot au Kristus,

⁹jana tutu mardomu dohot Ia. Hadengganan dohot Debata nada be huusahohon sandiri dohot dalan pangoloion tu angka Tona ni ugamo. Denggan pe pardomuanku saonnari dohot Debata, hara ni na huhaporsayai do Kristus. Jadi, sian Debata do haroroan ni pardomuan na denggan i, jana marojahan ma i di haporsayaan tu Jesus Kristus.

¹⁰Hum on ma na nipangido ni rohangku; anso hutanda nian Kristus jana hurasoi nian kuaso na pangoluhon Ia sian hamatean i. Por do rohangku markancit dohot Ia jana gabe sarupa dohot Ia di pangalaho ni parmateNia.

¹¹Jana arop do rohangku, nisunggulan ma au sian hamatean anso mangolu mangulahi.

¹²Nada hudok na dung marhasil au, sanga na dung gabe sanggam. Tapi na torus dope au marusaho manjalahi upa na niparade ni Jesus Kristus i. Hara ni i do umbaen na nitangkupNia au jana dibaen Ia gabe nampunaNia.

¹³Nada na dung huhilala angka dongan, songon na dung di tanganku upa i. Tapi na adong do sada pangalaho na hubaen disi, huhalupahon na di pudingku jana hugogo parayak na adong di jolongku.

¹⁴Hara ni i ma umbaen na torus hulojong manuju tu tujuan na parpudi anso dapot au hamonangan, i ma ngolu na di banua ginjang; hara ni i do umbaen na nipio ni Debata hita markite-hite Jesus Kristus.

¹⁵Hara ni i sudena hita na dung impas godang di ngolu partondion, angkon songon i ma nian. Tapi betak sai adong sian hamu na asing pandapotna, laing patangkason ni Debata muse ma i tu hamu.

¹⁶Sada nari na porlu parrohahonon: Angkon ihutkononta do tiruan na dung tajagit i lopus tu hatiha on.

¹⁷Hamu angka dongan sudena! Tiru hamu ma au. Madung hami patuduhon tiruan na tigor, jadi denggan ma parrohahon hamu sanga ise angka na mangihutkon tiruan na hami baen i.

¹⁸Madung jotjot nian hupaboa tu hamu, jana huulahi muse saonnari mardongan ilu; bahat do halak na mangolu songon musu maradopkon hayu parsilang ni Kristus i.

¹⁹Anggo ujungna angkon gabe sego do ngolu ni halak sisongon i, angke na martuhankon hagiot ni pamatangna sandiri do halahi. Angka pangalaho sihailahononkon, hape gabe i do na niargahon ni halahi; angke hum angka na mardomu tu tano on sajo do na nisarihonna.

²⁰Tapi anggo hita rayat ni banua ginjang do. Laing sian i muse ma ro Tuhan Jesus Kristus Sipalua i. Ia do na sai tapainte-inte i mardongan lungun ni roha.

²¹Anggo pamatangta na gale boti na ra madangke on, paubaon ni Kristus do i gabe marsangap songon pamatangNia sandiri. Tarbaen do songon i angke adong do kuasoNia laho manaluhon sasudena.